محبت وی طبقاتی تھی گئی اے؟۔۔۔حسن مرتضی

جیویں سائنس ترقی کیتی انسان اپݨی قوتاں نال دنیا وچ بہوں کجھ تخلیق کیتا ۔ سماج دے رشتے نویں طور تے منظم تھئے۔ نویں طبقے بݨیے۔ صنعتی انقلاب توں بعد۔ اشرافیہ کوں ہک اینجھی روبوٹ کلاس دی لوڑھ ہئی جیندی اپݨے مطابق ذہن سازی کرتے انھاں کوں کجھ مراعات ݙے کے اپݨے نال ، ریاستی قانون نال ملایا ونڄے جیندے اندروں روح نا ہووے ۔

او مٹی دے نا ہوون، او اوہو پاون جیویں پوایا ونجے ۔ اوہو کھاون جیویں جیویں کھوایا ونڄے ۔ اوکوں پسند کرن جیکوں پسند کرایا ونڄے۔ اوہو ݙیکھن جو ݙکھایا ونڄے۔ اوہوں پڑھن جو پڑھایا ونڄے ۔ ہک خاص محدود دائرے توں علاوہ انھاں دی نا کئی شناخت ہووے نا سنڄاݨ ہووے ۔

اے طبقہ ہمیشہ عوامی تحریکاں دے خلاف ریاست دا مہرہ بݨے ۔ انھاں دے لطیف جذبات اتے احساسات نا ہوون ۔ سرمایہ ای سبھ کجھ سمجھدن ۔

ہیندے برعکس ہک نیٹو یا تل وطنی انسان جیرھا اپݨی بھوئیں نال جڑت رکھدے۔ اوندے کنے سرمایہ گھٹ اے پر روحانی طور تے او مطمئن اے۔ اپݨی دھرتی دی آواز سݨدتے۔ بھوئیں نال ، پکھی نال ، بندے نال محبت کریندے ۔

بارش اوندے جذبات کو ودھارا ݙینݙی اے ۔ ریاست دے اہم ستونیں دی بھیڑی نال اوندا سروکار کینی۔ او ہمیشہ عوامی تحریکیں نال وی جڑ کھڑدے ۔ سادہ کپڑے پیندے۔ زندگی بدھل کینی ۔ خلوص نال بھریا ہویا اے ۔

ایں سبھ وچ محبت کتھاں رہ ویندی اے۔ شہریں اچ وسݨ آلے مخصوص طبقے اتے منطق کوں منݨ آلے لوک جیرھے لاشعور اچ اشرافیہ دے غلام بݨ گئے ہوندن ۔انھاں کیتے بھوئیں مر پووے کئی گالھ نہی۔ بندے دی محبت صرف جسمانی بھک تے اے ۔ پکھی ماس اے ۔ وݨ بالݨ کیتے ہن۔

محبت وی شاید طبقاتی تھی چکی اے۔ خالص محبت اج وی انھاں کولوں اے ۔ جیرھے ایں طبقے وچ نہی رلیے تے ہالی تک ہزار وریہاں پراݨی وسوں دے رنگ اچ رنگیے کھڑن۔ جنھاں کوں دریا نال محبت اے ۔ پکھی نال محبت اے ۔وݨ پیارے لگدن ۔ اپݨی مٹی وچ محنت نال رادھی گئی فصل سوہݨی لگدی اے۔

بندے دی محبت وچ ہوون تے صرف جسمانی بکھ  تک محدود نہیں تھیندے۔ جذباتی تھیندن ۔ وسوں دی لوک موسیقی تے جھمر کھیݙ سگدن ۔ اتے انھاں دے انھاں ساریاں پیاریاں تے وقت پووے تے لڑ مر وی سگدن ۔

محبت صرف ایں طبقے کول رہ گئی اے ۔ پر افسوس اے ۔ اے طبقہ وی ریاست دے پھیلاؤ نال مکدا ویندے۔

About The Author

ویب ڈیسک

See author's posts