حکایت: پیبلو نرودا||رفعت عباس

پیبلو نرودا

دھمی دی چا ٻیٹھا پیندا ہَم’پیبلو نرودا آکھیا "تو سان تیاگو کیوں نی آ ویندا’ݙوہیں کٹھے کافی پیندے ہیں’اڄ دا ݙینہ کٹھے گزریندے ہیں

ملتان توں سان تیاگو تئیں کلام دا ہک ویزا خود نرودا جاری کیتا’چاء اپنڑی ادھ پیتی کیتم چلی پڄیم’ٻہوں لمبیاں بارشاں پِچھوں نرودا سمندر دے کنارے اپݨی شاعری دے محل وچ دھپ تے سیب دی نرہاݨ تیں میݙا تانگھی ہا’ نرودا دھمی دے لباس وچ تے 2018 دا اسمانی نیلا ہیٹ اوں پاتا ہویا’اوندے پیریں وچ تیز نیلے کپڑے دی جُتی ہئی’ایہ نرہاݨ کافی دے الہام وچ دیر تاݨیں چلدی رہی’نرودا ازلا نگرا دے اپنڑے محل توں سمندر کوں ݙِٹھا تے ازل ابد دی جھال اوندے منہ تے ہئی

اوندی شاعری بارے ٻولیم……”ٹماٹر دا ڳاوݨ…..کپڑیاں دا ڳاوݨ…..بالیں دے پیریں دا ڳاوݨ…..ماچو پچو دیاں پہاڑیاں……”

نرودا کِھلیا”تیکوں پتہ ہے انہاں میکوں 1973 وچ قتل کر ڈِتا ہا "…….

"میکوں خبر اے23 ستمبر 1973″…..

"پنوشے پہلے آلندے کوں قتل کیتا ݙو ہفتے پچھوں میکوں”…..

"اوں ویلے میں سولہ سال دا تے وستی اپݨی رہندا ہم میکوں ایں قتل دی ٻہوں چِر پِچھوں خبر مِلی” اونکوں ݙسیم’

ݙوپہراں تئیں بارش تھیوݨ پے ڳئی نرودا رنگلا ہک چھاتا کرسیاں اُتے لا ݙِتا

پیبلو نرودا وت کافی بݨا آیا تے بولیا!

"جاہ تے ویلے توں اڳونہی شاعری ہک وݙی سانجھ اے”….

"ساڈے وچکار ہک بئی وی سانحھ اے’اساں ݙوہیں دے پیو ریلوے ملازم ہَن”آکھیم

……………………………………………………….

1)پیبلو نرودا:چلی(جنوبی امریکہ)دا جہان ہُلیا شاعر

2)سان تیاگو:چلی دا دارالحکومت

3)پنوشے:جنرل پنوشے جیں 17 سال چلی وچ مارشل لایا

4)آلندے:سلواڈور آلندے چلی دا مارکسسٹ صدر تے نرودا دا دوست