سرائیکی وسیب دیاں یونیورسٹیاں تے سرائیکی لینگوئیج ڈیپارٹمنٹس||مشتاق گاڈی

جݙاں رفعت عباس سئیں دا ناول "لوݨ دا جیوݨ گھر” چھپیا تے او پڑھت وچ آیا تاں اساں سوچے جو ایں ناول اتیں ڳالھ تھیوݨی چاہیدی ہے۔ اے ناول چنڳا بھلا ݙائیلاگ منگدے۔ ہک ننویں ویورت کاری تے سمجھ ٻوجھ چاہیدی ہے اینکوں پڑھݨ کیتے۔

سوچݨ نال تاں چھڑا کجھ نئیں تھیندا۔ پیلھی سمسیا اے تھئی جو کتھاں بیٹھک رکھی ونڄے؟ ملتان شاہر چیتے وچ آیا۔ سنگت صلاح ݙتی جو بہاالدین زکریا یونیورسٹی دے سرائیکی ایریا سٹڈی سنٹر وچ رکھیا ونڄے۔ میکوں ہک ماݨ اے وی ہئی جو ایں سرائیکی ایریا سٹڈی سنٹر دی لائبریری کوں میں اپݨے پیو فداھسین گاݙی دیاں سینکڑاں کتاباں دان کیتیاں ہوئیاں ہئین۔ ایں ڳالھ اُتیں احسن واگھا تے کجھ ٻئی سنگت دے دڑکے وی سݨے ہئین جو اے بیکار کم کیتے وے۔ سرائیکی وسیب دے یونیورسٹیں دے سرائیکی ڈیپارٹمنٹس کہیں کار جوڳے نئیں۔ اتھاں اردو زدہ، ݙرے ہوئے، سکالرشپ کنیں بھڄے پروفیسرز دا راج ہے۔ میں وت وی ایں خیال وچ جو کجھ وی ہے ساݙے اپݨے سرائیکی ٻولی دے ڈیپارٹمنٹس ہن۔

ایں ماݨ تے یقین نال میں بہاالدین زکریا یونیورسٹی دے سرائیکی ایریا سٹڈی سنٹر نال رابطہ کیتا۔ میسجز بھیڄے، فون کیتے۔ میکوں ہک ڳالھ دا اے وی یقین ہئی جو یونیورسٹی دے ہک ادارے دی حیثیت وچ سرائیکی ایریا سٹڈی سنٹر کوں تاں اڄوکے سرائیکی ناول وچ ویسے ای ݙونگھی دلچسپی ہوسی۔ اے تاں ہک اکیڈیمک کم ہے، ایندے وچ تاں کئی سیاست وی نئیں۔

میݙی ساری خوش فہمی اوں ویلھے ہوا تھی ڳئی جݙاں بھنے ترٹے بہانے بݨائے ڳئین، فون چاوݨ تے ڳالھ کرݨ کنیں بھڄیا ڳیا۔ لنڈی ڳالھ اے ہے جو اے "چِتوا” ݙتا ڳیا جو بھئی ساکوں اینجھے پروگرام وچ کئی دلچسپی نئیں۔ چھیکڑ اساں اے پروگرام پاسٹورل انسٹیٹیوٹ وچ کیتا تے وݙا چنڳا تھی ڳیا۔

ایں سارے پروسس وچ سرائیکی وسیب دے سرائیکی لینگوئیج ڈیپارٹمنٹس میݙے اڳوں سوجھلا تھی ڳئے۔ میں آپ یونیورسٹی پڑھینداں تے سمجھ سڳداں جو پچھوں کیا ݙر بھئو تے سیاست ہے؟

ایں ساری سمسیا سانگے رفعت عباس دا رام راوݨ لیلا دے پچھوکڑ وچ لکھیا ہک شعر چیتے وچ آندے جیندا مطلب ہے جو "راوݨ ساݙے وچوں ہے پر ساݙے وچوں نئیں۔”

چھیکڑ وچ ایہو سوچے جو ایں ہووݨی کوں سنگت نال شئیر کرݨا چاہیدے۔ اے میݙا کئی ذاتی مسئلہ تاں نئیں۔ اے پبلک یونیورسٹیز ہن تے سرائیکی ڈیاپرٹمنٹس انہیں دا پارٹ ہن۔ سنگت آپ سوچے جو انہیں ڈیاپرٹمنٹس دا ساݙے نال اپرپ کݙاں تائیں رہسی؟

(ریفرنس تے ریکارݙ کیتے سرائیکی ایریا سٹڈی سنٹر دی لائبریری کوں دان کیتے کتابیں سانگے وصولی دا اے ہک لیٹر نال اٹیچ کریندا پیاں جو گواہی رہوے۔)