میں سرائیکی آں پر قوم پرست نمہی || شاکا سانگھڑی

(شاکا سانگھڑی)

میں سرائیکی آں۔ میں ڄماندرو سرائیکی آں۔ میں سندھو دی مݨ تے کھیݙاں۔ کوہ سلیمان دے پاݨیاں دی ریٻڑ اَڄ وی میݙی اکھیں وچ پُݙ دی اے۔ ٻلپݨ وچ چیکݨی مٹی دے ݙاند، گھوڑے تے اُٹھ بݨائن ے ۔ راتیں کوں محلے وچ "کوکڑے چھپک جمعرات آئی ہے” کھیݙداں۔ دین پناہ دے کونجیں کوں پھیرے پیندا ݙ ٹھم۔ دمانی جھوک دی چُپ گڑپ وچ ݙوپہراں گُذرن۔ جواردے ڳنے چوپن، ٻاجھری دے آبھوں کھادن۔ ݙیلھے تے پیلھوں چُݨن۔ جُھریں ٻیریں کوں ہلائے تے پلو بھر بھر ٻیر کھادن۔ چیتر وساخ دے میلے ݙ ٹھم۔ چوݨے کھول تریمتیں کوں جاتر کھیݙدی ݙ ٹھی اے۔ اُٹھیں دے کچاویں وچ ٻہہ پندھ کیتن۔ لݙوں ؒلݙ ینداں ݙٹھم۔ چوݙ ہویں راتیں اچ وستی دے ٻاہروں دودے کھیݙن۔ ڳاہ ڳہیندے ݙٹھم۔ سیالے دے راتیں مائی ٻڈھڑی، کاں تے پُھلے دی کہاݨی سُݨی اے۔

میں ٻنہیں لکھاں تل وطنی. تے آدی واسی سرائیکیں وانگ ہک سرائیکی آں۔ پر میں قوم پرست نمہی۔

میں چھوٹا جیہاں ہم تاں میݙے گھر سرائیکی سرائیکی تھیندی ہئی۔ میݙا پیو فدا حسین گاݙی سرائیکی لوک سانجھ دا بانی صدر ہئی۔ اپݨے گھر پیو دی لائبریری میں کارل مارکس تے سگمنڈ فرائیڈ پڑھیا۔ تاریخ دیاں کتاباں پڑھم۔ خواجہ غلام فرید دیاں کافیاں سُݨیاں۔ سرائیکی لکھت پڑھت سکھی۔ سرائیکی کتاباں تے میگزین پڑھے۔ سرائیکی وچ خط پتر لکھے۔ بنگلہ کورائی تے مہرے آلے کن گھن رحیم یار خان تے دیرہ اسماعیل خان وچ تھیوݨ آلے سرائیکیں کٹھیں وچ شریک تھیم۔ ٻنہیں شاگردیں نال مل سرائیکی شاگرد سانجھ سانجھ بݨائی۔ سرائیکی شاگردیں دے رسالے چھاپے۔ ہر سرائیکی مہاندرے، شاعر تے لکھاری نال ملیم۔ سرائیکی میلے ٹھیلے وچ ونڄ جُھمر ماری۔ ضیاالحق دے مارشل لا تے اسلامی بنیاد پرستی دے خلاف جو کُجھ تھی سڳدا ہئی او کیتم۔ اپݨے پیو نال کئی واری ڳڑھی خدا بخش ونڄ شہید بھٹو دے مزار حاضریاں ݙ تم۔

میں سرائیکی آں پر میں قوم پرست نمی۔

میں ٻنہیں لکھاں سرائیکیں وانگ پڑھائی تے وت روزی روزگار کیتے بے وطن تھی اسلام آباد آیا۔ اتھاں سرائیکی کیتے جو میں کر سڳدا ہم کیتم۔ سُنڄاݨ جرنل چھاپے ۔ سرائیکی ٻولی دا آن لائن بلاگ بݨایا۔ سرائیکی سنگت نال رل کٹھ کیتے۔ سرائیکی شاگردیں نال ہر ویلھے دا سانگا رکھیا۔ جݙاں اٹھارہویں ترمیم پاس تھئی تاں پارلیمنٹ دے سامہݨے اساں جمہوریت دی حمایت کیتی تے سرائیکی سُنڄاݨ دا مطالبہ وی کیتا۔ سرائیکی صوبے دا سوال آیا تاں اسلام آباد تے وسیب دی سنگت نال مل کانفرنساں کیتاں، پریس کلب دے اڳوں مظاہرے کیتے۔ دول وڄائے، جُھمر ماری۔ جݙاں یوسف رضا گیلانی کوں چوہدری دی عدالت نااہل کیتا تاں اوندے خلاف سنگت نال رل احتجاج کیتا۔

میں سرائیکی آں پر قوم پرست نمہی۔

جݙاں ست تے چار قومی زبانیں دا بل سینیٹ وچ پیش تھیا تاں سرائیکی سنگت نال رل سینیٹرز نال لابی کیتی۔ ست زبانیں دے بل پیش کرݨ آلے سینیٹر کریم احمد خواجہ دی حوصلہ افزائی کیتی۔ سینیٹ دی قائمہ کمیٹی دے میٹنگز وچ شریک تھیم۔ سینیٹ دی قائمہ کمیٹی جݙاں عوامی سماعت کیتی تاں اوندے وچ سنگت نال رل چار زبانیں دے بل دی مخالفت کیتی۔ سرائیکی ٻولی دا کیس پیش کیتا۔

میں سرائیکی آں پر قوم پرست نمہی۔

میں قوم پرست نمہی۔ میں اُویں قوم پرست نمہی جیویں رابندرا ناتھ ٹیگورقوم پرست نہی۔ میں اُویں قوم پرست نمہی جیویں ٹالسٹائی قوم پرست نہی۔ میں اُویں قوم پرست نمہی جیویں مارٹن لوتھر کنگ قوم پرست نہی۔ میں اویں قوم پرست نمہی جیویں گاندھی قوم پرست نہی تے ہندو قوم پرستیں دے ہتھوں ماریا ڳیا۔ میں اویں قوم پرست نمہی جیویں نیلسن منڈیلا قوم پرست نہی۔ میں اُویں قوم پرست نمہی جیویں خواجہ غلام فرید قوم پرست نہی۔

میں سرائیکی آں۔ میں سُچیندا تے خواب ایں ٻولی وچ ݙیہدا۔ میݙے شریر تے اُوندی لوں لوں وچ ایں دھرتی دی مٹی، پاݨی، ہوا رچی وسی ہوئی اے۔ سرائیکی میݙا پریم ہے تے ہر پریم وانگوں ایندے وچ کوئی کرودھ نئیں۔ میݙا جے تائیں دم وچ دم ہے، سرائیکی دی سُنڄاݨ تے حق کیتے کم کریساں۔ پر میں قوم پرست نمہی۔

میں سرائیکی آں۔ میں لکھ لُڑھیندے سندھ ساگر دا ہک قطرہ آں۔ ۔ میں اننت روہی تے تھل دی ریت دا ہک ذرہ آں۔ میں دمان دی سلیمانی مٹی آں۔ میں اماں ٻولی دا اکھرشبد آں۔ میں نہم وی تاں ہم۔ میں نہ ہوساں تاں وی ہوساں۔

میں سرائیکی آں پر قوم پرست نمہی۔