چنساؤ ٹیکنالوجی غربت مکاوݨ تے پائیدار ترقی کیتے موزوں اے، وزیراعظم عمران خان دا چین اچ منعقدہ چنسائو معاونت تے پائیدار ترقی تعاون فورم دی 20 ویں سالگرہ دے موقع تے ویڈیو لنک دے ذریعے خطاب
اسلام آباد۔3ستمبر (اے پی پی):وزیراعظم عمران خان آکھیے جو پوری دنیا اچ ماحولیاتی تبدیلی، غربت اتے غذائی عدم تحفظ وݙے چیلنجز ہن، ترقی پذیر ملکاں کیتے غذائی قلت ٻہوں وݙا مسئلہ اے ، غربت مکاوݨ کیتے چین رول ماڈل اے، کووڈ۔ 19 دی عالمی وبا اقتصادی بحران کوں جنم ݙتے، احساس پروگرام کورونا دے معاشی مسئلیں تے قابو پاوݨ اچ مدد ݙتی ، پاکستان ماحولیاتی تبدیلیاں دا مقابلہ کرݨ کیتے زبردست اقدامات کیتن ، 10 بلین ٹری منصوبہ دے تحت ہݨ تئیں ھک ارب وݨ رادھن ، چنسائو ٹیکنالوجی غربت مکاوݨ تے پائیدار ترقی کیتے موزوں اے۔ اے ڳال انہاں جمعے کوں چین اچ منعقدہ چنسائو معاونت اتے پائیدار ترقی تعاون فورم دی 20 ویں سالگرہ دے موقع تے ویڈیو لنک دے ذریعے خطاب اچ آکھی اے ۔ وزیراعظم چین کوں ایں فورم دی میزبانی اتے پروفیسر لین کوں ”چنسائو” ٹیکنالوجی دی ایجاد تے مبارخ ݙیندے ہوئیں آکھیے جو ایں ٹیکنالوجی توں دنیا دے سو توں ودھ ملک 20 سال توں فیدہ چیندے پئن تے ہݨ تئیں ہزاراں لوکاں ایندے توں فیدہ چاتے ۔ وزیراعظم آکھیے جو دنیا کوں بالعموم تے کرہ ارض دے جنوبی حصے اچ وسݨ آلے لوکاں کوں بالخصوص ماحولیاتی تبدیلیاں، غربت اتے ساریں توں ودھ تے غذائی عدم تحفظ سودھے کئی چیلنجز دا سامݨا اے، غربت دیاں ساریاں صورتاں مکاوݨ دیاں کوششاں پاروں گزریل ݙو ݙھاکیں توں شدید غربت اچ تسلسل دے نال کمی آندی پئی اے تاں جو تاں جوکووڈ۔ 19 دی عالمی وبا اقتصادی بحران کوں جنم ݙتے جیں توں ایں پاسے آئی بہتری سست روی دا شکار تھئی اے ، گزریل 20 سالاں اچ پہلی واری سال 2020 دے دوران غربت وچ ودھارا ݙٹھا ڳئے، ترقی پذیر ملکاں کیتے سارے لوکاں کوں خوراک اتے بہترین غذائیت دی فراہمی ٻہوں وݙا چیلنج بݨ تے ابھریے ، عالمی وبا دے دور اچ اقتصادی بحالی، بڑھوتری اتے ترقی دے حصول دی بابت پائیدار ذرائع اختیار کرݨ ٻہوں اہمیت رکھیندے ۔”چنسائو” ٹیکنالوجی ایجھا ہی ھک ذریعہ ثابت تھی سڳدی اے ، اے چھوٹے کساناں کوں گھٹ لاگت اچ وݙے پیمانے تے کھمبیاں دی کاشت اچ تعاون کریندی اے ، تے ٹیکنالوجی زمیناں کوں بنجر تھیوݨ توں بچاوݨ اچ مددگار ثابت تھی سڳدی اے ، زیادہ مقداراچ پروٹین دی حامل ہووݨ پاروں مال ڈھور دے گھا دے طور تے وی استعمال تھی سڳدی اے ، وزیراعظم آکھیے جو غربت مکاوݨ دے حوالے نال چین ترقی پذیر ملکاں کیتے ھک رول ماڈل اے ، گزریل چار ݙھاکیں اچ چین آپݨی شاندار شرح نمو توں80 کروڑ لوکاں کوں غربت اچوں کڈھیے ۔ وزیراعظم ماحولیاتی تبدیلیاں دے حوالے نال چین دے قائدانہ کردار دی وی تعریف کیتی۔
