میڈی وستی، (تریجھی لڑی)۔۔عبدالباسط بھٹی

بے شک رتاں رب رحمان دی رحمت ہن انھاں نال جمل جہان وسدا پے، ساݙی وستی جنت دا ٹوٹاہئ وستی اچ ہک کوٹھا وی نہ ہا نہ کچا نہ پکا، ساریاں سالھیں ہن کھلے کھلے اڳوڑ تے ٻاہروں،، چویڑے،، دیاں کندھیاں، کندھیاں نہ ڈھیر اچیاں نہ جھکیاں بندہ کندھی،، ڳاتر،، جھات کر سڳدا ہا کندھیاں دے در ہن دروازے نہ ہن، ساری وستی ݙوں،، کھوئیاں،، ہن یا نیڑے ملک رحیمݨ دا کھوہ جتھوں نینگریں ہک گھڑا،، سر،، تے ݙوجھا،، ڈھاک،، تے چیندیاں ہن، نینگریں جیڑھیلے کھوہ دے،، کھاݙے،، تے آون ہا تاں ہر کوئ اولا کر ویندا،

سالھ در سالھ ہک ݙوجھے نال ڳنڈھی ہوئ، ادھ اچ نکی سکی کندھ جتھوں،، ڳچی،، اچی کر حق ہمسائیاں بھاہ ٻالݨ کیتے ہک،، انگارا،، منگ گھندیاں ھن، رل وسدیاں انگارا کیہں،، ٹھکری،، یا،، تھاپی،، تے رکھ ݙیندیاں ہن،

کھوئ دے نال ہک،، سکاوا،، ہا جیندے اچ ݙوں،، ٻوکے،، پاݨی دے سٹ پاݨی وھا گھندے ہاسے مرد اکثر کھوہ تے ونج اشنان کریندے ہن جݙاں جو تریمتاں ویڑھے دی چنڈ بݨی،، گھٹی،، اچ ݙوں دلے بھر رکھیندیاں ھن، تے کم کار توں واندیاں تھی سر دھون ہا

کھوئ دے نال ہک وݙی ساری چاٹی. پی ہوندی ہئ، جتھاں ٻہہ تھاں تھپے دھویندیاں ہن، جس دے تھانواں کوں سؤا تے ریت نال،، کچیندیاں،، ھن تاں تھاں تھپے چٹے کھیر تھی ویندے ہن، کھیر دے،، ݙوھاوے،، مٹیاں مندھݨیاں تے،، ݙولے،، وی دھویج،.منجیج

چلہاݨے نال کھڑے،، نیہلے،، تے ٹنگیج ونجن ہا،

چیتر رت رتاں دی ماء ہے انویں تاں ہر رت رب دی نشانی ہے زندگی دا سارا نظام انھاں رتاں دے اندروں ٻاہروں،، بھنودے،

اساں سویرے سویرے اٹھی کھوہ تے ویندے ہاسے رستے اچ،، ماتے رام،، دی بغوچی اچ لگیے کنواں تے نبؤیاں دے ٻور دی خوشبو پیر جھل گھندی ہئ،

جینویں جینویں چیتر اڳونہاں ٹردا کݨکیں رنگ وٹیندیاں نور حضور دے ویلے ساݙے کناں پہلا آلا ککڑاں دیاں بانگاں دا آندا ول وستی دی مسیت اچوں مولوی اللہ وساے جھانبے دی بانگ کناں اچ رس گھولیندی، ول کݨکیں اچوں تیتراں تی،، ترھاک،، تے ٻٹیریاں دی،، ترہاک،، سݨیندی،. کتھائیں کیکر تے ٻیٹھے،، ڳیرے،،. دی،، گھوک،، آندی، سب توں پہلے پہلے،، کاں،، ساݙے ویڑھے آ لہندے کؤ کؤ کر برداری کوں کٹھا چاء کریندے،، تݨاں،، تے ٻدھے،، چھکے،، اچ پئ پروہتی بھاڄی کوں،، جنجاں،، مریندے، زری پرکھرا تھیندا تاں ٹالھیاں تے موجود پکھی چلکار کریندے،،، ہیڑھے،، ساݙے ویڑھے لہہ آندے،

باقی ول

5اپریل 2024ء