انقلابی تحریک وچ شعراء دا کردار۔۔۔کرن لاشاری

کہیں وی انقلابی تحریک دے وچ شعراء دا کردار اہم ترین ھوندے، اے شعراء ہی ھوندے جو انقلابی کارکنیں دی سوچیں کوں دل دے درد کو خوبصورت الفاظ دی جڑت نال بیان کریندن، اے الفاظیں دی جڑت دی تندیر تاں ونڄ جڑدی ھے ڄݙاں انسان خود انقلابی مجاہد ہووے اور اپݨی قوم تے خطے دا درد رکھیندا ھووے، ـــــــــــــ

اساکوں فخر ھے اساݙا سرائیکی وسیب ایجھے مجاہد انقلابی شعراء تے ادیباں نال مالا مال ھے، اور انھیں وچوں ہک نمایاں تے روشن ناں ھے استاد نذیر احمد فیضؔ مگی دا، جنھاں سرائیکی شاعری دے وچ انقلاب تے مذاحمت دے نویں اسلوب ایجاد کیتے، سرائیکی شاعری کو بکھ ݙکھ تے ہجر فراق تو کڈھ تے بدلہ، اتحاد، جنگ، تے انقلاب دے رنگ ݙتے، اور میں سمنجھدی ھاں شائد فیض مگی سئیں سرائیکی زبان دے او پہلے انقلابی تے بہادر شاعر ہن جنھاں واضح الفاظ دے وچ سرائیکی قوم دے دشمݨیں دی نشاندہی،کیتی ھے، اور واضح الفاظ دے وچ روہی، تھل، دمان، دے وسائل کوں لٹݨ والے وردی تے بغیر وردی کالے انگریزاں دے کرداریں دے ناں ݙساے ھن، ــــــــــــــــــ

بلاشبہ مگی سئیں سرائیکی قوم دے ہک عظیم مجاہد ھن جنھاں اپݨی شاعری نال سرائیکی قوم روݨ دھوݨ دی بجاے بہادری نال اپݨے حقوق کو واگزار کرݨ دی تعلیم ݙتی،، ایجھے دھرتی دے سپوت صدیاں وچ پیدا تھیندن اور سرائیکی کاز دی مـزاحمت دا جتھاں وی زکر آسی تے یقیناً پہلا ناں استاد فیض مگی سئیں دا ہوسی، ــــــــ٘ـــــ

اساݙا مطالبہ ھے جو سرائیکی اکثریتی اضلاع دے وچ پرائمری سطح تو سرائیکی زبان وچ تعلیمی نظام رائج کیتا ونڄے اور نصاب دے وچ استاد فیض مگی سئیں دے فلسفے اور شاعری کو شامل کیتا ونڄے!! ایندے علاوہ باہمت سرائیکی نوجوانیں کیتے سرائیکی وچ مزاحمت دا نشان فیض مگی ایوارڈ دا وی سلسلہ جاری کیتا ونڄے،