نام تیڈے کوں کافی کیتا جگ وچ گاندے رہسوں،۔۔۔محمد الیاس کبیر

نام تیڈے کوں کافی کیتا جگ وچ گاندے رہسوں،

اساں ملوہا درشن کیتے ول ول آندے رہسوں ،

اساں تیڈی بھوئیں دی ساوِل ون’ تیڈے دے پکھو،

باغ بہشتے مُول نہ وڑسوں توں بن مونجھے رہسوں،

ایں نیل کتھا دا شاعر شمیم عارف قریشی بظاہر تاں جھوک لڈا گئے پر ہر تل وطنی دے سینے وچ انہاں دی یاد دا ڈیوا بلدا پئے. بھوئیں نال محبت کیا ہوندی اے، ایندے وَن سَوَنے رنگ ساکوں شمیم سئیں دی لکھتاں اچ نظردن. ایہہ رنگ کَہِیں ویلے ساکوں انہاں دی کافیاں اچ جھاتی پیندے، چمکدے ہوئے ملدن اتے کتھائیں انہاں دی نثری لکھتاں اچ نشابر تھیندن.

"حرفِ زمیں زاد” شمیم جنت مکانی دی اردو اتے سرائیکی اچ لکھی گیاں نثری لکھتاں ہن. ہک جیندا جاگدا جگ جہان نظردے، ایندے وچ ملتان ذیشان دی گالھ وی ہے، جیندے وچ سندھ وادی دا تصور الم وی ہے اتے سقوطِ ملتان دا تاریخی حوالہ وی. جیندے وچ ساکوں ایویں لگدے جو شمیم صیب خود او سارا دھرو اپنڑی اکھاں نال ڈیھدے پئین.

شخصی مضمون وی ہن. خواجہ فرید سئیں تے پورا ہک گوشہ ہے. ایندے علاوہ ایں کتاب اچ مختلف موضوعات تے ڈتے گئے انہاں دے تاثرات وی شامل کیتے گیئن.

سرائیکی ایریا سٹڈی سنٹر بہا الدین زکریا یونیورسٹی ملتان دے ڈائریکٹر استادِ محترم سئیں ڈاکٹر ممتاز خان کلیانی کوں نو لکھ مبارکاں جو انہاں نے ایں دھرتی دے سچے پتر دیاں لکھتاں چھاپ تے محفوظ کر ڈتن. کلیانی صیب نے ایہ کم کر تے اپنڑی دھرتی نال جڑت دا بہوں عمدہ ثبوت ڈتا اے. کتاب دے حرفِ آغاز وچ وی اے محبت جھلکیاں مریندی پئی اے.