صدر مملکت ڈاکٹر عارف علوی دی بزرگ کشمیری حریت راہنما سید علی گیلانی دی غائبانہ نماز جنازہ اچ شرکت
اسلام آباد۔3ستمبر (اے پی پی):صدر مملکت ڈاکٹر عارف علوی بزرگ کشمیری حریت راہنما سید علی گیلانی دی غائبانہ نماز جنازہ اچ شرکت کیتی ۔ نماز جنازہ جمعے کوں فیصل مسجد اچ ادا کیتی ڳئی ۔ وفاقی وزیر اطلاعات و نشریات چوہدری فواد حسین اتے وزیراعظم دے مشیر قومی سلامتی معید یوسف سمیت اعلیٰ حکومتی شخصیات دے علاوہ عام لوکاں وی نماز جنازہ اچ وݙی تعداد اچ شرکت کیتی ، ایں موقع تے تحریک آزادی کشمیر دا استعارہ سمجھیے ونڄݨ آلے حریت رہنما سید علی گیلانی دے درجات دی بلندی دے نال نال کشمیری عوام دی بھارت دے غیر قانونی تسلط توں آزادی تے پاکستان دی سلامتی کیتے وی خصوصی دعا کیتی ڳئی ۔
افغانستان اچ ایجھے حالات کائنی جو لوک سارا کجھ چھوڑ تے نکل ونڄن ، وفاقی وزیر اطلاعات چوہدری فواد حسین
اسلام آباد۔3ستمبر (اے پی پی):وفاقی وزیر اطلاعات چوہدری فواد حسین آکھیے جو افغانستان اچ ایجھے حالات کائنی جو لوک سارا کجھ چھوڑ تے نکل ونڄن ، طالبان تے پاکستان دا اثرو رسوخ اے لیکن کنٹرول کائنی۔ جمعے کوں نجی ٹی وی نال ڳال کریندے ہوئیں وفاقی وزیر اطلاعات و نشریات چوہدری فواد حسین آکھیے جو افغانستان دے معاملے تے پاکستان دی تجویز کوں پہلے وی نہ سݨیا ڳیا ہئی ،وزیراعظم عمران خان اشرف غنی کوں الیکشن نہ کراوݨ دی تجویز ݙتی ہئی ،اشرف غنی وزیراعظم دی تجویز نی منی تے حالات اڄ ساریں دے سامݨے ہن ، انہاں آکھیے جو افغان مہاجرین حالی تئیں پاکستان اچ داخل نی تھئے ،افغانستان اچ ایجھی صورتحال کائنی جو لوک سارا کجھ چھوڑ تے نکل ونڄن ۔وفاقی وزیر اطلاعات آکھیے جو اساں چاہندوں جو افغانستان اچ حالات مستحکم رہن،پاکستان دا طالبان تے اثر و رسوخ اے لیکن کنٹرول کائنی، اساں کوشش کریندے پیوں جو کابل ایئرپورٹ جلدی کھولیا ونڄے ۔
وفاقی وزیر اطلاعات و نشریات دا ٹوکیو پیرا اولمپکس اچ گولڈ میڈل جتݨ آلے حیدر علی کوں خراج تحسین
اسلام آباد۔3ستمبر (اے پی پی):وفاقی وزیر اطلاعات و نشریات چوہدری فواد حسین ٹوکیو پیرا اولمپکس اچ ڈسک تھرو دے مقابلے اچ گولڈ میڈل جتݨ آلے حیدر علی کوں خراج تحسین پیش کیتے ۔ جمعے کوں آپݨے ٹویٹ اچ انہاں آکھیے جو شکریہ حیدر علی اساکوں تئیں تے فخر اے ۔حیدر علی 5 ویں واری 55.26دی تھرو دے نال گولڈ میڈل جتیے۔حیدر علی پیرا اولمپکس اچ گولڈ میڈل جتݨ آلے پہلے پاکستانی ہن ۔
پاكستان اچ قانون موجود اے، كہیں بندے جماعت يا گروه كوں يہ حق ہرگز نی ݙتا ونڄ سڳدا جو او کہیں دا قتل کرے ، حافظ محمد طاہر محمود اشرفی
