مشتاق ڳاڈی  سئیں دی گالھ مہاڑ دا چھیکڑی جواب||مخمور قلندری

مشتاق ڳاڈی  سئیں دی گالھ مہاڑ دا چھیکڑی جواب میں اپݨی گال سمجھاوݨی ہئ سمجھا ڋتی امید ہے سمجھ ویسن میں ہک گال کیا کیتی ہے تماشا بݨا ڈتا گئے کوئ ناں کوئ گال تاں ضرور ہے ۔۔۔۔۔۔۔۔۔۔۔

میں باجوہ سئیں ناویں ہک خط کیا لکھے چا، سارے میݙے پِچھوں پے ڳین جو مشاعراں دے ہر کٹھ کوں پی پی پی دے پِڑ اچ تبدیل کراں. او پیو کوں شابس ہِنے، مشاعرے دا کٹھ میݙا شہید پیو آݨ ٹھہیندے؟ لوک میکوں سݙ پٹھیندن میں مشاعرہ پڑھݨ لڳا وینداں. فوناں توں فون ….. ٻئے دا ہاں کچا کریندے وے یار!!!! میں شاعر ہاں. شاعر کوں سیاسی شعور ہوندے پیا شاعری ہے وی شعور توں

شاعر دا ہنر شاعری اے، سیاست نئیں. سیاسی پارٹیاں دے توصیفی شاعر ہوندے ہوسن، میں کئیں پارٹی دا ٻدھل شاعر نِمی. نہ ہی میکوں کوئی اپݨی پارٹی دا شاعر بݨا سڳدے.

اے تاں تھئی میݙی ڳالھ. ہُݨ میں آنداں تساݙیاں ڳالھیں دو.

میکوں اے ݙسو میں تساکوں ہٹکم ڄو متاں پیپلز پارٹی کوں چھوڑ ݙیو؟ تساں سرائیکیاں کوں پیپلز پارٹی کیتے استعمال کریندے رہ وے، کریندے آندے ہوسو، کرو پے، میݙو نہ غُٹکو. میکوں پتہ اے میں ووٹ کینکوں ݙیوݨا اے، تے میں لکھݨی کیرھی شئے اے. میکوں املا نہ ݙیو. مہربانی کرو.

تاج لنگاہ دا کیرئیر 1988 اچ پیپلز پارٹی ولوں الیکشن لڑ کے مُکا اے، سرائیکی ولوں الیکشن لڑ کے نئیں، اتنا تاں میں وی سُݨی وداں. ہک ڳالھ یاد رکھائے میں سرائیکی تحریک نال جُڑا ھویا کوئناں. سرائیکی شاعری میݙا فیلڈ اے، سرائیکی دھرتی میݙا موضوع اے، میݙی وسوں دا فلورا فانا تے ہتھراوی صنعت میݙے الفاظ ہن. میں دھرتی ڄایا ہاں، سارا ٹٻر ݙے کے کلھے سِر تے اڄ وی اپݨی زمین تے کِلے وانگ ٹھوکا کھڑا ہاں، ٻالاں دا روشن مستقبل، چنگا گھر، سوکھا کھاوݨاں میݙی منزل نئیں ڄو ایندے پچھوں اپݨے دیرے کوں چھوڑ کے کراچی لہور یا اسلام آباد ونڄ پناہ گِھناں. میݙا تل میݙے کیتے اہم اے. میں تساݙے ڄتنا پڑھا لکھا بیشک نہ ہوساں، بھلا سمجھݨوں خالی نِمی. بُودھ بݨاوݨاں ہووے تاں کئیں ٻئے کوں ونڄ بݨاؤ. کیرھا رائیٹ تے کیرھا لیفٹ؟ میکوں پتہ اے سرائیکی سُنڄاݨ دے بہانے سانجھ دے ڄال اچ پھسݨ آلے کتنے سرائیکیاں کوں وسوں دا ڄاݨوں بݨاوݨ دے چکر اچ دہریا بݨایا ڳے. سنگت دے سامݨے ماسٹربیشن کرݨ آلا بھاویں رائٹ دا ہووے بھانویں لیفٹ دا، غلاظت اچ رُٻڑا ھویا ہوندے. دھرتی ماء دے ݙُکھاں دا داݨہ گھت کے دھرتی نال محبت کرݨ آلے لوکیں کوں دہریا بݨاوݨ غلاظت اے. چھپݨ چھپا دی ٹوپی پا کے کینکوں نِرا دہریا بݨاوݨ دی جاہ تے سدھا سدھا کیوں نہ اکھیجے ڄو سئیں پہلے دہریئے بݨسو تاں سرائیکی سُنڄاݨ دا مسلہ سمجھ آسی. ول ہر آدمی دی چوائس اے ڄو سرائیکی سُنڄاݨ دے ایݨ ٻالݨ اچ آپ کوں پَڄالے یا نہ پَڄالے. اے اٹ نہ کڈھݨ غلاظت اے.

