اساں ڈو ڃݨے ہکے بکے مارکیٹ اچ پھردے ودے ہاسے تے ساکوں ساڈا فیس بک فرینڈ اظہر مل پیا۔
اظہر کوں مل کے ساکوں اجوکے نوجوان دی کہاݨی کوں سمجھݨ دا موقع ملا۔اے عمر دا او حصہ ہوندے جیندے اچ زندگی اپݨے جوبن تیں ہوندی حے، عشق محبت دی دیومالائی دنیا دا جوڳ ، سماج کولو بغاوت، اپݨے ہووݨ دا ماݨ، پیت پریت دیاں ڳالہیں ہیک ادھی گودی پر اے نامراد بے چینی دا شکار ، دنیا کولو بد دل، ترٹھا ترٹھا تے اپݨے اندر نال لڑدا بھڑدا۔
اینجھے نو جوانیں دا سیاسی قبلہ اکثر گڑھی خدا بخش ہوندے۔اس نوجوان دی بے چینی ڈیکھ کے ساکوں احساس تھیا کلھے اساں دردیں کوں نسے پیندے ودے ٻئے وی ٻہوں سارے لوک ہن۔خیر اساں ترائے جݨے مارکیٹ دا جائزہ گھنݨ شروع کر ڈتا تے ایں دوران ساکوں ہیک قصور دا پنجاپی مل پیا تے اوں ساکوں آکھیا تساں جتنا ایں مارکیٹ کوں ڈیکھسو اتنا کنفیوز تھیسو بس میں تہاکوں سارا سمان گھن ڈینداں تساں زیادہ نہ سوچو۔
اساں سرائیکی لوک گالہیں دے ڳلہوڑ ہوندے ہیں فورا آوندی ڳالھ تیں یقین کر گھدا تے اوندے پچھوں ٹر پیوسے۔
او ساکوں مختلف گودامیں اچ گھن ڳیا تے لاٹیں دی بولی ڈیندا تے ساڈے ذمے لایندا گیا تے اساں چپ کر کے گھندے ڳیوسے۔
سمان شمان پیک کروا کے اساں بلٹی کروا چھوڑی تے شام کوں ہیک سنگتی نصراللہ کولو لنگھ ڳیوسے۔
نصراللہ ہنس مکھ تے دل دھیر نینگر حے۔او کلفٹن اچ کرائے دے مکان اچ راہندے اوکوں مل کے ایویں احساس تھیا جیویں جو اساں اوکوں کئی جنم کولوں جاݨ دے ہووں۔تھوڑا جیہاں پھوتی تے دل دا صاف بندہ حے۔رات تھی ڳئی تے ساڈی ٻٹ کڑاک شروع تھی ڳئی۔مظہر وی ساڈے نال نصرو دے کوارٹر تیں ٹک پیا۔
مظہر ہیک بے چین روح حے تے ٻٹ کڑاک دے دوران گالہیں گالہیں اچ پتا لڳا جو اے جوان سیاست کوں اخلاقیات دی ترکڑی اچ تول کے اچھائی تے برائی دے مروجہ معیار کوں مد نظر رکھ کے اپݨا سیاسی قبلہ کھڑا کرݨ چاہندے۔ میکوں پہلی ملاقات اچ پتا لڳ گیا ہائی جو ایں بالآخر فرسٹریشن دا شکار تھیوݨے تے اوندے بعد ڈیپریشن دے بھوڳ وی بھوڳیسی۔
ساڈی سوسائیٹی دے نو جوان دا ہیک ٻہوں وڈا المیہ حے جو او ریاستی تاریخ دے جبر کولو نکل نئیں سڳدا کیوں جو ساڈی ریاست کوڑی تاریخ تے تعصب تے مبنی نصاب دے ذریعے ساڈے ٻالاں دی زندگی کوں تباہ و برباد کر ڈیندی حے جیندے نتیجے اچ ساڈے ٻال/ٻالڑیاں کہیں کم دے نئیں راہندے۔
