استعفیں تے الیکشن بائیکاٹ دی ہک پراݨی کہاݨی(1)||مشتاق گاڈی

پیلھا درشن

8 جولائی 2007 دا ݙ یہاڑا ہے۔ لندن دے مہانگے گلیسٹرو ہوٹل دا کانفرنس ہال ہے۔ پاکستان دے چھوٹیں وݙیں، لیفٹ رائٹ سنٹر دے 37 سیاسی جماعتیں دے لیڈر کٹھے ہن۔ ایں مجمع وچ تساکوں نواز شریف، شہباز شریف، مولانا فضل الرحمن، قاضی حسین احمد، رسول بخش پلیجو، عمران خان، قادر مگسی، محمود اچکزئی، اسفند یار ولی سبھے ݙسدے ٻیٹھن۔

جے اتھاں کوئی موجود نئیں تاں چھڑی بے نظیر بھٹو کائیں نی۔ او لندن وچ ہے پر نواز شریف پاروں سݙے ایں اجلاس کنیں ٻاہروں ہے۔

نواز شریف اے۔آر۔ڈی تروڑ چکے۔ او جنرل مشرف دے اعلان کیتے الیکشن دے بائیکاٹ دا قائل ہے ۔ لندن وچ آل پارٹیز ڈیموکریٹک موومنٹ (اے۔پی۔ڈی۔ایم) بݨدی ہے۔ نال ای قومی اسمبلی کنیں استعفیں تے الیکشن دے بائیکاٹ دا اعلان تھیندے۔

ایں سبھ دے پچھوں چوہدری افتخار دی معطلی تے وکیلیں دی تحریک زورشور نال چلدی پئی ہے۔

ݙوجھا درشن

9 ستمبر 2007 دا ݙ ینہہ ہے۔ نواز شریف اسلام آباد ائیرپورٹ لاہندے۔ جنرل مشرف اونکوں گرفتار کر کنیں واپس لندن بھیڄ ݙ یندے۔ کئی جوں چراں نئیں، کئی وݙے مظاہرے تے ٻہوں گرفتاریاں نئیں۔ بھابھݨ ٻھوں اندھاریاں راتیں ہن۔

تریجھا درشن

6 اکتوبر 2007 دا ݙینہہ ہے۔ جنرل مشرف ہک واری ول صدر بݨن دا ووٹ پارلیمنٹ کنوں گھندا پئے۔ اے۔پی۔ڈی۔ایم دے سبھے جماعتیں دے قومی اسمبلی دے 80 ممبران استعفے ݙیندن جݙاں جو پیپلز پارٹی چھڑا الیکشن دا بائیکاٹ کریندی ہے۔

چوتھا درشن

18 اکتوبر 2007 دا ݙینہہ ہے۔ بے نظیر بھٹو جناح ائیرپورٹ کراچی لہندی پئی ہے۔ لکھیں دا مجمع ہے۔ نعرے تے ڈانس ہے۔ پچھوں جنرل مشرف دیاں دھمکیاں تے جان دے لالے ہن۔

ادھی رات کوں کارساز دھماکہ تھیندے، سینکراں پیپلز پارٹی دے کارکن مارے ویندن۔ کربلا دا سماں ہے۔

پنجواں درشن

26 نومبر 2007 دا ݙ یہاڑا ہے۔ سپریم کورٹ دی اجازت نال، کنگ عبداللہ دے پرائیویٹ جہاز اُتیں سوار تھی نواز شریف پاکستان ول آندے۔ 100 بندے اوندے استقبال کیتے ائیرپورٹ تائیں پڄدن۔ او ہک واری ول جنرل الیکشن دے بائیکاٹ دا اعلان کریندے۔

چھیواں درشن

4 دسمبر 2007 دا ݙ یہاڑا ہے۔ الیکشن کمیشن نواز شریف کوں الیکشن لڑن کنیں نااہل قرار ݙے ݙ یندے۔ نواز شریف تے اے۔ پی۔ڈی۔ایم بضد ہے جو او الیکشن دا بائیکاٹ کریسن۔ بے نظیر بھٹو ہر صورت الیکشن لڑن دا آہدی ہے۔

سَتواں درشن

10 دسمبر 2007 دا ݙ یہاڑا ہے۔ بنواز شریف اعلان کریندے جو اوندی پارٹی الیکشن لڑسی۔ اے۔پی۔ڈی۔ایم ٹائیں ٹائیں فش تھی ویندی ہے۔ فضل الرحمان وی الیکشن وچ آ ویندے۔ اے۔ پی۔ڈی۔ایم دیاں چھوٹاں جماعتاں حاصل بزنجو، رسول بخش پلیجو ، عمران خان تے قاضی حسین احمد دی لیڈرشپ وچ الیکشن دے بائیکاٹ دا اپݨا فیصلہ جاری رکھدن۔

اَٹھواں درشن

27 دسمبر 2007 دا کالا ݙ ینہہ ہے۔ راول راٹھ دی پنڈی وچ بے نظیر بھٹو قتل تھیندی ہے۔ گواہی نشان سبھ مٹا ݙتے ویندن۔ کہرام مچا پئے۔

نواز شریف وت ہک واری الیکشن دے بائیکاٹ دا نعرہ لیندے۔

ناواں درشن

گڑھی خدا بخش بے نظیر بھٹو دی تدفین پچھوں پیپلز پارٹی دا اجلاس۔ الیکشن کہیں صورت ملتوی نہ کرݨ دا مطالبہ۔ آصف علی زرداری کوں آہدے جو او اپݨے الیکشن بائیکاٹ دا فیصلہ واپس گھنے۔ نواز شریف ہک واری ول الیکشن وچ واپس آ ویندے۔

(کہانی جاری ہے)