”دھرنا، دھرنے آلے تے ننواں سنڄراݨی فارمولا “۔۔۔مشتاق گاڈی

دھرنا قائم تھی ڳئے۔ ہزراں دا مجمع اسلام آباد دی شاہ رڳ، "کشمیر ہائی وے”، دی ادھل وچ ستھیج ڳئے۔ ہک اینجھی شاہراہ جیڑھی اسلام آباد دی ہر وݙے ایوینو نال جُڑدی ہے۔ اے کشمیر شاہراہ ننویں ائیر پورٹ دا رستہ وی ہے۔ ایں جاہ دیاں ٻیاں کئی سہولتاں ہن۔ ڈی چوک جہیں کلہی تے سیکورٹی نال لیس جاہ دے مقابلے وچ دھرنے دے مقام دے اِݙوں اُݙوں کئی وݙیاں مارکیٹاں ہن۔ (جیویں جو پشاور موڑ، کراچی کمپنی، آئی این ٹی سنٹر وغیرہ) جتھوں ہر شے مل ویندی ہے۔ دھرنے دے پیلھے ݙینہہ کنیں اتھاں ریڑھی آلئیں دی بہار ہے جتھاں ٹانگری، ڈوڈھا، چاہ، چݨے تے بھنی مکئی دے داݨے ہر پاسیوں ملدے پئین۔

دھرنے دے مجمع دیاں کُجھ نویکلی خاصیتاں ہن۔ ایندی وݙی اکثریت، اسی فیصد کنیں ودھ، مدرسیں دے غریب پختون مولیں دی ہے۔ اسلام آباد وچ وݙی پختون آبادی ہے جیڑھی انہیں دی میزبانی کرݨ جوڳی ہے۔ ہر ہک دا اسلام آباد وچ کئی نہ کئی ڄاݨوں سُنڄاݨوں رہندے۔ انہیں کیتے ہر سیکٹر وچ ڈھڳ مسیتاں ہن۔ ایں کارݨ کل شام کنیں ای دھرنے دا مجمع اسلام آباد کھنڈݨ پُنڈݨ لڳ پئے۔

مجمع کوں ݙیکھ اینویں لڳدے جو اے اینجھے لوک ہن جنہیں گھر گرہست دا جیوݨ وݙی مُدت کنیں چھوڑا ہوئے۔ تببلیغی تجربے دی بھٹی کنیں نکھتے ہوئے لوک ۔ گیس دا سلینڈر، تھاں تھپے، سلیپنگ بیگ انہیں دے نال ہوندن۔ وݙے سوکھ نال ہک ٹولی بݨا امیر دے تابع رہندن۔ اے مجمع غربت تے جہالت دا خطرناک مکسچر ہے۔ اے دھرنا جتھاں انہیں کیتے مشنری کم ہے اُتھاں جڳ مڳاندے، فیشنی تریمتیں تے آسودگی تے رڄ نال بھرے اسلام آباد دی سیر تے نظارہ اُتر ہے۔

مولانا فضل الرحمن تے جے یو آئی دی لیڈرشپ دے جمہوریت تے آئین دے بھاشن کنیں ہٹ کنیں ایں مجمع دی اکثریت اسلام دے خاص مذہبی جہادی جذبے نال سرشار لڳدی ہے۔ ختم نبوت دے ایجنڈے کنیں گھن یہودوہنود دے سازشیں دا مقابلہ کرݨ انہیں دی ہر ویلھے دی چیتاکاری ہے۔

مُکدی مکاؤں۔ مولانا تے مولویں دا دھرنا قا ئم تھی ڳئے۔ حکومت ایں پیلھے راؤنڈ وچ دھرنے کوں مُڑ مُنڈھوں روکݨ دا آپشن ہتھوں ونڄا چُکی ہے۔ وزیر اعظم کوں ݙو ڈٰینہہ دا الٹی میٹم وی آ چُکے۔ مولانا کوں سیاسی اپوزیشن دی اڄاں تائیں ٹیک ملی ہوئی ہے۔ توپیں دا رُخ ہولیں ہولیں عمران خان کنیں سلیکٹرز دو تھیندا ویندے۔

اڳوں کیا تھیسی؟ ایں کھیݙ دے پچھوں کیڑھے اصلی کھݙاری ہن؟ اُنہیں دا نشانہ کیا ہے؟ اے سبھ ڳالھیں ہولیں ہولیں ویلھے نال کُھل ویسن۔ اڄاں حکومت کنیں ترائے رستے ہن۔ یا او مذکرات دی میز اُتیں آوے جیندا نہ اوندا مزاج ہے نہ ایندی صلاحیت لڳدی ہے۔ ݙوجھا آپشن دھرنے دی اپݨی جاہ کنیں ڈٰی چوک دی پاسیوں منتقلی کوں ریاستی طاقت نال روکݨ ہے۔ اے کم پولیس دے وَس دا نئیں۔ رینجرز تے فوج مُتوں ایتلا وݙا مجمع روکݨ اوکھا ہوسی۔ خون خرابہ تھیسی تے اوندے اپݨے نتیجے نکلسن۔

تریجھا رستہ اے ہے جو دھرنے دی ڈی چوک منتقلی کہیں خون خرابے مُتوں تھیوݨ ݙویجے تے اپوزیشن نال مذاکرات جاری رکھیجن۔ پارلیمنٹ دا اجلاس سݙا ونڄے۔ ہک درمیانی رستہ ڳولا ونڄے۔ ہک اینجھا درمیانی رستہ جیڑھا الیکشن کنیں پیلھوں آصف علی زرداری ” سنڄراݨی فارمولے” دی صورت پیش کیتا۔ ہک وݙا سوال اے ہوسی جو اڄ ایں "سنڄراݨی فارمولے” دی کیا شکل ہووے؟ پر اینجھے کئی فارمولے دی ضمانت ݙیوݨ آلیاں ریاستی ( تے بیرونی) طاقتاں جے آپ ونڈیاں ہوئن تے اے دھرنا آپ اُنہیں دی ایں ونڈ تے بھیڑی دی نشانی ہن تاں وت لڳدے لما اُبھا، پار اروار ہک تھی کنیں رَہسن۔

About The Author

dailyswail

See author's posts