اگر او ایں تعصب کولو نکل وی آون تاں انہاں کوں پڑھایا ڳیا کوڑ ساری زندگی ہیک اینجھیں عذاب اچ ٻدھ کے رکھدے جیندے نتیجے ٻہوں ہی بھیانک ہوندن۔ فطرت دا ہیک لگا ٻدھا اصول حے جو نفرت، نفرت کوں ہی جنم ڈے سڳدی حے۔
ایویں ہی ساڈا اڃ دا نو جوان ہیک بݨے بݨائے نفرت دے ریاستی بیانئے کولو نکل کے ہیک کلھیپے تے بیگانگی آلی نفرت دے پاسے لگا ویندا جیندی وجہ کولو اوکوں پوری ریاست تے اوندے آلہ کار نال نفرت پیدا تھی ویندی حے۔
زندگی دی ایں نازک ترین ستھی اچ انسان ہیک اینجھا ناکارہ آرگن بݨ ویندے جیندا کوئی علاج کائینی ہوندا۔
ادھی رات تک اساں ڈسکشنز کریندے رہیے اوندے بعد میکوں نندر آوݨ لڳی تے میں آکھیا مارکا اساں تاں تھک گئے ہیں ہݨ سموں ول کل دی کل ڈیکھسوں۔
وت سویلے نصرو خان ساکوں ناشتہ کروایا تے اساں مارکیٹ آلے پاسے لنگھ ڳیوسے۔جتھاں ونڃوں اڳو ساکوں ہر کاروبار اچ پٹھاݨ ہی ٹکرے۔کراچی دے وڈے وڈے کاروبار پٹھاناں کولو ہن ہیکڑ ڈکڑ پنجابی وی کتھائیں نہ کتھائیں ساکوں ٹکر گیا۔
اساں مارکیٹ پھر کے واپس آندے پائے ہاسے تے میکوں بنی آکھیا آ میر مرتضی بھٹو دے گھر ڃلدے ہیں۔
میں تاں ہیک ڈونگھے ڈکھ دی کیفیت اچ ستر کلفٹن آلے پاسے روانہ تھی پیا تے بنی وی میڈے نال ہائی۔اساں میر دے گھر دے نال پڃے تے ساڈے اکھیں دے سامݨے او پورا منظر آ گیا جیرلھے بھٹو دے پتر کوں گولیاں مار کے شہید کر ڈتا ڳیا ہا۔او سڑک اڃ وی اویں ویران پائی ہائی۔
ہیک اجاڑ منظر نے ساڈے تجسس کوں مزید گہرا کرڈتا تے اساں او در تیں ونڃ پجوسے جتھاں بھٹو خاندان دا پورا کنبہ بہہ کے سیاسی تے نجی زندگی دے معاملات ڈسکس کریندا ہائی۔
گیٹ دے اتیں ہیک عام جیہاں باڈی گارڈ کھڑا ہائی جیرھا نسلا بلوچ ہائی اساں اوکوں ارداس کیتی جو ساکوں گھر دے اندر دا منظر ڈیکھݨ ڈے پہلے تے او ڈچکا وہ جیرلھے اوں ساڈیں اکھیں دے نیر ڈٹھے تے اوں گھر دا دروازہ کھول ڈتا۔
گھر اچ ونڃ کے ساڈے نال کیا گزرا اے؟ اڳلی قسط اچ
زلفی دی ہٹی(قسط6)۔۔۔ ذوالفقار علی
About The Author
اے وی پڑھو
اشولال: دل سے نکل کر دلوں میں بسنے کا ملکہ رکھنے والی شاعری کے خالق
ملتان کا بازارِ حسن: ایک بھولا بسرا منظر نامہ||سجاد جہانیہ
اسلم انصاری :ہک ہمہ دان عالم تے شاعر||رانا محبوب اختر