زلفی
قسط نمبر ڈو
سسار آکھیا بختیں آلی ایویں نہ کر او میڈا یار حے ۔بھا لا یاری کوں میکوں اوندیاں آندراں چاہیدن ہر قیمت تیں سساری دڑکا ڈتا۔ اچھا وی جندڑی میں اوکوں گھن آساں ناراض تاں نہ تھی۔سسار ولدا کندھی تیں ول آیا تے اوڈو گیدڑ یار وی آ ڳیا ۔
حال حوال تھیا ڳپ شپ لگی تے سسار گیدڑ کوں آکھیا آ اڃ تیکوں اپݨے گھر دا چکر لواواں تیڈی بھڃائی کوں تیڈے واسطے مونجھ آئی حے۔
گیدڑ خوش تھی کے ٹپ مار کے سسار دی کنڈ تیں سوار تھی ڳیا ۔ سسار وڳ روانہ تھیا تے تھوڑی دیر بعد گھر پڃ گیا۔ سساری گیدڑ کوں ڈیکھ کے ڈاڈھی خوش تھائی۔ حال حوال دے بعد سساری سسار کوں آکھ ماری جو گیدڑ کوں آکھ اپݨا آندراں کڈھ کے ڈیوے ۔
سسار شودے گیدڑ دو ڈٹھا تے آکھس تیڈی بھابھی جڈاں دی ماکھی چکھی حے او ڈیہنہ دے بعد او تیڈے آندریں تیں اکھ رکھی ودی حے تے آھدی حے میں اپݨے بھرا دیاں آندراں کھاندی ہاں او وی ماکھی آلی کار مٹھا ہوسن۔
گیدڑ سیاݨا تاں ہوندے فورا معاملے دی نزاکت کوں سمجھ ڳیا تے آکھس اوہو بھابھی جان میکوں پہلو ڈسو ہا میں تاں اپݨاں آندراں کندھی تیں رکھی آیاں ۔
کندھی تیں کیوں رکھی آئے ہاؤ سساری مایوسی دے انداز اچ پچھیا۔
بھابھی اصل اچ آندراں باری ہوندن میں دریا وی پار کرݨا ہا میں آکھے میڈ ے یار سسار تیں بار نہ آوے تہوں میں کندھی تیں کڈھ کے رکھ ڈتن تساں سسار کوں آکھو میکوں کندھی تیں گھن ڃلے ہݨے آندراں چا آنداں۔
سساری سسار کوں دڑکا ڈتا تے آکھس جلدی گھن ونڃ گیدڑ کوں کندھی تیں تے آندراں چا آؤ میں بکھ آؤ مردی ہاں۔
سسار شودا جلدی جلدی گیدڑ کوں کنڈ تیں ٻلھا کے واپس پرلی کندھی ڳیا تے جڈاں کندھی دے نیڑے پڃا تے گیدڑ ٹپ مار کے کندھی تیں ونڃ کھڑا تے ڈو ہتھڑ بجے ڈے کے آکھس لخ لعنت ہائی چنڳائی دا صلہ ایہو ہوندے جو توں میڈیاں آندراں کھاسیں ۔
بھولوں آ تیکوں اتنا پتا وی کائینی جو آندریں متوں کوئی زندہ رہ سڳدے اڃ دے بعد تیڈی ساڈی یاری ختم۔۔توں اپݨے راہ میں اپݨے راہ۔
سسار کوں دل ہی دل اچ شرمساری وی تھائی تے غصہ وی ڈاڈھا آیا خیر کیا کر سگدا ہا چپ کر کے واپس سساری کولو ڳیا تے آکھس ٻالیں دی مآ حال ایویں حے۔۔
سساری آکھیا میکوں کوئی پتا نئیں توں جیویں کریں میکوں گیدڑ دیاں آندراں چاہی دا ہن۔۔
باقی اگلی قسط اچ
About The Author
اے وی پڑھو
اسلم انصاری :ہک ہمہ دان عالم تے شاعر||رانا محبوب اختر
موہری سرائیکی تحریک دی کہاݨی…||ڈاکٹر احسن واگھا
فیمینسٹ!!!۔۔۔۔۔|| ذلفی