تساݙی لوک سانجھ تساݙے کھیسے اچ ہوسی، میݙے علاقے اچ ایندا کوئی وجود کوئنی. سرائیکی صوبہ میݙی لوڑ تاں تھی سڳدی اے ڄو میݙی وسوں دے واسی تخت پشور مارے اوکھن، میݙی منزل نئیں. پنجابی، پشتون، بلوچ، سندھی، کشمیریاں کوں کٹھے ݙیدھے ھوئے میݙا وی دل تھیندئے سرائیکی وسوں وی چار صوبیاں اچ ونڈی ونڈی تھیوݨ دے بجائے ہک مُٹھ ھووے. جمہوری پولیٹکل کلچر دی اُسار دے دِرکھاݨ ڄے کر سرائیکی لمیٹڈ کمپنی اسلام آباد آلے ہِن تاں اِنھاں دِرکھاݨاں دے ہوندیں چار صوبیاں اچ ونڈی ھوئی سرائیکی وسوں نہ ہک تھیوݨ دا خواب ݙیکھے نہ صوبے دا. میکوں تاں سمجھ نئیں آندی ڄو واگھا صیب سرائیکی لوک سانجھ دا تھی کے 7 ضلعیں دے صوبے دی قبولیت تے کیویں راضی ھے پیا. تے تساں لوک سانجھ دے منشور دے خلاف کیویں اے لپھو لائی ودے وے ڄو پیپلز پارٹی سرائیکی صوبہ بݨیسی؟ پیپلز پارٹی تساݙی گُھٹی اچ ھِ تاں وت آکھو پیپلز پارٹی کوں ڄو ”23 ضلعیں دے سرائیکی وسیب اچ جمہوری پولیٹیکل کلچر کوئنی، نال نال سرائیکی لوک سانجھ وی سرائیکیاں کیتے صوبے دی ڈیمانڈ کݙئیں نئیں کیتی، تساں وی مہربانی کرکے سرائیکی صوبے دی ڳالھ نہ کرو”.

سرائیکیاں کوں اُنھاں دے حال چھوڑ ݙیو. (اے اَنٹر شنٹرازم دی سٹریٹجی اپݨے کول رکھو).

خفا نہ تِھوائے تساݙی ادا وی مولویاں آلی اے. شاہ محمود قریشی تے یوسف رضا گیلانی ڄے تئیں ضیا دی کابینہ اچ ہین تاں اور آمریت پسند یا آمر پرست ہین، پی پی پی اچ ونڄ رَلن تاں جمہوریت پسند تھی ڳین، شاہ محمود پی پی چھوڑ کے پی ٹی آئی اچ ونڄ کھڑوتا اے تاں اسٹیبلشمنٹ دا ایجنٹ بݨ ڳے. اے بالکل ایویں اے ڄیویں ہندو کافر یا جہنمی اے، کلمہ بھر کے مسلمان تھی ڳے تاں جنتی بݨ ڳے. ول مرتد تھی ڳے تاں سِر قلم کرݨ دی سزا پا ڳے.

طبقاتی لڑائی چھوڑ کے جاگیردار، سرمایہ دار، عوام کوں مُرید بݨاوݨ آلی شخصیتاں تساکوں جمہور دے نمائندے لڳدن تاں لکھ واری لڳن پے، اے ڄیرھی پارٹی اچ ھوون اے میݙے نمائندے نئیں. میݙا نمائندہ او اے ڄیرھا میݙے طبقے اچوں ھے، ڄیرھا نئیں او ذاتی تے خاندانی کروفر کیتے میݙا ووٹ لُٹیندا کھڑے. توں لکھ اختلاف پیا کر.

میں اوہا وسل دے گنڈھے، تے ٹھڈی روٹی تے خوش ہاں، میکوں اسلام آباد اچ نہ بنگلے بݨاوݨے ہِن، نہ ٻال پڑھاوݨے ہِن.

تساݙی سیاست فہمی دا میکوں چنگی تراویں پتہ اے. منظور پشتین ھووے یا افرسیاب خٹک تھوڑے وسائل، تے تھوڑی ڄئیں سیاست فہمی نال بہوں گھٹ پڑھی لکھی پشتون قوم کوں قومی دھارے اچ گھن کے کھڑے ہن.

میں وت آکھساں میں ہک شاعر ہاں (پتہ نئیں ایݙیاں ڳالھیں میں کیویں لکھ ڳیا ہاں) میں سیاست دا ڄاݨوں نہ، تساں سیاست دے ڄاݨو تھی کے سرائیکی وسوں دے منظور پشتین تے افرسیاب وی بݨ سگدے ہاوے بھلا تساݙی گُھٹی وچ پی پی پی ھے پئی ایں کیتے سرائیکی وسوں دی الا بݨݨ آلی پارٹی نہ آپ بݨ سڳے وے نہ ٻِنہاں کوں بݨݨ دا حوصلہ ݙتا وے.

شاعری، تے سرائیکی شعراء تساکوں اونویں وی نئیں بھاندے، بلکہ میکوں پتہ اے ڄو تساں شاعری تے شاعراں دی ہمیش نِکوہی کریندے راندھے وے. مہربانی کرو میکوں شاعر راھوݨ ݙیو، سیاست اچ نہ گھیلو. تساݙی دانش تساݙے راہیں، میݙی سمجھ میݙے راہیں.

میں اے چیپٹر اتھائیں بند کریندا پیاں ہاں. امید اے اڳوں تے تساں میݙے اڳوں اپݨی دانش دا دریا نہ وہیسو.