سائنس کنوں انکاری تھیوݨ پچھڑودا ونڄݨ ہے|| مشتاق گاڈی

سائنس آپ تاں ہک اُتم فیلڈ ہے، ایں کنوں انکاری تھیوݨ پچھڑودا ونڄݨ ہے۔

سائنس نال مسئلہ اوں ویلھے ودھیک جڑدے جئیں ویلھے کارپوریٹ کیپٹلسٹ مفادات سائنس کوں اپݨے مطلب کیتے اولڑے ڈھنگ وچ ورتیندن۔ ایں اولڑے ورتارے دیاں ڈھڳ مثالاں ہن۔ ہݨ اڄ میں پڑھدا پیا ہم جو کیویں "سیروٹونین” دے گھٹ ہووݨ دا ڈپریشن نال کوئی سانگا نئیں جݙاں جو ایں سانگے دوائیں دے کمپنیں ارباں روپے دیاں اینٹی ڈپریشن میڈیسن ویچ کنیں کھوائی رکھی ہے۔ ایہو حال ” اینٹی سائیکوٹکس میڈیسن” دا ہے۔ ڈھڳ سائنٹیفیک سٹیڈیز ہن جیڑھاں ݙسیندن جو اے ساݙے بھیڄے کوں سکڑیندن، ساکوں بے ڈھنگا موٹا کریندن، شوگر دا کارݨ بݨدن، وغیرہ وغیرہ۔ پر ݙٹھا ڳئے جو انہیں صٹڈیز کوں کارپوریٹ مفادات سانگے ہک پاسیوں رکھ ݙتا ویندے۔
ایہو حال دریاویں، ڈیمز تے ایکالوجی دے سبجیکٹ دا ہے۔ ڈیمز دی مخالفت یا ایندے مَندے کارݨ سانگے ایکالوجی، ہایئڈرولوجی تے ٻئے کئی ڈسپلن دیاں سٹیڈیز ہن۔ ایہے سٹیڈیز ہن جنہیں دے کارݨ ہݨ "ریور ایکالوجی” دی ودھیک سمجھ بوجھ ہے۔ پر ݙٹھا ڳئے جو میڈیسن وانگوں انہیں سٹیڈیز کوں وی "کارپوریٹ انٹرسٹ” سانگے ہک پاسیوں کر سٹیا ویندے۔
سائنس دا سچ مستقل تے مطلق تاں نئیں ہوندا پر ہک خاص ویلھے، جݙاں اے سوسائٹی تے کاپوریٹ اکنامکس نال جڑدی اے، تاں ایندے سچ کوں مستقل تے مطلق بݨا کنیں تھوپ ݙتا ویندے۔ دلچسپ ڳالھ ہے جو سائنس دے ایں سانگے اپݨے اُپٹھ سچ یا رزلٹ کوں نال نال لکایا تے دٻایا ویندے۔

جیویں سائنس نال مخالفت چنڳی نئیں، اینویں سائنس دے "تھوڑ۔ کمی بیشی” یا ایندے سوسائٹی نال اولڑے سانگے کنیں اَکھ نوٹی کرݨ وی درست نئیں ہوندا۔ چھیکڑ وچ "کریٹیکل تھنک اِینگ” دی راہ ای اَن بچدی اے۔