اسلام آباد۔3ستمبر (اے پی پی):وزیراعظم دے معاون خصوصی بین المذاہب ہم آہنگی و مشرق وسطی امور اتے پاکستان علماء کونسل دے چیئرمین حافظ محمد طاہر محمود اشرفی آکھیے جو پاكستان اچ قانون موجود اے، كہیں بندے جماعت يا گروه كوں يہ حق ہرگز نی ݙتا ونڄ سڳدا جو او کہیں دا قتل کرے ، شاہكوٹ ننكانہ اچ ھک قاديانى دا قتل قابل مذمت اتے قابل افسوس ہووݨ دے نال اسلامى تعليمات دے وى خلاف اے، مجرماں دى گرفتارى انشاء الله فورى تھیسی۔ سماجی رابطے دی ویب سائٹ ٹوئٹر تے ھک ٹویٹ اچ حافظ محمد طاہر محمود اشرفی آکھیے جو ننكانہ شاہكوٹ اچ ھک قاديانى كوں نامعلوم لوکاں قتل کیتے ۔ ايجھا جرم اتے فعل ناقابل قبول اتے قابل مذمت اے، مقامى پوليس اتے انتظاميه كوں مجرماں دی گرفتاری دی ہدایات ݙتن تے انشاء الله ایں سلسلے اچ کوئی وسلائی نہ تھیوݨ ݙتی ویسی ۔
گزریل چووی گھنٹے اچ 59 ہزا745 کورونا ٹیسٹ کیتے ڳئن ، وزارت قومی صحت
اسلام آباد۔3ستمبر (اے پی پی):گزریل 24 گھنٹے اچ 59 ہزا745 کورونا ٹیسٹ کیتے ڳئن ۔وزارت قومی صحت دی طرفوں ھک ٹویٹ اچ ݙسائے ڳئے اعداد و شمار موجب گزریل 24 گھنٹے وچ 59 ہزار 745 کورونا ٹیسٹ کیتے ڳئن جنہاں اچوں 3787 لوکاں دے کورونا ٹیسٹ مثبت آئے ، کورونا ٹیسٹاں دی مثبت شرح 6.33 فیصد رہی اے۔اتے کورونا وائرس پاروں 57 لوک جاں بحق تھئن ۔
نویں ججزدی تقریب حلف برداری،چیف جسٹس لاہور ہائی کورٹ دی خصوصی شرکت ،2 ایڈیشنل ,8 سول ججز عہدیں دا حلف چاتے
لاہور۔3ستمبر (اے پی پی):پنجاب دی ضلعی عدلیہ اچ بھرتی تھیوݨ آلے 2 ایڈیشنل سیشن ججز اتے 8 سول ججز آپݨے عہدیں دا حلف چا ڳھدے ۔ رجسٹرار لاہور ہائیکورٹ عرفان احمد سعید نویں بھرتی تھیوݨ آلے جوڈیشل افسران توں حلف ڳھدے ۔حلف چاوݨ آلیں اچ ایڈیشنل سیشن ججز وارث علی اتے مظفر علی انجم جݙاں جو سول ججز سعدیہ علیم، شاہد ندیم، سرمد سلیم، صوفیہ اشرف، نمرہ سلیم ، ذیشان احمد، محمد توصیف اتے محمد علی خان آپݨے عہدے دا حلف ڳھدے ۔حلف برداری تقریب اچ چیف جسٹس لاہور ہائی کورٹ مسٹر جسٹس محمد امیر بھٹی خصوصی شرکت کیتی جݙاں جو ایں موقع تے ڈی جی ڈسٹرکٹ جوڈیشری مسعود ارشد، سیشن جج ہیومن ریسورس چودھری عبدالرشید عابد، قائم مقام ڈی جی پنجاب جوڈیشل اکیڈمی چودھری محمد سلیم، ڈی جی جوڈیشل اینڈ کیس مینجمنٹ شاذب سعید اتے حلف چاوݨ آلے ججز دے عزیزواقارب وی موجود ہن ۔حلف برداری تقریب دے موقع تے شرکا نال ڳال کریندے ہوئیں چیف جسٹس محمد امیر بھٹی آکھیے جو اڄ جوڈیشل افسران آپݨے فرائض منصبی دا حلف چاتے، اے حلف نامہ جج اتے اللہ تعالی دے درمیان ھک خاص رابطہ قائم کریندے ، اے حلف نہ صرف جج بلکہ ایندے گھر آلیں تے رشتے داراں تے وی لاگو تھیندے ۔ چیف جسٹس آکھیے جو جج دے منصب تے فائز ہر بندے کوں آپݨے رشتیں، خواہشات اتے وقت دی قربانی ݙیوݨی ہوندی اے لیکن اے منصب اللہ تبارک و تعالی دی طرفوں ھک انعام اے ۔
About The Author
اے وی پڑھو
سیت پور کا دیوان اور کرکشیترا کا آشرم||ڈاکٹر سید عظیم شاہ بخاری
اسلم انصاری :ہک ہمہ دان عالم تے شاعر||رانا محبوب اختر
موہری سرائیکی تحریک دی کہاݨی…||ڈاکٹر احسن واگھا