حکایت:خاب دا قبیلہ||رفعت عباس

اوہ سارا ڈینہ شئیں دیاں فہرستاں بنیندن تے جیڑھی جیڑھی شے راتیں خاب وچ ہووے ڈھو آندن۔

اوہ جلدی سُم ویندن تے اپݨے اپݨے خاب وچ لوڑ دیاں شئیں گولیندن۔اوہ خاب وچوں دھمی دے رس کیک،ڈوپہراں دے لُونے تے شام دے مِھڑے پُوڑے بدھوا آندن۔اُنہاں دے خاب وچ میوے،کپڑے تے کریانے دیاں ہٹیاں وہندن تے سوڈا واٹر ملدے۔اوہ خاب وچوں سائیکلاں،کاراں تے ریل گاڈیاں چھک آندن۔انہاں کوں خاب وچوں چاء،کافی تے بسکٹاں دی چھوٹی وڈی پیکنگ مل ویندی۔تریمتیں خاب وچوں رنگلے کپڑے،گرگابیاں،ہار سنگھار تے شیشیاں پرفیوم دیاں گھندن تے چنیاں رنگویندن،خاب اندر واجے،قناتاں تے پرنیویاں کیتے گھوٹ کنواریں مل ویندن۔اوہ خاب وچوں متوں کہیں پیسے دے ٹکے دے ہک دنیا اپنے گوٹھیں بزاراں تئیں گھن آندن۔اوہ خاب وچ بئے شہریں تے ملکیں وچ پِھردن،پڑھدن تے پرنیج آندن۔

اُنہاں کوں خاب وچ ترے ڳالہیں دی ہَٹک ہے۔ (1) خاب وچوں اسلحہ نی گِھنݨاں(2)خاب وچ جنگ دی بھرتی نی کرنی (3) خاب دیاں شئیں نی ویچݨیاں۔