شاعر ہمیشہ جنگ روکنے اور روٹی کی مساویانہ تقسیم کے لئے آتا ہے||رفعت عباس

ممتاز دانش ور تے کالم نگار سائیں رانا محبوب اختر دے "خبریں” اخبار وچ چھپندڑ ہک کالم وچوں میڈی ہک سرائیکی گفتگو دا ترجمہ جیڑھی میں بہاوالدین زکریا یونیورسٹی ملتان وچ خواجہ فرید ایوارڈ گھندیاں کیتی ہئی۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

"اس ایوارڈ کے لئے میں "سرائیکی ایریا سٹڈی سنٹر” اور "پارت” کا شکر گزار ہوں۔یہ ایوارڈ مجھے اپنی دھرتی نے دیا ہے۔یہ ان لوگوں کی طرف سے پذیرائی ہے جن کے لئے میں نے لکھا اور آواز اُٹھائی۔

میری دانست میں شاعری ہر بندے کے قریب سے ہو کر گزرتی ہے یا یوں سمجھیے کہ ہر بندہ شاعری کے قریب سے گزرتا ہے۔میں نے پانچ سات سال کی عمر میں شاعری کو پہلی بار دیکھا تھا۔یہ دریایے چناب کے مغربی کنارے پر ایک ریلوے اسٹیشن چناب ویسٹ بنک کے ایک ڈاک بنگلے میں پٹونیا البا کے پھولوں پر ایک زرد ٹراپیکل تتلی کی شکل میں دکھائی دی تھی۔میرے والد ریلویز میں ملازم تھے اور ڈاک بنگلے کے قریب ہمارا گھر تھا۔دوسری بار شاعری مجھے اپنے گھر کے سامنے پیپل کے نئے گلابی پتوں میں نظر آئی تھی۔میں یہ تو نہیں کہہ سکتا کہ شاعری اور میرا بچپن اکٹھے گزرا ہے لیکن یہ کہہ سکتا ہوں کہ میری جوانی اور اب بڑھاپا اس کے ساتھ گزر رہا ہے۔

اب ساٹھ سال سے کچھ زیادہ عمر میں ہم دونوں کسی کیفے میں اکٹھے کافی پی سکتے ہیں۔کسی دوست کو ملنے شہر کی کسی گلی میں جا سکتے ہیں۔نئے موسم میں کپڑوں کے رنگ پر متفق ہو سکتے ہیں۔ملتان سے کارونجھر تک پندرہ سو کلومیٹر کا سفر طے کر سکتے ہیں۔نئی جگہیں دیکھ اور نئے دوست بنا سکتے ہیں۔بارش بنا کر بارش کی لاریاں ان شہروں کو بھجوا سکتے ہیں جہاں بارش نہیں ہوتی!

شاعری نے سب سے پہلے میرے لئے وسیب کے سانجھے خوابوں اور سانجھی خودکلامی کا در کھولا تھا۔ہم دونوں ملتان کی گلیوں میں چلتے اور بیت بناتے تھے۔آج اس شاعری کے توسط سے میرے لئے اس قدیمی شہر ملتان سے پورے جہان کو مخاطب کرنے کا وقت ہے۔اب یہ شاعری میرے لیے کل عالم سے مکالمے کا مقام ہے۔سب قوموں کا احترام ہے۔ ان حملہ آوروں کی قبروں کے لیے بھی پھول ہیں جو ہماری دھرتی میں سوئے ہوئے ہیں۔

قومیں اپنے سفر میں مشکل وقت سے گزرتی ہیں۔ایک وقت ایسا آتا ہے کہ جیتی جاگتی دھرتی اپنی تنہائی،افسردگی اور رومان کے پاتال میں اتر جاتی ہے۔قومیں اپنی تاریخ،تہذیب اور قدامت کے رومانس کا شکار ہو جاتی ہیں۔ان کے لئے اپنے شہروں اور دریاؤں کے سامنے دنیا کے شہر اور دریا کم مایہ ہو جاتے ہیں۔اپنے مور کے سامنے قطب جنوبی کا پینگوئن اجنبی لگتا ہے۔اپنے دکھ اور محاصرے کے سامنے افریقہ کے لوگوں کا دکھ اور غلامی دور کی بات لگتی ہے۔میرے لیے شاعری اس پاتال سے نکلنے کا راستہ اور اپنی دھرتی کے ساتھ مل کر ہمسایہ اور دور بستی اقوام کے لیے نئی دید ہے۔مجھے پبلو نرودا، لورکا، ناظم حمکت یا محمود درویش کی شاعری اور دھرتی بھی ایسے ہی شاندار لگتی ہیں جیسے سرائیکی شاعر اور سرائیکی دھرتی۔میرے لیے شاہ لطیف،رحمان بابا،شاہ حسین،سچل سرمست،جام درک اور مست توکلی اتنے ہی عظیم ہیں جتنے خواجہ فرید اور مولوی لطف علی۔

شاعر ہمیشہ جنگ روکنے اور روٹی کی مساویانہ تقسیم کے لئے آتا ہے۔آج کی سرائیکی شاعری تمام دنیا کے لوگوں کے لئے محبت اور ان کی میز کے لئے تازہ ڈھوڈا(روٹی) ہے”۔