مٹھی :ڈائری دا پنا : 47||رفعت عباس

مٹھی شہر وچ دھمی دے سَت وج گئے ہَن ‘ فرسا رام میکوں گیسٹ ہاؤس لہا کے تقدیر دی سڑک تے رکشا گِھن کے ٹُر گیا ہا ‘ پندرہ منٹ تئیں خلیل کنبھار آ گیا ‘ گیسٹ ہاؤس توں باہر نکھتے ‘ بیگ کار وچ رکھیا تے تھر چوک جیندا ناں ہنڑ کشمیر چوک ہا نرہانڑ کیتے ہک ریستوران پُجیے ‘ خلیل ناشتے دا آڈر ڈتا ‘ اُتھاں اکثر آملیٹ تے پُراٹھے پئے بنڑدے ہَن ‘ اپنڑے کیتے رُکھی ہک روٹی دی ارداس کیتم :

رُکھی سُکھی کھا فریدا ٹھڈا پانڑی پی

ڈیکھ بیاں دیاں چوپڑیاں نہ ترساوی جی

1990 وچ میکوں ایہ گالھ عجیب لگدی ہئی تے لکھیومی :

کیوں رُکھی سُکھی کھا ٹروں کیوں ٹھڈا پانڑی پی

نت ڈیکھ بیاں دیاں چوپڑیاں کیوں نہ ترسے جی

مُد پچھوں ڈاکٹر آکھیا محض رُکھی روٹی کھاونڑی ہے ‘ بے شک بابا فرید توں سچا ہیئیں :

جِنہاں کھادیاں چوپڑیاں گَھنڑے سَہنڑ گے ڈُکھ

ہک ڈینہ پہلے کاسبو وچ ڈیو جی میگھواڑ دی نرہانڑ یاد آئی رنگلے میز پوش تے مکھنڑ ماکھی دے نال سَے پکوان ہَن پر میں باجھری دا ڈھوڈھا وچوں گول گھدا ہا جیں اُتے میگھواڑیں دی محبت وچ گاوا مکھنڑ لاونڑا پیا ہا ‘ بے شک بابا مسعود الدین فرید تو سچا ہیئیں ‘ رُکھی مانی تے نتار باجھوں چَݨے مٹھی دے نویں ڈینہ دی برکت ہَن ‘ ایں شہر دی روز ڈہاڑی حیاتی وچ اپنڑے پاندھیاں کیتے ہر طرح دے پکوان ہَن تے پاندھی اپنڑی من بھاندی نرہانڑ چُنڑ گھدی ہئی ” آملیٹ نہیں لو گے ” خلیل کنبھار پُچھیا ” نہیں ” ایں میز تے مِٹھی بارے بہوں ساریاں گالہیں ٹُریاں ” مٹھی 26 جنوری 2001 کوں کَچھ دے شہر بھوج وچوں اُٹھنڑ والے بھوئنب وچ تباہ تھی گیا ہا ‘ ایہ نواں مِٹھی ہا ‘ نویاں سلہاں تے سڑکاں دا مٹھی ‘ پہلا مٹھی پنج پنج سیری وڈیاں وڈیاں سلہاں نال بنڑیا ہا ‘ ادھا مٹھی کچا تے ادھا مٹھی پکا جتھاں ممتاز بھٹو دے ہک انٹرویو موجب بھٹو خاندان جونا گڑھ توں رتو دیرو سندھ دو آندیاں بہوں مُد ٹکیا ہا ‘ ایہ پرانڑے مٹھی دی جاہ نواں مٹھی ہا پر کھوہیاں وچ پانڑی اونویں کھاری ہا ‘ نوں کوٹ توں نہری پانڑی آندا ہا یا مِنرل واٹر وغیرہ دیاں بوتلاں وِکاندیاں ہَن ‘ اِنہاں وِکاؤ بوتلاں دے پانڑیاں نال شہریں دی تریہہ کِتھ لاہندی ہے ‘ شہریں دے کھیسے وچ انہاں پانڑی دیاں بوتلاں دے پیسے کتھ ہوندے ہِن ‘ کال کریہہ اونویں دی اونویں ہئی ‘ پرانڑے تے نویں مٹھی دیاں اکھیں اونویں دیاں اونویں ہَن ‘ لوک ول ول اسمان دو ڈیکھن دے ہیلک ہَن ‘ لوک مینہ دے نہ آونڑ توں ڈردے ہَن ‘ پرانڑے تے نویں مٹھی وچ ہک فرق آ گیا ہا ‘ فرسا رام دے پیو کول سائیکل ہئی ایہ جوان موٹر سائیکل رکشا چلیندا ہا ٰ میں اپنڑے خواب وچ پرانڑا مٹھی ڈیدھا ہا ‘ تہوں میکوں مٹھی دی سنجانڑ وچ تھوڑی دیر لگی ہئی”