اے محبت وی نا مراد چیز حے، ایندا پتا وی نئیں لگدا جو کیرلھے تھائی حے تے کیویں تھائی حے۔ جیرھے ویلھے تھی ویندی حے ول تاں کھڑکا ڈیندی حے۔ بندہ شودا جینجھا کمزور تے بھاویں ان پھر ہووے اوکوں ایویں لگݨ پائے ویندے جیویں ٻس او بادشاہ حے،اݨ کھٹ شکتی کولو منہ تار تھی ویندے، من دا موسم چنگا تھیندے تے ہر شے من بھاوݨی تھی ویندی حے، زندگی دے سر ردھم اچ آ ویندن، ہر شے دے او رنگ جیرھے عام زندگی اچ کڈاہیں نشابر نئیں تھیندے چمکݨ لڳ ویندن، ڳالہیں اچ ڈونگھا پن آ ویندے، اکھ اچ فطرت دا حسن بھریج ویندے، چاندݨیاں راتیں روح دے ٹٻیں تیں سیڑھ آلی کار کھیڈݨ پئے ویندن، وقت دی رفتار کوں بریکاں لڳ ویندن، غم دنیا ہوا تھی ویندن، زمان و مکان دیاں رمزاں تہاڈی مٹھی اچ ہوندن تے بندہ ایویں مدھر ہوائیں اچ اڈݨ پائے ویندے۔
محبت دا اے کرشمہ حے جو او تہاکوں شانت کر کے تخلیق آلے پاسے گھن ویندی حے تے بندہ نویں جہان اچ روزمرہ زندگی دی متہاجی کولو کٹیج کے آزاد تے خود مختیار تھیوݨ آلے احساس اچ رنگیج کے حیاتی دی چس آلے پاسے لگا ویندے۔
اے واردات کڈاہیں ساری حیاتی وچ ہیک دفعہ تھیندی حے، کڈاہیں بار بار تھیندی حے تے کڈاہیں اکا نئیں تھیندی۔میں ایں حوالے نال فارم دی زندگی اچ راہندیں ہوئیں ہیک یونیک تے نویں تجربے اچوں گزراں۔
اݨ ڈٹھی محبت دی اپݨی چس ہوندی حے اے تہاکوں تہاڈی زندگی دے ادھورے پن تے تصوراتی خواہشیں دی تکمیل دا سبب بݨدی حے، بندہ جیرھی سوچ یا رجحان دا ہوندے اے اوکوں اوں سطح تیں جاڳروپ کریندی حے۔
جیرھی پروفیسر دوست بݨی اوندے نال ادب، فطرت تے انسانی سائیکالوجی پاروں ہر روز نویں نویں معروض تے عروض گھڑ گھڑ کے اپݨی شخصیت دی آبیاری تھائی تے میڈیا آلی بندی نال سیکولرزم، جینڈر ایشوز، سیاست تے فلاسفی تیں گالہیں تھیاں تے اساں ترئیے اپݨے اپݨے تصور دے بت بݨا کے حقیقی دنیا دے مسائل کولو کنارہ کش تھیوݨ دی کوشد کیتی تے ایں مقصد اچ کامیاب وی تھی ڳیوسے۔
ول پتا لگا جو انسان دے رولے کتنا وڈے تے عجیب ہوندن۔انہاں رولیاں اچ اساں لال بھنوالیاں کھاندے ڈنگراں نال زندگی دے دھاڳے جوڑیندے ہیک اینجھی دنیا وسا گھدی جیندے اچ کاروباری صلاحیتاں ماند تھیوݨ لڳ پیاں۔وت اے نامراد دنیا اینجھے لوکیں کوں گھا نئیں سٹیندی جیندی وجہ کولو فارم دے معاملات تیں ساڈی گرپ ڈیہوں ڈیہنہ کمزور تھیندی گئی تے اساں محبت دی پکڑ اچ آ کے جوڳی بݨ ڳیوسے، نہ دھاوݨ دا ہوش، نہ کھاوݨ دا ہوش تے نہ پاوݨ دا ہوش۔ایویں ڈیہنہ گزرݨ لڳ پئے تے قدرت وی شئت نہ چاہندی ہائی جو اساں کوئی کاروبار کروں تے پیسے شیسے کما کے ہیک وڈی گھاݨی دے گھاݨ اچ پائے نپڑیجوں۔
