مُول نہ وِسرِم

جگدیش چندر بترا

پہلا درشن

اڄ ارشاد سئیں ارشاد کیتے جو اساں سرائیکی لوک جیڑھے انوی سو سنتالی دی بھڳدڑ وچ اپݨا سرائیکی وسیب چھوڑ کے واہگہ بارڈر کراس کر کے ہندوستان دے ہیں پاسے اَن وسیے ہیں ہُنیں دے متعلق تے اپݨیاں یاداں جیڑھیاں سینے وچ لُکائی ودے ہو ہُنیں دا کݙاہیں تساں کجھ لکھو ۔میں ہُنیں کوں آمین آکھ کے تے لکھݨ ٻہہ تھیاں ۔پہلی ڳالھ پہلے خواجہ غلام فرید صاحب فرمیندن :

جہی چوٹ فرید کوں لایو، لا ݙکھلائیو ، مُول نہ وسرم تیݙیاں سانول ناز نگاہواں

ایہو قول ایں مضمون دا موضوع ہے سئیں جیوے کن اکھین ، دماغ کھول کے پڑھو سݨو تے کہیں جگہ تے چھاپ ک تے محفوظ کر گھنو۔

چار اکتوبر انوی سو اٹھتری سئیں دلیپ چندبترا تے سئیݨ گنیشی بائی دے گھر ہک لال ڄمیا جیندا نام ہُنیں جگدیش چندر بترا رکھیا ۔ لالہ دلیپ چند تے ہُنیں دے والد سئیں مانگھا مل تے ݙاݙا سئیں نارائن مل غضنفرگڑھ ضلع مظفر گڑھ وچ ہوں ݙیہنوار سب نال خوشیاں ونڈیاں۔

سارا ہندوستان ہوں ڄہاڑے دوسہرہ منیندا پیا ہئی۔ جگدیش دیاں ݙو وݙیاں بھیݨیں سیتا بائی تے کُنتی بائی اپݨے لالہ سئیں نال دوسہرہ مناوݨ کیتے خان گڑھ گیاں ہوئیاں ہن۔ہُوں ڄہاڑے بھڳوان رام لنکا دے راجہ راوݨ کوں مار کے آدھرم کوں مٹا کے تے دھرم ، ظلم کوں مٹا کے امن قائم کیتا ہئی۔

راوݨ دا پُتلا ہوں ڄہاڑے سارے ہندوستان وچ پھوکیا ڳیا ہئی۔خان گڑھ دے نوابزادہ نصراللہ خان تے چودھری سدھو رام گٹ لالہ دلیپ چند کوں لکھ ودھائیاں ݙتیاں۔ سارے غضنفرگڑھ دے لوک ہندو مسلمان رل کے خوشیاں ونڈائیاں ۔مولوی ظہورالدین اعوان ، محمد کلو خان پٹھاݨ ، ڄال آلے دے پیر سئیں سید شاہ ، ڈیڈھے لال دے پیر وی دعاواں پڑھیاں۔

غضنفرگڑھ دی دھند تے جوتاں جلائیاں ڳیاں۔مندر ، گردوارہ تے مسیت تے ونڄ کے سب نے ݙیوے ٻالیے تے لݙو تے مٹھائی ونڈی۔ݙوجھی ݙیہنوار ڈھول ڈھمکے وڄے جھمر پئی، تے لوک نچیے، ہیجڑے وی ٹانگے تے ٻہہ کے پُڄ ڳئے دعائیں ݙتیاں۔ݙاݙا سئیں نارائن مل سب کوں اپݨی ہستی دے مطابق خوش کیتا۔پیسے ونڈن ،سیرا ، ݙٓالہ ، ڳُڑ ، چُوری ، ناریل ، بدام ، مسری ونڈی۔

چلیہا گزریا تے اُتر ریم توں مہمان گنیس داس نند ، لال ورمانی اُٹھ کچاوہ گھن کے آ ڳئے تے جگدیش تے ہُوندی ماء بھیݨیں کوں اپݨے گھر گھن گئے ۔ سخی سرور ونڄ کے مامیاں جڳو(جگدیش) دی جھنڈ لہوائی ، مزار تے چادر چڑھائی ۔ اُچ شریف پنجند دی وساخی دے میلے تے جڳو کوں پاݨی دے وچ ڈبکی (ٹُٻی )لوائی۔جڳو اپݨیں گھوڑے، ڳنویں منجھیں تے بدخاں نال وݙا تھیا ۔

غضنفرگڑھ دی دُھند ہوندی روز اپݨے یاریں دوستیں نال ہک مقدس تیرتھ ،ہیں کنیں تے سریں دی ٻیڑی تے ہُونکوں روز ٻلہا کے پاݨی دی سیر ، تیراکی کرݨ دا شوق پے ڳیا۔پٻݨ دیاں ٹکیاں پٻݨ دے پُھل تے بھے ہوندے واسطے کائنات دیاں سبھ توں چنڳیاں شئیاں ہن۔

جڳو پنڄ سالاں دا ہئی جیڑھے ویلے ہونکوں گورنمنٹ پرائمری سکول غضنفرگڑھ انوی سو ترتالی وچ داخل کروا ݙتا ڳیا۔ مولوی ظہور الدین جڳو کوں پہلا لوظ "الف” پڑھایاتے لکھݨ سِکھایا۔

جاری ہے۔۔۔۔۔۔

About The Author

dailyswail

See author's posts