اندروں دا انسان۔۔۔۔

حسن مرتضی

تہذیباں نے ترقی دا میک اپ کیتا۔ انسان نے چندر دیوتا کوں پیریں ہیٹھ لتاڑیا ۔ بیماریاں دے بدروحاں کوں بدھل کیتا۔

دھرتی کوں برباد کرنڑ والے ایٹم بم ہائیڈروجن بم بݨائے۔ زرعی انقلاب تے جاگیرداری دے پٹے کنے جان چھڑائی تے ول صنعتی انقلاب تے نیولبرل اکانومی دا کیپٹلسٹ دروہ انسانیت تے کیتا گیا ۔

پر ہک شے شئیت ہالی وی انسان فتح نئیں کرسگیا او ہوندے اندر دا انسان اے۔

اے وی سچ اے جو سرمایہ داری نظام نے مذہب دے ٹیکے ٹھوک تے او اندر دے انسان کوں ادھ مویا تے مویا کیتے ہا ول وی کجھ بندیاں اچ او جیندا رہ ویندے ۔

سائیکالوجی اوندے مختلف روپ کوں بیماریاں دے ناں ݙے تے نشہ آور گولیاں کھوا اوکوں سماونڑ دا اہر کریندی تے ہے پر اوندی چارہ گری اوندی بھال نئیں کرسگدی۔

جیندے جیندے اندر وی کئی انسان جیندا پئے او بندہ شئیت اپݨے آپ نال جنگ اچ ہوندے ۔ ساݙا ہووݨ اوکوں بے معنی لگدے بئے انسان دا درد او محسوس کریندے اوکوں خدائی نال غرض کینی او بندے اوندے خدا ان ۔

لیکن اندر دے انسان کوں ہک بیماری لاحق اے شئیت اے کوئی مسیحا دی تلاش اچ اے ۔ کوئی اینجھا جیرھا کھلے رووے ہیکوں رواوے کھلاوے ۔

انساناں دے وکھرے مزاج ہوونڑ دی وجہ نال آخر مسیحا ای کتھائیں نا کتھائیں ایندے کنے وکھرا تھی تے سوچیندے ول ہک اندھا کھوہ اے ۔

اداسی دا جیندے وچ ونج تے کوئی کوئی ہی ول سگدے ولدے تے اوندے کنے اداسی دی جھا مونجھ ہوندی اے ۔ جیہلے اندر دا انسان مونجھا تھیوے تے ول او اپݨی معراج تے ہوندے ۔

اوکوں کئی مسیحا دی لوڑھ کینی اوندا والی وارث نا ہوندیں وی اوندے رلے ۔ ول اتھاؤ او تخلیق جنم گھندی اے جیرھی لوظیں اچ رلے تے شاعری جے پتھر تے پووے تے مورتی جے کینوس تے پووے تے مصوری ۔

ہیں مقام تے شئیت اوکوں جھلݨ کیتے انسان سگریٹ شراب دی مدد گھندے ۔ جے گھن سگے تے ۔ خیر ہیندے ایں روپ کوں میں وی نئیں سمجھ سگیا۔ جے کوئی سمجھے تے بولے ۔

About The Author

ویب ڈیسک

See author's posts