میڈیاں طارق پردے دار ہنجوں، بے پرد کریندی، کیا ملدی؟۔۔۔||فضیل اشرف قیصرانی

منگڑوٹھہ چونگی

اماں سئینڑ دی ہم سن ہک امڑی۔

دامانی چِٹا برقع، پلاسٹک آلی جتی تیں پٹھے رکشے دی سواری۔

ہک ہتھ اچ قرآن تیں ڈوجھے اچ ساوے طوطے دا پنجرہ۔

کُھڑدکیں دی وستی حنیف نال ونج ڈِٹھی ہاسے۔

حنیف آہدے پانڑی سنبھلنڑ نئیں ڈِتا، سویرے لوگیں مال دیاں لاشاں قلعیں نال بدھیاں چاتین۔

ایں واری لوگیں مال دیاں رسیاں کھول بے سینکاں چھوڑ ڈتے جو آپ بچوں نہ بچوں بے زبان دی آہ کہیاں چاؤں۔

ولا منگڑوٹھہ چونگی

شاید ہک نو بیاہتا جوڑا۔

زال پۓ موٹر سائیکل تیں نقل مکانی دے مراحل اچ۔

زال ڈاج آلے سوٹ کیس کوں تبھا مار پچھوں بیٹھی ہائ تیں جوان دی جھولی اچ موٹر سائیکل دی ٹینکی تیں گھر دا نکڑا پالتو کتا ۔

کھوسہ علاقے دی ڈاڈی بُڈھڑی پانڑی لاہنڑ توں بعد روز اوں جھاہ تیں آن باہندی اے جھتاں کڈاہیں ہک کھوٹے آلا گھر ہاسی۔ہنڑ اُتھاں کھوٹے دا نشان نئیں بچ آیا ۔

بھائ موڑ۔

طالبات نال بھریا رکشہ۔

ہر اکھ اشک بار۔ہر کن تیں فون تیں فون تیں تباہی دیاں اطلاعات۔آپ روندی طالبہ نال آلی طالبہ کوں بھلا کیا دلاسہ ڈِتا ہوسی جڈاں اطلاع آئ جو جھتاں کالج اچوں پڑھ ولی آندی ہاویں او گھر ہی ڈہے گۓ۔

مورخ نھسے اور نہ ہی تاریخ لکھسوں۔

نوحہ لکھسوں۔

دامان دا، کوہ سلیمان دا، بنی دا، بیٹ دا ۔

اور یاد رکھاۓ نوحہ چھڑا مذمت نئیں، نوحہ مزاحمت اے۔