مرغی آلے شیڈ اچ این ڈی آ پائی تے ڈنڳریں آلے شیڈ اچ چوڑے مار بیماری گھر چا کیتا۔ساڈی جان عذاب تے پائے ڳئی محبت آلی پارٹی آپ دو چھکے تے شیڈ آلی پارٹی آپ دو۔ساکوں ایویں لگا جو جیویں میں ہیک بھیڈ ہوواں تے ڈو ناہر میکوں کھاوݨ چاہندے ہوون۔
ول فیض دی غم روزگار آلی کہاݨی سمجھ اچ آئی تے اساں ایں دنیا دی ہوا اچ دوبارہ ساہ گھدا تے ساری توجہ فارم آلے پاسے لا ڈتی۔آوکھیں ساؤکھیں فارم دے معاملات سدھے تھیون لگے تے مرغی دا ریٹ ڈاؤن تھی ڳیا تے میڈے گودے دے بھائیوال آپت اچ ہیک ٻئے کولو بدگمان تھی ڳئے تے بالآخر مرغی آلا ہیک شیڈ چھوڑنا پائے گیا۔
ساکوں اپنی نوکری دے پاروں فکر لا حق تھائی تاں اساں اپݨے سنگتی کوں آکھیا جے کر توں محسوس نہ کریں تاں میکوں ایویں لڳدے جیویں میڈا اتھاں ہووݨ تیڈے واسطے مسائل پیدا کریندا پائے لہذا تساں جیرلھے چاہوو ساڈی چھٹی کر ڈیوو اساں تہاڈے اتیں نراض کائینسے۔
اوں پچھیا ایویں کیوں تھیندا پائے، خدا ساڈے ول اچ کائینی یا کوئی ٻیا رولا حے۔میں اوکوں آکھیا اساں سرائیکی دانشوریں دا ہیک عجیب رولا حے جیرھا ہالی کہیں کوں سمجھ نئیں پیا اندا۔اوں آکھیا او کیویں؟
میں آکھیا ساڈا اتہاس گواہ حے اساں جیرھا کم شروع کریندے ہیں او کم نئیں چلدا ساڈے ہیک یار ظفر لنڈ نواں نواں کراچی یونیورسٹی او آئی آر اچ ماسٹر کر کے ولا تے اوں اپنی جتیں دی فیکٹری چا لائی اوتھو گھاٹا بھر کے ول ٹوکے آلی مشین چا لائیسی۔او شودا ٹوکے آلی مشین تیں سارا ڈیہنہ ڈان اخبار پڑھے ہا تے گاہک ڈان انگریزی اخبار دو زیادہ متوجہ تھیندے ہن اوندی ٹوکے آلی مشین دو نہ ڈیہدے ہن تے ٹوکا نال آلی مشین آؤ گھندے ہن حالانکہ ریٹ تے گھا ظفر دا چنگا ہوندا ہا ایویں ڈوچار کم ٻئے وی اوں کیتے پر کامیابی نہ ملی۔
ایویں ہیک ٻئے سنگتی شاکا گاڈی استاد فدا حسین گاڈی دے پتر وی ہیک دکان لائی ہائی تے آخر اچ اوندے نال وی ظفر آلا کم تھیا۔ایویں بہوں ساریاں بیاں مثالاں وی ہن جیندا ذکر اتھاں نئیں کر سگدا۔لہذا اساں کولو قدرت کوئی ٻیا کم کراوݨ چاہندی حے جتنا جلدی تھی سڳے توں ایں گالھ کوں سمجھ ونڃ۔او میڈا سنگتی کافی پریشان وی تھیا تے حیران وی تھیا۔
ول آکھس ایں آزمائش دا منطقی انجام کڈھدے ہیں کجھ بیا سوچ جیرھا تیکوں چنڳا لڳے ہن نوکری وی چھوڑ کھڑیں ٻیا وی تیڈا کوئی کماون دا ذریعہ کائینی توں تاں مر ویسیں کجھ نہ کجھ کرنا تے پوسی۔
زلفی دی ہٹی (قسط3)۔۔۔ ذوالفقار علی
اساں کیا کیتے اے اگلی قسط اچ۔۔
About The Author
اے وی پڑھو
اشولال: دل سے نکل کر دلوں میں بسنے کا ملکہ رکھنے والی شاعری کے خالق
ملتان کا بازارِ حسن: ایک بھولا بسرا منظر نامہ||سجاد جہانیہ
اسلم انصاری :ہک ہمہ دان عالم تے شاعر||رانا محبوب اختر