مٹھی :ڈائری دا پنا : 44||رفعت عباس

ایہ مِٹھی دا ہک گیسٹ ہاؤس ہا ‘ خلیل کنبھار میڈے کیتے ہک پر سکون ٹھڈے کمرے دا اہر کریندا مِٹھی دی دیو مالا وچ گُم تھی گیا ہا ‘ ایہ اوندا شہر ہا ‘ اوندے ہک ہزار ہک سنگتی جاگدے پئے ہَن ‘ اوہ مِٹھی دی رات دا دیوانہ ہا ‘ گدی بِھٹ توں لاہندیاں اوں ڈیکھ گھدا ہا جو میڈیاں اکھیں وچ نندر ہے ‘ اوں میڈے خوابیں دی پاسداری کیتی تے میکوں مِٹھی دے ایں گیسٹ ہاؤس تئیں آدر ڈتا ‘ رات دے یارھاں پئے وجدے ہَن ‘ میں مٹھی وچ سمنڑا تے سجھ نکلنڑ توں پہلے مٹھی وچ جاگنڑا ہا ‘ ایہ اوہ بہوں وڈا آدر ہے جیڑھا کوئی شہر تہاکوں ڈیندے ‘ ایں جاہ تے ویلے دے بے انت امکان وچوں میں 19 تے 20 اپریل 2018 دی وِچلی رات مٹھی وچ ہم ‘ کہیں شہر وچ راتیں سُمنڑ تے دھمی جاگنڑ دے کنول تے خوشی دا اوہ پَبنڑ لاہندے جینکوں بس شہر شہر دی سیل کریندے پاندھی جانڑدن ‘ ایہ مٹھی ہئی دنیا جہان دا الادھا ہک شہر جیندے بارے خلیل کنبھار آکھیا ہا ” مِٹھی کائنات میں ایک ہی ہے ” چار چفیروں مِٹھی ہئی ‘ ساری رات بلدے ڈیویاں دا مٹھی ‘ گائکیں دا شاعریں دا تخلیق کاریں دا مٹھی ‘ ایہ مِٹھی ہا جتھاں آکاش توں السپراواں شاعریں کوں ملِنڑ سانگے لاہندیاں ہَن ‘ بھانویں مِٹھی پریاں تے جناں دا شہر ہا تے تھر واسی ایہا گالھ لُکیندے ہَن ‘ حیرت دے دروازیاں کندھاں تاکڑیاں ویڑھیاں دالاناں رسوئیاں دُھرکمریاں پوڑیاں چھتاں کوٹھیاں چوباریاں دا مٹھی ‘ ایہ حیرت دیاں گلیاں سڑکاں چوکاں دکاناں بزاراں ریستوراناں عمارتاں دا مٹھی ہا جیندے وچ بال بھانویں سم گئے ہَن تے مرد تریمتیں جوان بڈھڑے سمنڑ دا اہر پئے کریندے ہَن ‘ میں مٹھی دے لوکیں کیتے سُکھ صحت بارش تے ٹکر مانی دی دعا کیتی ‘ ایں ساری دیو مالا توں اگونہاں ایہ سَے مندراں تے مسیتاں دے ہوندیاں بارش کوں تانگھدا مٹھی ہا ‘ ایں سال مٹھی وچ رام تے رحیم ڈوہئیں رل تے وی مینہ دا کوئی اہر نہ سِتریا ہا ‘