مقدمہ سرائیکستان||کرن لاشاری

جمہور دی منشا جمہوریت ہوندی ھے، کیونجو جمہوریت دا اصول برابری تے باہمی مفاد و اتفاق نال ھے، جمہوریت دے وچ ہر نسلی، جغرافیائی، مزہبی تے ثقافتی گروہ دے مفاد کو مدنظر رکھ تے قانون سازی کیتی ویندی ھے،،

پر وطن عزیز دا ہر جمہوری رنگ نرالا ھے، جتھاں صرف چند مخصوص نسلی گروہ دے مفادات کو ہی فوقیت ݙتی ویندی ھے، قائداعظم محمد علی جناح سئیں تمام قومیں کو برابری دے حقوق دے حامی ہن بلکہ انھاں برٹش راج وچ سندھ کو انج صوبہ بݨاوݨ سانگے عملی جدوجہد کر تے پاکستان سانگے مثال قائم کیتی جو ہر قومتی گروہ ملکی سرحد و آئین دے وچ اپݨی انج سںنجاݨ منگ سڳدا ھے،، ایویں ہی 1973دے آئین وچ ملکی و قومی ضرورت سانگے بغیر کوئی اکثریتی قانون سازی دے بلوچستان کو مکمل صوبے دا درجہ ݙتا ڳیا،،

ایندے بعد وی کئی مثالاں ہن جیویں جو گلگت بلتستان کو صوبائی اختیارات ݙتے ڳئے، یا فاٹا دے علاقے کوں اوندے ہم نسل اکثریتی صوبے وچ ضم کیتا ڳیا، اے ملکی سرحد دے اندر کئی عملی مثالاں ہن،،!!

ایویں ہی وطن عزیز دےوچ ملکی سرحد تے آئین دے تابع ست کروڑ سرائیکی قوم وی اپݨی انج سنڄاݨ دا مطالبہ کریندی ھے، جیویں پاکستان دے آئین و سرحد دے وچ پہلے تو موجود قوماں کو حق ملیا ھوے، یعنی پاکستان دے اندر پنجابی قوم دی سنڄاݨ پنجاب، سندھی قوم دی سنڄاݨ صوبہ سندھ، بلوچ قوم سانگے صوبہ بلوچستان، پختون قوم سانگے صوبہ پختونخوا موجود ھے، ایویں ہی سرائیکی قوم دا مـطالبہ اپݨی انج سنڄاݨ صوبہ سرائیکستان ھے،، جیندے سانگے سرائیکی عوام نصف صدی تو جدوجہد کریندی پئی ھے، اور اے سرائیکی قوم دی حب الوطنی ہی ھے جو تمام تر ناانصافی دے باوجود پنجاہ سالا جدوجہد وچ اڄ تک ملک مـخالف ہک نعرہ تک نی لاتا ڳیا،،

وطن عزیز دے ارباب اختیار ہوش کرݨ جو کہیں قوم دے حقوق و سنڄاݨ کوں زیادہ دیر نی داپھیا ونڄ سڳدا، ایندے نتائج بنگال تو بنگلادیش وی نکل سڳدے، لہذا وطن عزیز پیارے پاکستان دی سلامتی و ترقی سانڳے ٻہوں ضروری ھے جو جلد از جلد ݙوجھی قومات دی طرح سرائیکی قوم دی سنڄاݨ صوبہ سرائیکستان بݨاوݨ دا اعلان کرے!!!!