مشاعروی شاعر ||سرائیکی اُلتھا ثقلین قیس

اج دے زمانے دے وچ جدید تے وڈا شاعر اوکوں مناں ویندے جیرھا مشہور ہووے۔ملک دی ہک چنڈ توں چا کے ڈوجھی چنڈ تک مشاعرے پڑھے تے اپنی مشہوری برقرار رکھنڑ کیتے چنگی شاعری کریندے کریندے وچ بودکی وی مار ڈیوے (سو کالڈ جدت جی)

مشاعروی شاعر اوویں تاں ڈسنڑ ءچ عام بنداں آنگوں ہوندے لیکن ایندی ہک خصوصیت ایکوں عام بنداں توں مختلف بنڑیندی ہے او ہے مائیک کوں ڈیکھ تے کن کلیاں تھی باہونڑاں۔

مشاعروی شعراء دیاں ترائے قسماں ہن

1پھوت پھات آلا شاعر

2دعا سلام آلا شاعر

3پھدو کھاتے آلا شاعر

پہلی قسم دے شاعر دی شاعری چنگی ماڑی جیویں وی ہووے ۔لیکن پھوت پھات توں ریاست دا نواب لگدے ۔ملک دی ہک چنڈ توں چا کے ڈوجھی چنڈ تئیں مشاعرے پڑھدے ۔مشاعرے تے ویندی وار ہک کوچ کرائے تے کیتی ڈاہ بارھاں شاگرد کٹھے کیتے انہاں کولوں ڈوں چار سو روپیہ جھمبھ گھدا ۔تے ٹر وگا ادب دی خدمت تے ۔تقریبا ایں قسم دے شاعر دے شاگرد ہر ضلع ہر تحصیل ہر تھانڑیں ءچ پائےویندن تاکہ کتھاییں وی مسئلہ بنڑیں شاگرد کوں خدمت دا موقع ڈتا ونجیں ۔مشاعرے تے ڈاڈھی پھوت پھات نال اپڑسی مقامی شاگرداں دے زمے ویہارا کھن داد ڈیونڑ آلے تماشائی ہوسن ۔جیرھے شاعر صاحب دی آمد تے پنڈال کوں سر تے چا گھنسن ۔چارے پاسے ہلا ہلا مچ ویسی بندے ویلاں آء ڈیسن استاد دی ڈیہاڑی لگ ویسی مشاعرہ وی لٹ گھدا ویسی تے انتظامیہ کولوں وی ڈوں چار ہزار پھاٹ گھنسی

ڈوجھی قسم دے شاعر سلام دعا آلے شاعر اے وی اگوں ڈوں قسماں دے ہوندن ۔ہک چنگا شاعر جیرھے نال انتظامیہ دی دعا سلام ہوندی ہے ۔ڈوجھا کسا شاعر جیرھے دی انتظامیہ نال دعا سلام ہوندی ہے ۔اے شاعر شودھا اپنیں مستی ءچ مست راہسی شاعری کریندا رہسی۔فقیری ملی رہسی کہیں گال دا پتہ کئی نہ ہوسس لیکن جیرھے ویلے کتھائیں مشاعرہ تھیسی تاں چنگے شاعر دی انتظامیہ کوں یاد آویسی تے کسے کوں انتظامیہ دی۔اے شاعر اپنیں اثر و رسوخ سنگت ساتھ دی وجہ توں مشاعرے مفت ءچ اعزازی طور تے پڑھسی تے پڑھسی وی اڈھا گھرے تے جتھاں تئیں سٹوکر سو روپے دے تیل نال ترائے بندے چا کے گھن کھڑے۔

تریجھی قسم پھدو کھاتے آلا شاعر ۔سارا ڈینہہ فیس بک چلیسی۔کئی شئے ترٹی پھرٹی لکھنڑ دی دیر ہوسی فیسبک تے ٹھک لگسی ۔اینجھے شاعر کوں نہ پھوت پھات دی ڈاء آندی ہے ۔نہ دعا سلام بناونڑ دی تے نہ شاعری کرنڑ دی ۔بس اے ایویں فیس بک تے پھدو کھاتہ لائی رکھسی ۔جیں ویلے اوانڈھ گوانڈھ ءچ مشاعرہ تھیسی مشاعرے دی انتظامیہ کہیں شاعر کوں آکھ ڈیسی یار اوکوں وی آکھیں چا مشاعرے تے آوڑسی ہوندا تاں ویہلا ہے۔

نوٹ :ساڈا تعلق تریجھی قسم نال ہے