جیالیں دیاں ݙو وَنکیاں ۔۔۔ گذری وہاݨی اچوں|| مشتاق گاڈی

اَسی دے ݙیاکے کنیں جݙاں دی سیاسی سُرت سُنڄاݨ پکڑی ہے تاں پیپلز پارٹی نال کئی رنگیں وچ ڳوڑھا سانگا ریہہ ڳئے۔ ایں سانگے دی بݨیاد تاں ضیا الحق دی کالی آمریت تے بھٹو سئیں دی پھاہی بݨی پر ایندے پچھوں کئی دور آئے۔ بے نظیر بھٹو سیݨ دی واپسی، پیپلز پارٹی دی ݙوجھی حکومت، نواز شریف تے آئی جے آئی، پیپلز پارٹی دی تریجھی حکومت، آصف علی زرداری دی ٻدھیج تے بندی، بے نظیر بھٹو دی جلاوطنی۔ اڳوں دا دور ٻہوں سارا حال اڄوکی نینگر پیڑھی دے سامہݨے ہے۔ ایں ساری مدت سرائیکی تے پیپلز پارٹی چھڑے ݙو سیاسی دڳ ریہے جنہیں تے ٹردیں اکثرا عمرانہہ گذر ڳئی۔

ایں گذری وہاݨی وچ جیالیں تے جیالا کلچر نال ڈھڳ واسطہ پوندا ریہا۔ ایں تجربے وچ اے ہک ݙونگھی سِکھت اے تھئی جو جیالیں دیاں ݙو ونکیاں ہوندن۔ ہک وَنکی انہیں جیالیں دی جیڑھے عام لوکائی کنیں اُبھردن، وَدھ پیچ دار نئیں ہوندے تے بھٹو صاحب نال لا غرض محبت راہیں ہک اپݨی دُھن تے لگن وچ رَہندن۔ ہر اجلاس، ہر جلسے، بھٹو صاحب دی ہر برسی وچ شریک تھیوݨ انہیں تے فرض ہوندا ہئی۔ اینجھے جیالے پیپلز پارٹی دے جیالا کلچر دی علامتی تجسیم بݨ ویندن۔ تونسے وچ ایندیاں کئی مثالاں ہن۔ ہک مثال میݙے چیتے وچ مٹی مہوئی دا ہک کھوسہ آندے۔ ضیا الحق دے چھیکڑی دور دی ڳالھ ہے۔ او مٹی مہوئی کنیں روز تونسے شاہر آونڄے ہا۔ اوندے ہتھیں پیپلز پارٹی دا جھنڈہ ہوندا ہئی۔ سارا ݙینہہ تونسے شاہر جھنڈے نال پھردا رہوݨ اوند کم ہوندا ہئی۔ کجھ دیر کیتے پیپلز پارٹی دے ضلعی صدر یونس خان دے دفتر ونڄ ٻہندا ہئی، کجھ دیر ہوٹل چاہ پیندا ہئی۔ او ٻہوں گھٹ ٻلیندا ہئی پر اوندی موجودگی نال اینویں کجھ لہراں نکلدیاں ہئین تے ہر پاسیوں کھنڈ ویندیاں ہئین۔ ایندے نال ملدے جلدے کجھ ٻئے وی اپݨی طرانح دے کریکٹر ہئین جیڑھے چلدے پھردے پیپلز پارٹی دی جیالے کلچر دی علامت ہئین۔

جیالیں دی ݙوجھی ونکی دی اکثریت مڈل کلاس دی فرسٹیڈ یوتھ ہوندی ہئی۔ لوکایت دے مزاج تے رکھ رکھاؤ کنیں عاری، پارٹی لیڈرشپ تے اوندے فیصلیں کنیں اوجھوٻاݨ تے گلہ گوئی تے جھیڑے کاری کیتے ہر دم تیار۔ انہیں کوں لڳدا ہئی جو انہیں متوں پارٹی ہک قدم اڳوں نئیں چل سڳدی۔ بے نظیر بھٹو نال براہ راست کمیونکیشن انہیں دا خواب ہوندا ہئی تے پارٹی دے عہدیاداریں تے پارٹی سٹرکچر دے خلاف ہر ویلہے بھیڑی وچ ہوندے ہئین ۔ او سمجھدے ہئین جو انہیں ساریں عہدیں دے اصل حقدار او ہن۔ وݙائی دے خبط وچ مبتلا ایں ونکی دے جیالیں دی ہک وݙی نشانی اوں ویلھے اے ہئی جو او آصف علی زرداری کوں سارے اوکھ، ساری برائی، ساری ناکامی دی ڄڑھ سمجھدے ہئین۔ ݙینہہ رات او آصف زرداری دی کرپشن دے قصے نوائے وقت کنیں وی ودھیک چاتی رکھدے ہئین۔ ایں ݙوجھی ونکی دے جیالیں دیاں تونسے وچ کئی مثالاں ہن تے اڄ وی ہن پیاں۔ ناں چاوݨ چنڳاں نئیں لڳدا۔

اڄ جݙاں میں سچیندا تاں میکوں لڳدے جو ضیاالحق دی آمریت تے وٹیندے سماجی ثقافتی ڈھنگ ڈھالیں پاروں اے "پروٹو یوتھیا” کلاس ونڄ بݨدی ہئی جیڑھی کجھ ݙہاکیں پچھوں کھل کنیں سامہݨے آئی تے جیندی بُودگی تے اوتاولا پُݨا ساݙے سامہݨے دی ڳالھ ہے۔

انہیں ݙو وَنکیں دے وچالے ہک وݙی اکثریت پیپلز پارٹی دے کارکنیں تے ہمدردیں دی ہوندی ہئی جیڑھی اپݨے کم کوں لڳی رہندی ہئی۔ایندے نال جڑے لیفت دے لوک ہوندے ہئین جیڑھے اپݨے انداز وچ جمہوری تݨ مار کوں ودھائی رکھدے ہن۔

لڳدا اینویں ہے جو ویلھے نال ایں ݙوجھی وَنکی دی فصل کجھ ودھ ڳئی ہے۔ اڄوکے سوشل میڈیا ایں ونکی کوں انج زرخیزی ݙٹی ہے۔ او اپݨے آپ کوں ” میٹا پارٹی” سمجھدن تے ایں وݙائی دے گمان وچ ہر ویلھے کہیں نہ کہیں کوں ٹارگٹ کیتی رکھݨ انہیں دا مشغلہ تے مجبوری ہے۔