سوہنڑے دوستو !!!
کارونجھر پتھر دا گلاب گھر اے ‘ گلابی تے زرد گریانئیٹ دا ایہ جبل دنیا دے عجائب وچوں جاگدے ‘ تھر پارکر دا شہر ننگر پارکر (سندھ) ایں جبل دے پیالے وچ تَردے ‘ بوڈے سر مسیت توں چوڑیو دے ماتا مندر تئیں ایں جبل دا درشن ازل ابد دیاں تاکڑیاں وچوں پندھ کریندے ‘ مور ایں جبل دے گلاب دا عاشق اے ‘ ایں جبل دی ہک ہک سِلھ چِتری ہوئی اے ‘ اینویں لگدے جہان دیاں کُل مخلوقاں جیڑھیاں گزر گِن, اج موجود ہِن یا کَل آونڑن اِتھاں چِترل ہِن ‘ کارونجھر حیاتی دا عجائب گھر اے ‘ کارونجھر سندھ وادی دی مہا ڈِکھالی اے جیندے اگوں کَچھ دا رِنڑ دریاواں دی جھال ڈیندے
ایہ جبل اوکھ وچ اے ‘ ساہوکار دی ہوس ایندے گلابی گرینائیٹ کوں کپیندی تے وچیندے پئی اے ‘ ایہ جبل چوری پیا تھیندے ‘ ایں جبل دا گلاب گرنائیٹ دے کارخانیاں وچوں حاکمیں دے محلیں دا فرش پیا بنڑدے ‘ سندھ دے شاعر, ادیب, سوجھوان ‘ وکیل, صحافی , جیوت دوست ایں جبل دی حیاتی سانگے لڑائی پئے لڑدن ‘ سندھ ایں جبل دی کٹائی تے ڈھوائی تے احتجاج پیا کریندے, سوہنڑے دوستو ! سندھ دا ساتھ ڈیوو
رفعت عباس
10 نومبر ملتان
About The Author
Bahot aalla