طلبہ یکجہتی مارچ۔۔۔رؤف لُنڈ

طلبہ یکجہتی مارچ ۔۔۔۔۔۔۔۔۔۔۔۔۔۔۔نہ شور، نہ مار دھاڑ ، نہ بد نظمی ، نہ آپا دھاپی ، نہ کسی ریڑھے رکشہ والے سے تکرار ، نہ کسی خاتون اور کسی بزرگ سے بدتمیزی ۔۔۔۔۔۔۔۔۔۔۔۔۔۔

ایک عزم کیساتھ، ایک وقار کیساتھ، ایک ولولے اور نظم و ضبط کے ساتھ اپنے والدین کا کرب ، اپنی بہنوں کی اذیت، اپنے بھائیوں کی ذلت، اپنے دوستوں کی اذیت اور اپنے طبقے کے دکھ اور درد کو مشترک احساس اور ادراک بنا کر صرف اور صرف قلم ، کتاب ، علم اور روشنی کے حقوق حاصل کرنے کی لگن۔۔۔۔۔

اپنے فیصلے اپنے ہاتھوں میں لینے کی جستجو کو رہنما بنا کر چلتے ھوئے میرے دیس کے نوجوان جن کو بچپن میں اپنے کندھوں پر کتابوں کی، لڑکپن میں پرائیویٹ اکیڈمیوں کے مہنگے ترین میرٹ کے حصول کی اور جوانی میں بے کار کی ڈکریوں کی کربلا کا سامنا رہتا ھے۔۔۔۔۔۔

یہ پر عزم نوجوان اب تک یہی دیکھتے چلے آئے ہیں مگر کچھ نہیں کر سکے کہ جب ان کا کوئی ساتھی کتاب نہ لے سکنے کی سکت کیوجہ اگلے دن اچانک کسی ھوٹل پر برتن مانجھتا ہوا نظر آتا ھے یا کسی ہوٹل کے استقبالیہ پر بیہودہ بھوکی نظروں کا سامنا کرتے ہوئے پائی جاتی ھے۔۔۔۔

ان کے ساتھیوں میں سے کئی کالج اور یونیورسٹی کے داخلے، سمسٹر، امتحانات کی عیاشی کے اسباب نہ رکھنے کی وجہ سے اسی کالج اور یونیورسٹی کے سامنے کسی مشین پہ فوٹو سٹیٹ کرتا ھوا، کسی بک شاپ میں سیلز مینی کرتا ھوا یا پھر کسی سینما ، تھیٹر یا کسی ائر کنڈیشن بس کے ٹکٹ گھر کی کرسی پہ مصنوعی مسکراہٹ سجا کے بیٹھی ہوتی ھے۔ اسی طرح یہ آئے روز یہ خبریں پڑھتے ہوئے پائے جاتے ہیں کہ ان کے فلاں کلاس فیلو لڑکے نے کسی کھمبے اور مینار سے کود کر، اور کسی ھم جماعت لڑکی نے نہر میں چھلانگ لگا کر یا گھر کی چاردیواری کے اندر زہریلی گولیاں پھانک کر اپنی زندگی کا خاتمہ کر لیا ھے۔۔۔۔۔۔۔۔۔

سڑکوں پہ مارچ کرتے ہوئے ان طلباء نے صرف یہی نہیں دیکھا ہوا۔ ان کے سامنے ایسے کربناک منظر بھی سامنے آئے ہیں کہ یہ جب کسی ہسپتال میں جاتے ہیں، کسی دفتر میں جاتے ہیں یا کسی سیکٹرئیٹ یا کسی ایوان کا چکر لگاتے ہیں تو وہاں ان کو ایسے کھلنڈروں، کاروں پہ اونچی آواز میں ڈیک چلا کر لڑکیوں پر آوازے کسنے والوں، پیسے کی ریل پیل اور عیاشی کی نت نئی محفلیں سجانے والوں کی اکثریت میں سے ویل چئرز گھماتے ہوئے وہ ڈاکٹرز، انجیئنرز، ڈپٹی کمشنرز، پولیس آفیسرز نظر آتے ہیں جو کبھی اچھے طالب علم نہیں ہوتے تھے۔ مگر ان پر اور ان کے والدین کے سروں پر زر کی دیوی کی شفقت کا سایہ قائم تھا۔۔۔۔۔۔۔۔۔

اب بھلا آپ بتائیں کہ کوئی بھی زندہ شخص اس قدر طبقاتی فرق دیکھے اور پھر احتجاج نہ کرے تو کیا وہ انسان کہلانے کا حقدار ھے؟ ۔۔۔۔۔۔۔۔۔۔۔

نہیں ناں ۔۔۔۔۔؟ مگر پھر یہ بھی ممکن نہیں کہ دکھ،اذیت، ذلت اور رسوائی جھیلنے والے ہر ستم سہتے ھوئے سوچنا بھی چھوڑ دیں۔۔۔ سڑک پہ مارچ کرتے ہوئے یہی وہ لوگ ہیں جو انسان کہلانے کے سزاوار ہیں۔۔۔۔ تبھی تو ان کی صرف یہی سوچ ھے کہ ایک کا دکھ، سب کا دکھ۔ ایک کا زخم سب کا زخم ۔۔۔۔ اسی لئے تو ان کے یہ نعرے ہیں کہ

مذہبی جنگ نہ ذاتی جنگ۔۔ طبقاتی جنگ طبقاتی جنگ
سرمایہ داری اور بیروزگاری کے خلاف جدوجہد تیز ھو
زندہ ہیں، زندہ ہیں ۔۔۔۔۔۔۔ میرے دیس کے طلباء زندہ ہیں
ھم دیس بچانے نکلے ہیں ۔۔۔۔۔۔۔۔۔۔۔۔۔ آؤ ھمارے ساتھ چلو
ھم اظہار بچانے نکلے ہیں ۔۔۔۔۔۔۔۔۔۔۔۔ آؤ ھمارے ساتھ چلو
ھم حقوق بچانے نکلے ہیں ۔۔۔۔۔۔۔۔۔۔۔ آؤ ھمارے ساتھ چلو
طبقاتی نظام تعلیم مردہ باد ۔۔۔۔۔۔۔۔۔۔۔۔ نجکاری مردہ باد
طلباء کی یونین سازی ۔۔۔۔۔۔۔۔۔۔۔۔۔۔۔۔۔۔۔ طلباء کا آئینی حق
کالی رات جاوے، جاوے ۔۔۔۔۔۔۔۔۔۔۔ سرخ سویرا آوے آوے
انقلاب انقلاب۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ سوشلسٹ انقلاب

About The Author

ویب ڈیسک

See author's posts