سراٸیکی تحریک انتشار دا شکار کیوں؟۔۔۔جام اظہر مُراد لاڑ

جام اظہر مراد لاڑ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سراٸیکی تحریک دا مونڈھ بہاولپور صوبہ محاذ کوں سراٸیکی صوبہ محاذ اچ مصور سراٸیکستان سٸیں ریاض ہاشمی نے بدل تے ایہوجا رکھیا کہ سراٸیکی صوبے دی تحریک ہک سیاسی ایشو دے طور تے حکمراناں تے سیاستداناں کوں منن تے مجبور کرڈتا۔اے بھروا سفر سیٹھ عبیدالرحمن,بیرسٹر تاج لنگاہ,حمید اصغر شاہین,بابا راز جتوٸی,مغل اعظم کانجو,حسن رضا بخاری,استاد فدا حسین گاڈی,کامریڈ عبدالکریم ڈمرہ,جہیں سینکڑاں عظیم شخصیات دی جدوجہد تے قربانیں توں بعد عاشق بزدار,نذیرلغاری,عبدالمجید خان کانجو,خواجہ غلام فرید کوریجہ,کرنل عبدالجبار عباسی,رانا فرازنون,مجاہد جتوٸی,ظہور دھریجہ,راشد بھٹہ,ملک اللہ نواز وینس,انجینٸر شاہ نواز خان مشوری,صوفی تاج گوپانگ,مشتاق فریدی,سعید خاور,شہاب اویسی,اصغر نہر,أصف خان,اکبر خان ملکانی,تریمت اگوانیں اچ نخبہ تاج,کرن لاشاری,عابدہ بتول,ڈاکٹر سعدیہ کمال,سعدیہ شکیل لاشاری,ادی نیناں,اجالا لنگاہ,راشدہ بھٹہ دی صورت اچ عزم تے یقین دا قافلہ منزل دی طرف گامزن اے۔وسیب دے سینکڑاں ادیب,دانشور,شاعر,موسیقیکار تے کارکنیں دیاں جوانیاں تحریک تے قربان تھی چکین۔

تحریکیں اچ اتار چڑھاو امدے رہے ویندن۔جتنے وی پلیٹ فارم تے اگوان تحریک کیتے کم کریندن انہاں دے طریقہ کار تے سٹاٸل توں تاں اختلاف کیتا ونج سگدے پر ہک سچے رہبر,قوم پرست تے کارکن ہوونے دے ناطے اساڈی منزل ہکو ہے۔سیاست اچ کوٸی وی چیز حرف أخر کاٸنی ہوندی,کہیں دے وی متنازعہ عمل نال تحریکاں ختم نی تھی ویندیاں.گروہی مخالفت دے باعث او عمل نال اے ثابت کرنا جو اے غدار ہن۔تحریک کیتے ناپسندیدہ عمل ہے۔کجھ عرصہ توں سوشل میڈیا تےسراٸیکی جماعتیں تے انہاں دے کارکنیں دا ہک ٹرینڈ چلدا پے تھوڑا جا کجھ تھیندے اوٹ پٹنگ پوسٹ شٸیر,تحریک دے حوالے نال کجھ اختلافی مسلہ ہووے تاں اساڈے اگوان وی پوسٹاں کرن اچ پچھوں نی رہندے۔ہک اے طرز عمل وی قابل افسوس اے او اے ہے جو جینکوں وی فیس بک چلاون أگی ہے انوں پارٹی بنا گھدی ہے۔

