سُنھپ کتھاں ہے؟۔۔۔ ڈاکٹر یسین بیگ

سونہڑپ کتھاں ہے
مٹھا سئیں ہر جا تیں ہے۔تساں اچ ھے اساں اچ ہے۔چندر تاریں تیں اگوں وی ہے۔گلیکسی دے پھیریں پروں وی ہے۔سونہڑپ سینڑپ اچ ہے تے گلہپ اچ یے۔سونہڑپ کتھاں ھے
ائے سئیں ان سونہیں ٹیشن اڈے بازار اچ کہیں نال بٹ گپ اچ ھے۔ایویں راہ لنگھدیں بندے نال کھل اچ ہے راہ پچھنڑ اچ راہ لاونڑ اچ ہے۔
گھا چواونڑ اچ کہیں واسطے اٹھی کھڑنڑ چا پانڑیں دا پجھنڑ بلا وجہ سلام کرڈیونڑ اچ ھے
سونہڑپ کتھاں ہے
نکے بالاں دی انگل پکڑ کے ٹراونڑ اچ ھے۔میلا ڈکھاونڑ اچ ہرانڑیں گھر دے قصے سوناونڑ اچ ہے۔وڈ وڈیریں نال باونڑ اچ حقہ بکھا ڈینونڑ اچ گالہیں مندے سنڑ گھنڑ اچ ہے۔
منت منوتی پچھوں کہیں دربار کربل مکے خواجے تیں حاضری ڈیونڑ اچ ھے۔کہیں گودے کوں بس ایویں سلام ڈے چھوڑنڑ اچ ھے۔
سونہڑپ کتھاں یے
بس مکلیندیں ہنجھ لکا کے کھل پوونڑ اچ ہے۔ایویں چیتے اچ خواب اچ وچھڑے موئے کوں کھلداں ڈیکھنڑ اچ ھے۔سوہنڑے چہرے کوں ہلکا مڑ کے ڈیکھنڑ تے اوندی وی ہلکی جھات اچ یا امید اچ ہے۔
سونہڑپ کتھاں ہے۔
سئیں اے بھوئیں تیں ایویں لکیریں مارنڑ اچ ھے۔لکیریں پچھو بند بندوڑے دے پانڑیں ٹرن دا نقشے اچ نواں گھر بناونڑ اچ لکیریں پچھوں وسوں توں سدھا گزرن والا راہ کڈھنڑ اچ یے
سونہڑپ کتھاں ھے
سبھے پکھیاں دی اوازاں اچ ھے۔کاواں اچ لالیاں اچ گیت پچھوں کئی ڈر بھوں دے صور دی سر پچھوں۔وسدے رسدے گھر دی کہیں ڈکھ بھری کوک پچھوں۔لڈ گئے بزرگ دی کٹھے تھئے بالاں دی پتھاری پچھوں۔ول ائے مال بال پچھوں۔پاس تھئے فیل تھئے جوان پچھوں۔جیت توں زیادہ ہار پچھوں۔حاصل توں زیادہ آس پچھوں۔
سونہڑپ کتھاں ھے
ایویں مسافر نال ترڑی پھٹی اوندی بولی الاونڑ اچ۔ایویں ما بولی نال لکھنڑ اچ گانونڑ اچ۔موبائیل دے ٹونیں اچ۔سکرین شاٹ اچ۔ہینڈ فری نال تل وطنی ڈوہڑے کافیاں دے کارڈ گھنڑ اچ۔یار کوں ایزی کوڈ کرنڑ اچ۔
سونہڑپ کتھاں یے
کہیں گال مندے رس رسیمیں کوں ویندا کرنڑ اچ۔کہیں فقے مسلک دی تات نہ کرنڑ اچ۔ڈکھ سکھ دے حال پچھوں ایمان عقیدہ نہ پچھنڑ اچ۔شکلوں عقلوں ڈوجھے تیں اندازے نہ لاونڑ اچ۔نہ بھڑنڑ نہ بھڑاونڑ اچ
سونہڑپ کتھاں ہے
میڈا جانی ائے ہر جا ھے۔ہر اکھ اچ ھے۔ائے کھوپڑی اندر ھے۔دھوڑ دزخ توں لکیا ویا۔
ائے سونہڑپ ہر جا ملسی۔ایکوں مل کے ڈیکھ کے مل گھنو۔کھل پوو۔چس وی چاوو پر ایکوں روکو ناں ٹوکو ناں۔ایندا اتہ پتہ کہیں مطلب دی ڈائری اچ۔واہ واہ دی سک اچ۔کہیں بدھل اچ ڈھک اچ قید اچ رکھڑاں نیں۔جتھ مل پووے۔زور دا کھل پوو۔

About The Author

ویب ڈیسک

See author's posts