سئیں مجاہد جتوئی دی ہک پوسٹ دا وَلدا||مشتاق گاڈی

(1) 1818 وچ ملتان صوبہ نہی بلکہ ہک نیم خود مختیار ریجنل سٹیٹ ہئی۔

(2) 1818 وچ ریاست بہاولپور تے ملتان ریاست انج ہئین تاں پراݨے ملتان (صوبہ) تے اڄوکے مجوزہ سرائیکی صوبہ دی حدود نال اوندا کیا موازنہ تھی سڳدے؟ (اتھاں اے وی نوٹ کرو جو سرائیکی صوبہ دی حدود دا کوئی سرکاری۔ ریاستی تعین وی نئیں تھیا۔ انجو انج پرپولز تے ڈیمانڈز ہن)۔

(3) دیرہ اسماعیل خان تے ٹانک اوں ویلھے ہک انج ریاستاں ہئین۔ توڑے جو نواب دیرہ تے نواب ملتان دا ہکی پٹھاݨ برادری نال سانجھ ہئی پر انتظامی طور اے وکھو وکھ ہئین۔

(4) ساکوں ہک ڳالھ لازمی سمجھݨی پوسی جو اے اڄوکی سرائیکی صوبہ دی ݙیمانڈ ہک قومیتی سنڄاݨ تے لسانی جغرافیہ اتیں اسری ہوئی ہے جݙاں جو 1818 وچ نیشنلزم ناں دی کئی آئیڈیالوجی تے پولیٹیکل فورس وجود نہی رکھدا۔ اے کالونئیل ماڈرنائزیشن دا فنامنا ہے۔

(5) ہک تاں اڄوکی نیشلسٹ تحریک کوں تاریخ کوں درست پڑھاوݨا چاہیدے۔ ایہو کم پاکستانی نیشنلزم کریندے جو تلی واٹویں ہسٹری بݨا کنیں ٻالیں کوں درست علم ۔ نالج کنیں وانج رکھیا ویندے۔ اوندی نقالی سرائیکی تحریک کریسی تاں اے اساں اپݨے ٻالیں نال زیادتی کریسو۔

(6) اڄوکے سرائیکی صوبہ دی ݙیمانڈ وچ تاریخ ۔ ہسٹری ہک ریفرنس تاں بݨ سڳدی ہے پر اونکوں کوئی ” ٹیمپ۔لیٹ یا نمونہ” نئیں بݨایا ونڄ سڳدا۔

There is always difference in being and becoming

سرائیکی صوبہ دا جو وی ڄمݨا تھیوݨے (جے اے سنگت دی اٻالہہ تے اݨ ڄاتی نال ترٻ نہ پیا) تاں ایندی آپݨی ہوند ہوسی۔ اساں تے اڄ دے حالات ایندے تخلیق کار ہئین۔ ایندے نال جو حشر تھیندے، ایندے ذمیوار اساں آپ ہوسوں نہ جو کئی گذری وہاݨی۔