یوسف رضا گیلانی ۔۔ سرائیکی وسیب دا سرمایہ|| مشتاق گاڈی

پیپلز پارٹی (وسیب) وچ ہک (غیر سیاسی) ٹولے دا یوسف رضا گیلانی کوں ٹارگٹ کرݨ افسوس ناک ہے تے ایں سانگے عقل حیران ہے۔

ماسوائے یوسف رضا گیلانی دے سرائیکی وسیب دی پولیٹیکل کلاس وچ کوئی ہک اینجھی مثال نئیں ملدی جئیں ایں اوپری ریاست اڳوں تݙ ݙتی ہووے، جیوݨ دے 6 سال جیل گذارے ہوون، جند کنیں پیارا ٻال اغوا کروایا ہووے، سارے ریاستی تے غیر ریاستی پریشر باوجود پارٹی تے بھٹو ازم نال وفا نبھائی ہووے، وزیر اعظم دی کرسی قربان کیتی ہووے۔ پچھلے ݙو الیکشن وچ گیلانی فیملی کوں دھونس دھاندلی نال ہرایا ڳئے پر انہیں دی پارٹی نال جڑت ودھیک تھئی ہے۔

یوسف رضا گیلانی دا ہک ٻیا وݙا ہسٹاریکل کریڈٹ سرائیکی صوبہ کوں مین سٹریم پارلیمانی سیاست وچ گھن آوݨ تے اوندے کیتے آئینی راہ رستے پدھرا کرݨ ہے۔ اڄ وی سرائیکی صوبہ دی پارلیمان تے سیاست وچ سبھ توں اُچی ہَکل یوسف رضا گیلانی دی ہے۔

سپیکر تے وزیر اعظم ہوندیں ہوئیں وسیب وچ جیتلاں سرکاری نوکریاں تے ترقیاتی فنڈز یوسف رضا گیلانی دی پاسیوں ݙتے ڳئین، او لوک تے وسیب دوستی دی وݙی مثال ہے۔

یوسف رضا گیلانی اڄ پاکستان دی پارلیمان وچ سبھ کنوں تجربہ کار تے منجھیا ہویا سیاستدان ہے۔حکومتی تے پارلیمانی امور دی ڄاݨ پچھاݨ تے سمجھ بوجھ وچ یوسف رضا گیلانی دا کوئی مقابلہ نئیں۔

اڄ ایں مرحلے جݙاں پارٹی ننویں سروں آرگنائز تھیندی پئی ہے، سرائیکی وسیب جاڳدا پئے، پارٹی تے وسیب دا سمبندھ ڳاڑھا تھیندا پئے تاں اوں ویلھے یوسف رضا گیلانی کوں ٹارگٹ کرݨ دی اے مہم افسوس ناک ہے۔ ایندے پچھوں جیڑھے شکوے گلے ہن، او یا اپݨی مہاݨتا دے خواب خیال دو اشارہ کریندن یا شدید غیر سیاسی جذبایت دی ݙس ݙیندن۔