تہوں نیل و نیل ہئیں|| حسن مرتضی

یار سرائیکی مجھے اچھی نہیں لگتی اس میں روایتی شاعری کے علاوہ کیا ہے۔ اے گالھ کݙاہیں میں اپݨے سنگتی ملک سلیم سئیں نال کیتی ہئی اج کنے تقریباً چار سال پہلو جݙاں اردو وچ شاعری کرݨ دا ہک جنون ہئی تے روز نویاں نکور غزلاں لکھیج ویندیاں ہن (شکر اے پاگل پن آپو ختم تھی ڳئے) ۔ ملک سئیں میکوں ڈاکٹر اشو لال دی کتاب پی ڈی ایف وچ بھیجی ول رفعت عباس کوں پڑھیا تاں اپݨی ماٻولی تے اتبار آوݨ لگیا جو اساں وی ایں مہذب دنیا نال کہیں طریقے الا سگدے ہئیں اتے الیندے کھڑے ہیں۔

ارون دھتی رائے آہدی اے کشمیر دا مسئلہ اینجھا ݙونگھا مسئلہ اے جیندے اتے فکشن سوا کہیں زبان گالھ نئیں تھی سگدی ۔ ایویں ساݙی ایں وسوں دا، مردی تہذیب دا، ایں سکڑدے دریا دا، مردے تل وطنی دا مسئلہ اینجھا مسئلہ بݨ ڳئے جیندے اتے سوائے شاعری دے کہیں زبان وچ گالھ نئیں تھی سگدی۔

وݙے شاعر گزریے ہوسن، وݙے شاعر موجود ان جنھاں دے کلام وچ عاشق معشوق ہیر رانجھا سسی پنوں ہمیش الیندے کھڑن۔ پر اشو لال او شاعر اے جیندے کلام وچ وسوں آپ اپݨی جیا جون نال الیندی اے ۔ اپݨے اتے ترقی ، ڈاکے ، اسلام ، گرین انقلاب دے ناں تے تھیوݨ آلے دروہ تے گالھ کریندی اے۔

اشو لال سئیں دی نویں کتاب آڳئی اے ۔ ڄال منوتی ۔ پہلے صفحے تے ہی خوشی دی خوشی اتے غم دے غم توں بے نیاز چار لائناں تھل دی محبت دی خشبو نال استقبال کریندین ۔ پہلی پچھی وچ اشو سئیں اساں تل وطنیاں دی گالھ کیتی اے ۔ ساݙی وسوں دی اجتماعی امن پسند عدم تشدد دے مزاج اتے اوپری دنیا دی طرفوں مسلط کیتی گئی ترقی اتے برہمن واد جہرا اج کل اسلام دا چولا پا کے ساکوں لٹی کھڑے اوندے اگوں تل وطنیاں دی گالھ رکھی اے ۔ ایں ریاست دے کیتے ڳئے دروہ دی وضاحت وی کیتی اے اتے بے مہابا منہ زور ترقی اڳوں احتجاج اتے ایندے نتیجے وچ پیدا تھیوݨ آلی نفسیات کوں وی explain کیتے ۔

جنگجو دی نفسیات کنے تلوراں دی فریاد تک اے نظماں جیندا جاگدا المیہ ان ۔ کون پچھ سگدے جو ساکوں مٹی ݙانݙ کھس کے 20 روپے اچ جنگی کھݙوݨے کیوں کھݙائے ڳئن ۔ کیوں کشمیر جنت کنوں دوزخ تھی گے ۔ اتے نام نہاد مہذب دنیا ہتھ وچ ایٹمی ہتھیار چاکے ایں دنیا دی تباہی کنوں ہک بٹن دور بیٹھی اے۔ دنیا دے تمام وݙے قصاب ہٹلر مسولینی چنگیز پڑھے لکھے ہن۔ اتے ان پڑھ تل وطنی تاں کڈاہیں کوئی دروہ نئیں کیتا ول مہذب دنیا ساکوں کیویں غیر مہذب آہدی اے ؟۔ کیا اساں اے پچھݨ دے وی حقدار ہیں جو بھا کوں چوری کرݨ آلے وانگوں آئن سٹائن نے وی جیہرا علم خدائی خزانے وچوں چا کے انسان دے ہتھ ݙے ݙتے کیا انسان ایکوں سمبھالݨ دا اہل ہا؟۔ جواب تاں ناں اچ اے کیوں جو نوح دی بیڑی بݙدی پئی اے ۔

تل وطنیاں دے نوحیاں تے مشتمل ایں پچھی دے چھیکڑ وچ اشو سائیں سندھ وادی راݨی شہید بے نظیر دا سوگ منا کے اپݨے سارے غم کوں کٹھا کیتے۔ دنیا بھر دے ادارے ایجنسیاں بھاویں بے خبر ہوون پر تل وطنی جاݨدے جو اوندی دھی اوندی اماں اوندی بھیݨ دا قاتل کون ہے ۔ پچھی دی چھیکڑی نظم بلاول بھٹو زرداری دے ناویں ہے ۔ ایں سوگ وچ ایں مٹی دی خاطر اج وی اساں انھاں شہیداں دے نال ہئیں اتے انھاں دے ٻال ہئیں ۔ اے پچھی اتھائیں مک ویندی اے ۔ باہر دی مہذب دنیا جے کݙاہیں اساں دلتاں کوں آن ڳولیا تے شاعری دی صورت وچ اے وائٹ پیپر ایں پوری دنیا دے اڳوں ہک احتجاج ہوسی۔ جنھاں ایں وسوں ایندی جیا جون ایندی تہذیب ایندے دریا تے ایندے تل وطنی کوں مذہب ، ذات پات ، بے مہابا ترقی ، تقسیم اتے ہجرت دیاں تلواراں نال لہو لہان کیتے ۔ اتے ارمان ایں گالھ دا ہے جو اے عمل بجائے رک ونڄݨ دے مزید شدت نال مسلط کیتا ویندا پئے۔

اشو سائیں کنے ہک واری پچھیا ہم مرشد ساݙی اے گالھ کون سݨسی ؟ کیا نہر ٻݨن رک سگدی اے؟ کیا بے مہابا ترقی ، ڈتم رک سگدن ؟ تاں مرشد ولدا ݙتا "بھاویں کجھ نا تھیوے ۔ اج کنے سو ݙو سال بعد جݙاں انسان اج دی نسل دے انسان کوں ایندے کیتے ڳئے جرائم تے مندے کڈھسی تے اساں پاگلاں دا ذکر تاں ہوسی جو کجھ لوک تاں ہن جیہرے اوں ویلھے وی سچ نال کھڑے ہن بس اپݨا کم ٹردے رہوݨ اے”

باقی پچھیاں ٻئے ویلھے