” جنیٹک ریسرچ، ایتھنیسٹی تے نسل پرستی دا خاتمہ” ۔۔۔ مشتاق گاڈی

اڄ اینویں انٹر نیٹ تے پاکستان دے انجو انج "ایتھنک گروپس” دے جنیٹک بیک گراؤنڈ تے سٹرکچربارے پڑھدا ریہاں۔ کئی دلچسپ پیپرز ہتھیں لڳئین۔ مثال کیتے ہک بلوچستان دے "براہویں” بارے حالیہ ریسرچ پیپر ہئی جیڑھا ݙسیندے جو براہویں دی توڑے جو زبان دراوڑی ہے پر اُنہیں دا ساؤتھ انڈیا دے ٻنہیں دراوڑی زباناں ٻولݨ آلیں نال کئی خاص ” جنیٹک ریلیشن شپ” نئیں پاتا ویندا۔

مطلب براہوی بطور ہک دراوڑی ٻولی دے تاں باقی ریہی ہے پر اوندا اوریجنل "جنیٹک گروپ” ویلھے نال وٹیج ڳئے۔

اینویں ہک سندھ بارے ریسرچ پیپر ہئی جیندے وچ بجراݨی، کھوسے، چانڈیے، گھلو، نصراݨی اتیں سولنگی گروپس دے ڈی۔ این۔ اے دا تجزیہ ݙتا کھڑا ہئی۔

ایندے رزلٹ موجب ہک تاں اُنہیں وچ ساؤتھ ایشیا دے ہیپلوٹائپ گروپ ایم (40 فیصد) تے آر (6.9 فیصد) سبھ توں ودھ پاتے ویندن۔ جݙاں جو ݙوجھے وݙے ہیپلوٹائپ گروپ دا تعلق ویسٹ یوروایشیا نال ہے۔

ایندے نال نال انہیں گروپس دی "جنیٹک ڈائیورسٹی” دا وی تجزیہ ݙتا کھڑا ہئی جیندے موجب چانڈیو تے نصراݨی قوم وچ منگولیں دا جنیٹک ملاپ کُجھ ودھ ہئی جݙاں جو سولنگی تے گھلو گروپ وچ کوہ قاف ۔۔۔ چیچنیا دا جنیٹک ملاپ موازنہ وچ ودھیک ہئی۔