سرائیکی صوبے داقیام ایمرجنسی ہے||مشتاق گاڈی

(2) اساں تاں چھوٹے ویلھے کنیں "ڈائلیکٹکس” پڑھ کنیں ٻہوں سارے رولیں کنیں بچ ڳئے ہائیں۔ مخالفت وی ایں سانگے موافقت ہوندی ہے۔ مثال کیتے جیڑھی سنگت "سرائیکستان” دے ناں دا نعرہ لیندی ہے، اے ساݙے حق وچ ہے۔ جے ایں ناں دا صوبہ نئیں وی ملدا پر ایں سانگے "جنوبی پنجاب” دی مسلط کیتی شناخت دی مزاحمت دا مُنڈھ تاں ٻدھیندا پئے۔ اساں کݙاھیں وی ایں سانگے سنگت کوں غلط نئیں آکھیا۔ چھڑا ایہو آکھے جو آئیدیلزم دے نال نال عملیت پسندی تے ڄاݨ کاری وی چلدی رہوے۔

(3) جݙاں وی سرائیکی صوبہ بݨا، او کہیں ہک پارٹی دے کم نال نہ بݨسی۔ آئینی تے پارلیمانی تقاضے اینجھے ہن جو ایندے کیتے "لارجر کن۔سینسس” چاہیدا ہوسی۔ پیپلز پارٹی ہک مہمیز دا کم تاں کر سڳدی ہے تے کریندی ریہی ہے پر پنجاب دی ونڈ کلہا اے وی نئیں کر سڳدی۔

(4 سرائیکی صوبہ دے قیام کیتے چھڑی ہک شرط ہے جو پاکستان وچ ݙ یموکریسی ساندوڑاند ریہہ ونجے تے الیکشن تھیندے رہون۔ ݙوجھے لفظیں وی "ڈیمو کریٹک ٹرانزیشن” ودھیک ݙونگھی تھیوے تے سیاست کوں اسٹیبلشمنٹ دے چَک کنیں چھٹکارا ملے۔ انڈیا وچ وی ایہا ݙیموکریسی ای ہئی جیندے سانگے ٻہوں پیچیدہ لسانی تے جغرافیائی ونڈ ونڈارے تھئین۔ سرائیکیں دیاں 50 کنیں ودھ قومی اسمبلیاں دیاں سیٹاں ہن اتیں ایندی حیثیت ہک ” سوئنگ سٹیٹ” وانگ بݨدی ویندی ہے۔ لنڈی ڳالھ اے ہے جو سرائیکی صوبہ پارلیمانی ڈیموکریسی دی بھنڄ نال بݨسی جے اے چلدی ریہی تے ودھیک آزاد تھئی تاں۔

(5) جے تائیں سرائیکی سنڄاݨ دی ڳالھ ہے تاں او کتھائیں نئیں ویندی تے ناں ونڄیندی ہے۔ اے ساݙی اپݨی کَمت ہے۔ اساں جے پچھلے ݙو سو سال پنجاب وچ ریہہ پنجابی نئیں تھئے تاں کہیں ٻئی مسلط کیتی شناخت نال وی پنجابی نہسے بݨدے۔ ڳالھ سنڄاݨ کنیں اڳوں صوبائی سٹیٹس تے خودمختیاری دی ہے۔ ساݙے کیتے صوبہ تے صوبائی خودمختیاری، چاہے او جیتلی بھنی ترٹی ہووے، اے ہک ایمرجنسی ہے۔ اے کوئی ساݙے کیتے پلیٹ وچ سجا کنیں نئیں رکھی کھڑا۔ ایندے کیتے ٻہوں ساری سٹرگل تے سٹریٹجی دی لوڑھ ہے۔ سرائیکی ننویں ننویں سیاسی تھیندے پئین، اتھاں پچھلے ݙو سو سال کئی پولیٹیکل موومنٹ نئیں چلی، کوئی پولیٹیکل کلچر کائیں نی۔ پولیٹیکل تھیوݨ دیاں کجھ لوڑھاں ہن جیڑھاں اڄاں پورا تھیسن۔

تساݙا اختلاف سر اکھیں تیں۔ ٻنہیں دی اپݨی انج رائے تھی سڳدی ہے۔ اے کوئی حق باطل دی لڑائی نئیں۔ جیتلے تساں سرائیکی ہاؤ، اوتلے اساں تے ٻیا ہر کوئی ہے۔ ڈائیلاگ چلدا رہوے تاں کوئی تدبیر بݨ ای آندی ہے۔ وسدے رہو

مشتاق گاڈی دا اے تبصرہ استاد اعجاز بلوچ دے ہیٹھ ڈتے بیان تے ہے۔