میڈی وستی، (پہلی لڑی)۔۔عبدالباسط بھٹی

اسلام علیکم و رحمت اللہ

مارکا

اساں وستیاں، ٹھٹیاں، ڳڑھیاں، ڳوٹھاں دے لوک سوکھ ساول دی ڳول اچ، پیؤ ماء، بھݨیں بھرا،. سنگتی ساتھی، وسدیاں جھوکاں چھوڑ، سوھݨے اڳوال دی خاطر شہراں دا پندھ کریندے ہیں

شہر انساناں دے جھر ہن، آپ تڑاپی اے، سمجھ نی آندی لوک کیݙے آندے پن، کیݙے ویندے پن، ہر بندہ موت تے گھوڑے تے سوارہے، آبادی دا آسیب شہر بزاراں اچوں نکل پہلے ڳلیاں محلیاں تے ھݨ وستیاں ٹھٹیاں کوں کھادی ویندے

سیں میݙا

چیتر رت آپݨے جوبن. تے ہے گھر، گھر گلزاری ہے میں ایں ویلے ملتان شہر دی ہک جدید کالونی،، ڈریم گارڈن،، اچ ٻیٹھاں، اسلم خاں گورماݨی دے،، انڈس پلازے،، دے کجھ اڳوں ہک گراسی پلاٹ ہے،

میں روز دفتر ویندے ہوے اتھاں گھنٹہ کھن ضرور ٻاہنداں، وݙا سارا پلاٹ ہے، تلا ساوا کچوچ تھیا پے، سانبھ سنبھال ایں جینویں کیہں کارپٹ وچھا رکھی ہووے، جتھاں میں ٻیٹھاں میݙے سامݨے،، انار،، رتے پھلاں نال لݙیے پن، نال،، ـگرد نلی،، دیاں،، نلیاں،، لڑکیاکھڑن، ہک پاسوں بلبلیں دا الا آندا پے ݙوجھے پاسوں لالیاں دی کؤ ہے، سامݨے انار دے ٻوٹے تے،، پھدی چیڑی،، آپݨے دلبر نال لاݙ ڳوݙ کریندی ٻیٹھی ہے، ہک لحظہ نی ٻاہندی، ہک لڑی توں اݙ ݙوجھی تے ݙوجھی توں تریجھی،

پلاٹ دے آسوں پاسوں مل مہانگیاں کوٹھیاں ھن

مارکا

ایجھیں رت اچ ھاں ماندا تھیندے، دیس اٻاݨا یاد آندے وستی، وستی وسدے سنگتی، حق ھمساے یاد آندن لیکن ضرورتاں پیریں،، ݙاوݨ،، گھتیے ہوے ھن

سیں میݙا

اللہ دے واروں خیر تاں کل کنوں

،، میݙی وستی، دے ناں تے پچھوال کوں یاد کریندے راہسوں کیوں جو ساݙے خاب، عزاب سانجھے ہن،

مارکا

تساں بے شک سوکھ ساول دے پہاڑ تے چڑھ ونجؤ، وستی دا غستان ہر ویلے یاد کریندے

،، باقی کل،،

،، جمل جہان دی خیر،،

،، پہلی پوڑی،،. تراے اپریل 2024ء