آئی ایم ایف، چَٹی دلال میڈیا تے یوسف رضا گیلانی|| مشتاق گاڈی

یوسف رضا گیلانی دے خلاف پنجابی اردو میڈیا دی دشمنی کوئی اڄ دی ڳالھ نئیں۔ کیڑھا کوڑا الزام یوسف رضا گیلانی دے خلاف نئیں لایا ڳیا؟ گھٹیا پروپیگنڈے دا کیڑھا ہتھکنڈہ نئیں ورتیا ڳیا؟ اے سبھ کجھ ایتلا سوجھل ہے جو اینکوں سمجھݨ کیتے راکٹ سائنس نئیں چاہیدی۔

متعصب، چٹی دلال میڈیا دی جانچ کاری کیتے ایندے کوڑ دی پکڑ ہک انگ ہے پر ایں کنیں وݙا پیمانہ ایندا سچ لکاوݨ ہے۔ ایں سٹیٹ بینک آف پاکستان دے آئینی ترمیمی بل دی سمسیا وچ کیڑھا سچ ہے جیڑھا میڈیا لکیندا پئے تے سارے مدعے دا ملبہ یوسف رضا گیلانی تے سٹݨ دی کوشش کیتی ویندی پئی ہے۔

میݙے موجب جیڑھا اوکھا سچ ایں ساری کھیݙ وچ لکایا ویندا پئے او اے ہے جو پاکستان دی سٹیٹ تے اسٹیبلشمنٹ کولہوں آئی ایم ایف دی اے مشرط مسترد کرݨ دی کوئی گنجائش ای کائیں نہی۔ میں اتھاں ول دہریندا جو آئی ایم ایف دی اے شرط منݨ ریاست پاکستان دی مجبوری ہئی۔

او مجبوری سِدھی سادھی معیشت دے دڳے نال ڳنڈھیل ہے۔ پاکستان دا اڳلے چھی مہینے (دسمبر کنیں جون 2022) دا کرنٹ اکاؤنٹ خسارہ 9 ارب ڈالر کنیں ودھ ہے۔ ایں کرنٹ اکاؤنٹ خسارے وچ اڳلے چھی مہینے ٻاہرلے قرضے دے 8.6 ارب ڈالر شامل ہن۔ جے پاکستان کوں اے آئی ایم ایف دا قرضہ نئیں ملدا تاں نہ اے ٻاہرلے قرضے واپس تھیندن تے نہ پاکستان دیاں اݨ ڳݨت امپورٹ دیاں شئیں آ سڳدن۔ موبائیل، کمپیوٹر، آئل، کوکنگ آئل تے ٻنہیں شئیں کوں تاں چھوڑو، خود ڈیفینس دے شعبے نال منسلک امپورٹ وی نئیں تھی سڳدی۔

کوئی منے یا نہ منے پر ساݙی معیشت جتھاں اڄ پڄ ڳئی ہے، اتھاں آئی ایم ایف دی غلامی متوں کوئی راہ رستہ نئیں بچیا۔ ٻنہیں کوں چھوڑو خود ساݙی اسٹیبلشمنٹ کوں آئی ایم ایف دی دفاع نال منسلک "سنگل اکاؤنٹ” کوں مسترد کرݨ دی گنجائش نئیں بچی۔

سچ اے ہے جو یوسف رضا گیلانی موجود ہووے یا یا غیر حاضر، سیاسی جماعتاں چاہون ہا یا نہ چاہون ہا، اے بل پاس تھیوݨا ای تھیوݨا ہئی۔ ٻس ایں کم دا ملبہ کہیں تے سٹݨا ہا تے او ساݙے چٹی دلال میڈیا یوسف رضا گیلانی تے سَٹ ݙتے۔

پاکستان دی اڄوکی حالت کئی ݙہاکے پچھوں آلے لاطینی امریکا دے ملکیں دی اکثریت وانگ ہے جیڑھے ٻاہرلے قرضیں دے ڄال وچ ایتلا پھس ڳئے ہئین جو انہیں کیتے خودمختیاری ہک خواب خیال بݨ ڳیا ہئی۔ سونے تے سہاگا ساݙی فارن پالیسی ہے جیندے کارݨ اساں افغانستان دے اینجھے "بلیک ہول” وچ ڈھے چکے ہئیں جئیں ساݙی اکانومی کوں سنبھلݨ ای نئیں ݙیوݨا۔ امریکا چین دی لڑائی وی چَݙے انج چِریندن۔

ایں پھاسݨ وچ پھسݨ دا ایہو اوکھا سچ ہے جیڑھا ساݙا میڈیا ساکوں ننگی اَکھ نال کݙاھیں نہ ݙکھیسی تے ملبہ یوسف رضا گیلانی تے پیپلز پارٹی جہیں سافٹ ٹارگٹ تے َسٹیندا رہسی۔

او بھئی! اے بل پاس کرݨ متوں ساݙی سٹیٹ تے اسٹیبلشمنٹ کولہوں کوئی ٻئی راہ ای نہی بچی۔ جے ایں پھاسݨ کنیں نکلݨے تاں وت ہک واری ول ذوالفقار علی بھٹو دی کتاب ” Myth of Independence” پڑھو تے جے جرات ہے تاں اوندے تے عمل کرو۔ باقی اے ڈرامے چلدے رہن تے چلدے رَہسن۔