فلیش بیک 13 مئی Flashback 13th May 2018|| اظہر لشاری

ملتان شاھر ئچ ھکے ݙینہہ ‘صوُبہ’ دے سوال تے ترائے سرگرمیاں تھیندیاں پئین۔

پہلی: سرائیکی لوک سانجھ کچہری چوک توُں گِھن گھنٹہ گھر تئیں ‘صوُبہ’ ریلی کڈھیندی پئی ءِ۔

ٻئی: جمشید دستی دی عوامی راج پارٹی دا قلعہ کہنہ قاسم باغ ئچ جلسہ عام ءِ، جیندے ئچ شیخ رشید مہمانِ خصوصی ھِن۔

تریجھی: سرائیکی قومپرستان دی کوارڈینیشن کمیٹی دی ‘جنوُبی پنجاب صوُبہ محاز’ نال ڳنڈھیجݨ سانگے میٹنگ ءِ۔ مزے دی ڳالھ ءِ جو13 مئی 2018ء تئیں جنوبی پنجاب صوُبہ محاذ، پی ٹی آئی ئچ ضم تھی چُکا ھا۔ ساݙے قومپرستاں اوُں ویلے ‘جنوبی پنجاب’ دا ناں ورتݨ تے نہ ‘محاذ’ تے کوئی اعتراض کیتا ھا، نہ پی ٹی آئی دے خلاف کوئی مزاحمتی بیان ݙتا ھا۔ بلکہ ݙوُھائیں نال پیار دیاں پینگھاں پاوݨ کیتے اتاولے تھئے ودے ھَن۔

پچھلے ترائے سالاں ئچ (13 مئی2018 ء توُں گھن 13 مئی 2021ء تئیں) جیکر ساݙے قومپرستاں

.1 صوُبہ بݨاوݨ سانگے آپݨی چہیتی پی ٹی آئی سرکار کوُں چتاوݨی ݙیوݨ سانگے کوئی کٹھ، ریلی یا مظاھرہ کیتا ھووے؟

.2 ‘جنوُبی پنجاب’ دا لفظ ورتݨ تے سرکاری نمائیندیاں دے خلاف کوئی کیمپین چلائی ھووے؟

یا

.3 ‘صوُبہ’ دی سرو مخالف، صوُبہ دشمن نوُن لیگ دے خلاف کوئی مظاھرہ کیتا ھووے؟ (بلکہ ھِک قومپرست پارٹی دی قیادت تاں نوُن لیگ دی وکالت وی کریندی رہیءِ)

تاں اساݙے قومپرستاں دے انہاں ترائے رد عمل بارے حقائق سانجھے ضروُر کریسو!