وزیراعظم دے ناں کُھلا خط۔۔۔کرن لاشاری

وزیراعظم پاکستان جناب عمران خان صاحب امید ھے تساں ٹھیک ھوسو بلکہ روز tvتے ݙیہدے ھیں تساں ماشااللہ چنگے بھلے ہی ہیوے،

جناب اعلیٰ تساکوں یاد ہوسی 2018دے الیکشن تو پہلے سرائیکی اجرک پا تے میڈیا دے سامھے سرائیکی عوام نال وعدے تے معاہدے کیتے ھن جو تہاکوں حکومت ملی تاں 100 ݙینھ وچ انڄ صوبہ بݨا ݙیسو، خیر وعدے معاہدے تے قسماں قران تاں پورے ملخ دی عوام نال کیتا ھاوے، اور معیشت تے خوشحالی دے ڈھیر سبز باغ ݙکھالے ھن، ایندے علاوہ اپݨے سیاسی مخالفین کو تڑیاں تے مندے وی ڈھیر ݙتا ھاوے،،

پر افسوس جو تہاکوں حکومت ملے ݙو سال تو ودھ عرصہ گزر گئے، تے ھݨ تک ہک وعدہ، معاہدہ، قسم، تڑی، دھمکی وغیرہ کئی پوری نی کر سڳیے،،،،

اتوں معیشت تے خوشحالی دے جیہڑے سبز باغ ھن او وی ماشااللہ ککڑیاں انڈے، کٹے تو تھیندے بھنگ دے سبزے تک آ ڳین، حالانکہ آئین پاکستان، تے اللہ دے قانون دے مطابق جیہڑا بندا کوڑا، تے وعدہ خلاف ہووے او صادق تے امین کینھی ھوندا، خیر!!! سݨیے قوم دے وسیع تر مفاد وچ نظریہ ضرورت وی آخر کئی شے ہوندی ھے!! جیندے اڳوں عدلیہ سمیت ہر قانون کوئی معنی نہ رکھیندا،،

برحال سیاست سیاست ہوندی ھے ایندے وچ کئی پیچیدگیاں، بلکہ مجبوریاں ہوندن، جو تساکوں وی درپیش ھن،

ایندے علاوہ. سیلکڈڈ تے حکومت دا نشہ وی بھرپور ھے. پر یاد رکھو اے تاڄ تے شاہی نت نی راہݨی 2023وچ ہک واری ولا تہاکوں ایں عوام دے سامھے آوݨے، خصوصاً سرائیکی قوم کنے ولا سرائیکی اجرک پا تے آوسو، تاں سوچو کہیڑا منہ دھر تے آسو، کیونجو سرائیکی وسیب دا حال جو ستر سال پہلے ھا تساݙی حکومت وچ اوں تو مـزید بدتر تھی ڳئے، تہاݙی تبدلی دا نعرہ دی حقیقت صرف ایہا ہے جو کوئی وی کرپٹ سیاستدان اپݨی پارٹی چھوڑ تے ptiجوائین کرے تے اوندی پچھلی ساری کرپشن معاف،،

جناب وزیراعظم تساں کراچی وچ الیکشن دے جلسے وچ آکھیا ہا جو میں سرائیکی پیو دا پتر ھاں، یعنی تساں سرائیکی وسیب دے تل وطنی ہو،،

تاں ولا تہاکوں وسیب دے وچ. روہی تھل دمان دا تسا روہیلا کیوں نی نظردا، پورے وسیب دے وچ غیر قانونی غیرمقامی آبادگاری کیوں نی نظردی،، تعلیم دی اہمیت تو بے خبر سرائیکی ٻال کیوں نی نظر امدا،

جناب وزیراعظم ہر ویلے سیلکٹرز دا موڈ ہکو جیا نی راہندا، تساݙی سیاست یقیناً بچ سڳدی جے تساں اپݨی ماءدھرتی نال وفاداری کرو، آو ہمت کرو ہک واری ولا سرائیکی اجرک پا تے مکمل صوبہ سرائیکستان دا اعلان کرو، صوبے سانگے آئینی اکثریت ایویں پوری کرو جیویں ایکسٹینشن ݙیوݨ کیتے پوری کریندے ھو، تاں یقین کرو سیاست دے وچ سندھ دی پی پی، تے پنجاب دی ن لیگ وانگوں سرائیکی وسیب وچ تساں وی امر تھی ویسو،،

وسلام

تہاݙی خیر اندیش

سرائیکی وسیب دی ہک عام ووٹر تے واسی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کرن لاشاری صدر سرائیکی عوامی تریمت تحریک پاکستان ہن۔