میݙے خیال ئچ ‘کاوڑکرودھ’ ھِک ‘چݨِڳ’ (چنگاری) ءِ، ھِک شکتی ءِ جیڑھی ھر بندے (اتےکہیں حد تئیں ھر جیندے جی) دے اندر ھوندی ھِ پر آپݨے اندر دی اِیں ‘چݨڳ’ دا ورتاراھر بندے دا آپݨاں آپݨاں ھوندے۔ ݙاڈھے، پھردے بندے دی کاوڑ دا آپݨاں ھِک رنگ ھوندے، ھیݨے، اݨپَھر بندے دی کاوڑ دا آپݨاں ھِک رنگ ھوندے۔ کاوڑ دی اِیں ‘چݨڳ’ کوُں کݙاں، کِتھاں، کیویں ودھاوݨے یا گھٹاوݨے، اے ھِک سُرت، ھِک آرٹ، ھِک کلا منڳدی ءِ۔ اِیں سُرت، اِیں کلا کوں ھتھیکا کرݨ لؤ، ھر بندہ آپݨی کاوڑ کوُں ھِک حد تئیں پروسسیس وی کریندے، پر ھر بندہ نہ آپݨی کاوڑ دی ھِکو سنوّیں پروسیسنگ کر سنڳدے اتے نہ ھر بندے کوُں آپݨی کاوڑ دے ورتارے دی ھِک سنوّیں کلا ڈھہیندیءِ۔ ھا البتہ ھِک خاص طراں دی کانشئیسنیس، ھِک خاص طراں دا کلچر اتے ھِک خاص طراں دی تربیت اِیں کم ئچ بندے دے ٻانہہ ٻیل ضروُر تھی سنڳدن۔ اڄوکے سیاستداناں دی مثال گِھنوُں تاں، کاوڑ دا ھِک نموُنہ عمران خانءِ، کاوڑ دا ٻیا نموُنہ زرداری صاحب ھِن۔ ھِک دے مونہہ ئچ جو آندے کڈھ ݙیندے، ٻیا آپݨے لفظاں دے ورتارے ئچ ٻہوُں احتیاط اتے ناپ تول ورتیندے۔

آپݨے پہلے کمینٹ ئچ ‘کاوڑ کرودھ’ کوُں کلھا کر ناھمی ورتا، بلکہ ایندے توُں پہلے وی ھِک ادھ شبد (ڳالھیں مندے) اتے اِیندے توُں بعد وی ھِک ادھ شبد (الزام تراشیاں) لِکھے ھامی۔ "ڳالھیں مندے، کاوڑ کرودھ اتے الزام تراشیاں” لکھݨ دے پچھوُں، میݙے چیتے ئچ کتھائیں عمران خان ٹائپ ‘کاوڑ کرودھ’ ھئی، اینجھئیں ‘کاوڑ کرودھ’ جیڑھی ٻہوُں ترنت اتے گھٹ پروسیس تھئیل (یا سرو پروسیس تھئے مُتوُں) ھوندیءِ۔ اینجھئیں کاوڑ جیندے نال میݙا ٹاکرا فیس بُک تے کجُھ دوستاں نال تھیوݨ آلے ھِک مُہݙے ئچ تازہ تازہ تھیا کھڑا ھا۔

آپݨے اڳلے کمینٹ ئچ ‘خالی تھاں’ اتے ‘خالی تھانواں دا کھڑکار’ وی ‘کاوڑ کرودھ’ دی اینہیں ونکی (عمران خان ٹائپ) دے ریفرنس ئچ لکھا ھامی۔ باقی میݙا ‘خالی تھاں’ اتے ‘خالی تھانواں دے کھڑکار’ دا ورتارا جیکر تہُاکوُں یا ننڈھے وݙے کہیں وی سنگتی کوُں کوئی ‘ذاتی حملہ’ یا کوئی ‘وݙا الاء’ تھی سُݨیجے تاں، ایندے کیتے میݙی مجالءِ۔