کشمیر میں ہاؤس بوٹس ناپید کیوں ہو رہے ہیں

 سرینگر:مقبوضہ کشمیر میں ہاؤس بوٹ مالکان کے مطابق ایک صدی قبل ڈل میں تین ہزار کے قریب ہاؤس بوٹ موجود تھےلیکن آج 930 کے قریب ہاؤس بوٹس ہیں اور مستقبل میں ان کی تعداد مزید کمی ہوگی۔

 مالکان کا کہنا ہے کہ ہاؤس بوٹ کی تعداد میں کمی اور انکی خستہ حالی میں حکومت قصوروار ہے۔

 ساؤتھ ایشین وائر کے مطابق دیودار کی لکڑی سے تعمیر کیے جانے والے ہاؤس بوٹ کو مکمل کرنے میں ایک برس کے قریب وقت درکار ہوتا ہے۔ اس کی خوبصورتی میں چار چاند لگانے کے لیے کشمیر کے ہنر مند فنکار اس پر طرح طرح کے نقوش تراشتے ہیں جس سے یہ ہاؤس بوٹ سیاحوں کے لیے باعث کشش بن جاتے ہیں۔

 ہاؤس بوٹ مالک یاسین تومان کا کہنا ہے کہ کئی برسوں سے حکومت ہاؤس بوٹ مالکان کو ڈل کی خوبصورتی اور اس کے ماحول کو خراب کرنے لیے ذمہ دار ٹھہرا رہی ہے جو ڈل جھیل میں مقیم افراد کے خلاف غلط پالیسیوں اور سوچ پر مبنی ہے۔

ساؤتھ ایشین وائر کے مطابق یاسین تومان نے مزید کہا کہ 1848 میں جب کشمیر میں سیاحت کا آغاز ہوا تو اسی دوران ہاؤس بوٹ انگریزوں کے لیے باعث کشش بنے۔انہوں نے کہا کہ ہاؤس بوٹ کشمیری فن اور ہنر کی ایک بہترین نمائش اور عکاس ہے جس سے کشمیر کی ثقافت اور تہذیب جھلکتی ہے۔