گھِن کے رَہسوں، گِھن کے رَہسوں، گھِنسوں موہری گَھٹا||مشتاق گاڈی

ساݙا منگروٹھے دا ہک پیپلا یار ہے۔ ناں تاں اوندا دانش بزدار ہے پر ساری سنگت اونکوں آہدی "دانا بھرا” ہے۔ کھلݨ ہسݨ تے ٻنہیں کوں ہَساوݨ اوندی خاص خوبی ہے۔

اے 1993 دے الیکشن دے پچھوں دی ڳالھ ہے۔ میں اوں ویلھے قائد اعظم یونیورسٹی پڑھدا پیا ہَم تے ہوسٹل رَہندا ہم۔ ہک پنجابی لہوری میݙا روم میٹ ہئی۔ الیکشن پچھوں پیپلز پارٹی دی ݙوجھی حکومت کیا بݨی پورے اسلام آباد وچ سرائیکی وسیب پلٹیج پیا۔ ساݙی یونیورسٹی دے ہوسٹلیں وچ ایتلے سرائیکی آڳئے فرلو وچ رہوݨ جو لڳدا ہئی اساں اسلام آباد نئیں تونسے رہندے پئے ہوو۔ اے سبھے نوکری دی تانگھ وچ اسلام آباد پلٹیج آئے ہئین۔ ہوسٹل وچ سرائیکی، ہٹس اُتے سرائیکی، کیفے وچ سرائیکی، بس پوائٹس دے چودھار سرائیکی۔ تݙاں میکوں ایں فرق دا ڄاݨ تھئی جو سرائیکیں دا پیپلز پارٹی نال کیا سانگا ہے تے او ایں پارٹی کنیں کینجھاں تانگھاں آساں رکھدن؟ اے فرق اوں ویلھے سروں نشابر تھی ڳیا جݙاں پیپلز پارٹی دی حکومت فاروق لغاری دے ہتھوں برطرف تھئی۔ سرائیکیں کیتے اسلام آباد بھابھݨ بھوں اندھاراں راتیں تھی ڳٰیا۔

خیر ڳالھ دانے بھرا دی چلدی پئی ہئی۔ دانہ بھرا وی ایم۔اے کر کنیں نوکری دا امیدوار ہئی۔ اوں ویلھے خواجہ کمال ایم۔این۔ اے ہئی۔ ٻہوں وضع دار، ملن سار تے محبتی بندہ ہئی۔ سارے نوکری دے امیدوار نینگر سویل سویل نال تیار تھی ایم۔این۔اے ہوسٹل پڄ ویندے ہئین تے اتھاں ہک میلہ ہوندا ہئی۔ دانہ بھرا دی وی ایہا روٹین ہئی۔ ویسے او ݙوپہریں کنیں پیلھوں واپس مڑ آوے ہا جو اونکوں ڈی۔ایس۔ایس ڈیپارٹمنٹ دی ہک سٹوڈنٹ چھوہر ٻہوں سوھݨی من موھݨی لڳدی ہئی تے او یونیورسٹی بس پوائنٹ جے اونکوں نہ ݙیکھے ہا تاں اوندی نندر خراب تھی ویندی ہئی۔

دانا بھرا وی عجب ماھݨو ہئی۔ ڳاندا ٻہوں سوھݨا ہئی۔ شاعری اونکوں دریہے یاد ہئی۔ کپڑے جُتی چنڳی پاوݨ دا ایتلا شوق ہوندا ہَس جو پورے ہوسٹل وچ جیندی جُتی تے شرٹ پوری آونڄے ہا، او دانہ بھرا سویل نال پا غائب تھی ویندا ہئی۔ میݙا لہوری پنجابی روم میٹ ایں تتا ہوسٹل دا کمرہ چھوڑ ڳیا ۔ روٹی کھاوݨ دے پیسے نہ اوندے کولہوں ہوندے ہئین تے نہ میݙے کولہوں۔ ہک بھاڄی دی پلیٹ تے کئی وار سَپلی منگوا گذارا کریندے ہاسے۔

دانے بھرا دی ہک ڳالھ جیڑھی میکوں اَڄاں تائیں نئیں بھُلدی او ہے اوندا نوکری بارے رویہ۔ خواجہ کمال انور اونکوں ٻہوں پیارا کر کنیں رکھدا ہئی۔ ایں کیتے اوں دانے بھرا کیتے کئی قسم دیاں جاب آفرز کڈھیاں۔ دانے بھرا دا جاب دا کئی اپݨا ای "سوٹڈ بوٹد” جیہاں امیج ہئی۔ اوندے چیتے وچ جاب او ہے جیندے وچ انج روم ہووے، پِھرکݨ آلی کرسی، ٹیبل اُتے فون پیا ہووے تے بندہ گھنٹی وڄا کنیں ملازم کوں چاہ گھن آوݨ دا آکھے تے چاہ دی پیالی پرچ نال حاضر تھی ونڄے۔ایندا کارݨ ہئی جیڑھاں جاب آفرز تھینداں ہئین، او دانے بھرا دے ایں امیج وچ فٹ نہن ٻاہنداں تے او انکار کر ݙیندا ہئی۔ خواجہ کمال انور دا حجتی ٻہوں ہئی تے آکھے ہا جو اونکوں ٻئی نوکری چاہیدی ہے۔

اساں شام کوں جݙاں یونویرسٹی ہَٹس کٹھے تھی ٻاہوں ہا تاں دانے بھرا کوں آکھوں ہا بھئی ہݨ جیڑھی جاب آفر تھئی ہے، او قبول کر چا۔ او ساکوں کھل کنیں آہدا ہئی:

” گھن کیں رَہسوں گھن کے رَہسوں، گھنسوں موہری گھٹا”

ٻس پچھیں دانے بھرا دی جاب دی جݙاں ڳالھ تھیوے ہا تاں سبھے سنگتی کٹھے مِل ایہو نعرہ مارن ہا:

"گھن کے رَہسوں، گھن کے رَہسوں، گھنسوں موہری گھٹا”۔

ایں ساری سمسیا وچ تھیا اے جو پیپلز پارٹی دی حکومت لڳی ڳئی۔ دانا بھرا چھیکڑ وچ وت منگروٹھے آڳیا۔ ہک ٹیوب ویل لایا ہویا ہَس۔ اویں وضع دار، میل ملاوڑا تے سوٹڈ بوٹد رَہندے ۔ ٻس ٹیوب ویل دے بجلی دے بلیں بارے کجھ ودھیک پریشان رَہندے۔

میکوں ڄاپدے جو سرائیکیں دا صوبہ بارے تھولا ٻہوں رویہ ” گھنسوں موہری گھٹا” آلا ای بݨدا ویندے۔