آزادی مارچ تے لیفٹ دی سیاست۔۔۔حسن مرتضی

مولانا فضل الرحمان دے آزادی مارچ اچ لیفٹ دی سیاست دیاں علمبردار پیپلز پارٹی اتے عوامی نیشنل پارٹی دی شرکت نال کجھ لوکاں طعنے ڈتے جو اے سیاست سیکولر جماعتاں دا شیوہ نہی ۔ ہک ملاں پچھوں کھڑݨ ٹھیک نہیں ۔
پہلی گالھ جو دل نال تے میں وی ایہو سوچینداں جو لولی لنگڑی جمہوریت چلے پئی تے ٹھیک ہوسی. ہک رجیم دے مدت پوری کیتے بغیر ونجݨ نال ول شئیت اگلی پارٹی وی مدت پوری نا کرسگے ۔
خیر ایں توں پہلو اے ڈیکھݨ دی لوڑھ اے جو لیفٹ رائٹ دیاں سیاسی جماعتاں کیا ہک بئے نال رل تے ہک بئے کوں من گھدے نے یا ول منافقت اے۔
پہلے گالھ جو سیاسی جماعتاں جمہوریت اچ ہک بئے دے وجود کوں منݨ دیاں پابند ہوندین ۔ جے پیپلز پارٹی اتے اے این پی وجود رکھدی اے تے ہیندی مخالفت اچ قدامت پرست وی ہن جنھاں وچ بے شک جمیعت علمائے اسلام کوں شامل کر گھنو۔
لیکن سیاسی جماعتاں دی جمہوری لڑاند اوں ویہلے تھیندی اے جیہلے سیاست آزاد ہووے۔ بدقسمتی نال پاکستان دی سیاست تے ضیا دے جبر دے بعد جندرے لاتے گئین. لیفٹ رائٹ کنوں وڈی ہک شے جمہور کوں منݨ دی اے۔ تے جمہور کوں منݨ آلیاں جماعتاں ہمیش ڈکٹیٹرشپ نال ، غیر منتخت سر تے سوار اسٹیبلشمنٹ نال لڑاند کیتی آندین ۔
اے آزادی مارچ وی اوندی کڑی اے۔ جمہور کوں منݨ آلی جماعت سانجھ کرتے ٹرسی ۔ ایم آر ڈی ایندی مثال اے۔ جتھاں اینٹی بھٹو تے بھٹو دی پارٹی ڈوہاں رل تے وی جدوجہد کیتی ۔
اج لیفٹ رائٹ کنے ہک وڈی ونڈ جمہوری اتے غیر جمہوری جماعتاں دی تھئی کھڑی اے. جتھاں جمہور تے یقین رکھݨ والے مذہبی ، سیکولر کٹھے ان تے ڈوجھے پاسے وی ایویں اے نام نہاد سیکولر ایم کیو ایم کنے گھن ایکسٹریم رائٹ تے راہ حق پارٹی وی غیر جمہوری قوتاں نال کھڑی اے۔
ہک واری جمہور تے لگے جندرے کھل ونجن ول لیفٹ دی جدوجہد جمہور اچ کریسوں۔ اتے ڈوجھی گالھ قدامت پرست اسٹیبلشمنٹ نال ٹھیک لڑاند وی ایہے قدامت پرست ای کرسگدن۔ لوہے کوں لوہا کپیسی

dailyswail

See author's posts