واٹس اپ تے صوبے بنڑدے پن۔ذرا جے مسلے تے ہک بیے دے خلاف سوشل میڈیا تے ایہو جی فضا بنا ڈتی ویندی ہے جو ایویں لگدے پوری سراٸیکی قوم اپت اچ بھڑی پٸی ہے۔اٸے روز فلانے کوں پارٹی اچ کڈھ ڈتا ویندے تے فلانے کڈھیں ہووے کوں اپنی پارٹی اچ شامل کرن سانگے ایری چوٹی دا زور لاتا ویندے۔ایہو زور نویں لوکیں دی شمولیت اچ لگدا رہے ہا تاں اج تحریک دے وچ ہزار ورکر پیدا تھی ونجن ہا۔اساڈی تحریک دے وچ ہک بیماری الطاف حسین والی ڈھگ لوکیں کوں ہے۔أٸے روز اساں سوشل میڈیا تے ڈیکھدوں اج فلانے نے جذباتی تھی تے اپنی پارٹی دے عہدے توں استعفی ڈیونا دا اعلان کرڈتے اج فلاناں سراٸیکی تحریک توں مایوسی تھی تے اعلحیدگی دا اعلان کرڈتے۔تھوڑی دیر بعد نام نہاد کارکنیں تے چاہون الیں دے کمنٹ تے پوسٹاں لگن پے ویندین الطاف بھاٸی خدا دا ناں منو تساں پارٹی یا تحریک اچ واپس ول أو۔تساں نہ أٸے تاں ست کروڑ سراٸیکی عوام رل ویسے۔

کجھ ڈینھ بعد پتہ نی کیڑھے نک نال پوسٹ أویندی ہے دوستیں مجبور کرڈتے ہوون میڈا جیون مرن تحریک کیتے ہے میں تاں أکھساں اے سارا کجھ بڈ مرن دا مقام ہے 72سالیں توں تحریک چلدی پٸی اے اج تٸیں اساڈی تنظیمی تربیت ای کوٸی نی کرسگیا۔اساں تربیتی یافتہ تنظیمی لوک ہوندے تاں سوشل میڈیا تے ایہوجیاں حرکتاں ای ناں کریندے۔جماعتیں اچ اختلافات ہوندے رہندن,مساٸل پیدا تھیندے رہندن انہاں دا تنظیمی طریقہ کار ہوندے۔ویسے کجھ سراٸیکی اگوانیں دی غیر سنجیدگی وی قابل افسوس ہے۔ہن اساں امدوں اصل ایشو تے او اے ہے جو ڈھگ سارے بلکہ اکثریت دی خاہش ہے جو سراٸیکیں دی ہکو سیاسی پارٹی ہووے تے اوندے کیتے جمہوری انداز نال اساں اپنے حقوق دی تحریک کوں اگووں تے ودھاوں۔ایں حوالے نال وی ڈھگ کوشتاں کیتیاں گن پر بے سود ثابت تھیاں۔سراٸیکی تحریک دے دوران کٸی اتحاد بنیے تے کٸی ٹٹ گے۔

ہک اتحاد ایہو جیا بنیا جیں ڈھگ ساری بہوں وڈی کامیابی سراٸیکستان لانگ مارچ دی صورت اچ حاصل کیتی۔اے اتحاد بنن دی اصل وجہ سوجھل دھرتی واس دی اے پی سی ہک پارٹی,ہک جھنڈا,ہک لیڈرتے ہک ایجنڈے تے اتفاق کیتے ہاٸی جیک کرتے سراٸیکستان عوامی اتحاد دی صورت اچ لانگ مارچ دی تریخ تے تیاریں کیتے سراٸیکی اگوانیں دے کٹھ تے پورے وسیب اچ ہل چل مچ گی۔لانگ مارچ دے دوران ڈھگ سارے مساٸل وی پیدا تھیے تے کامیاب لانگ مارچ دیاں دھماں وی مچیاں رہے گیاں۔اے کامیابی ہک ایہو جے بندے کوں ناں بھاندی پٸی ہاٸی جیندا ناں تے فوٹو اتوں دی بجاٸے اشتہار تے تلے أگٸی ہاٸی۔

جیں لانگ مارچ دے دوران سازشیں دے جال ویچھاٸے۔لوکیں کوں لانگ مارچ اچ ونجن توں رکیندا رہیا ۔لانگ مارچ دے ابتداٸی فنڈ اچوں خرچیں دے ناں تے پیسیے اچ ہیر پھیر کیتی۔اوہو بندہ تھوڑے جیں اختلافات توں فیدہ چا تے کامیاب لانگ مارچ تے اگوانیں کوں کٹھا کرتے خراج تحسین پیش کرن دے ناطے انتشار پیدا کرن شروع کرڈتا۔سراٸیکستان عوامی اتحاد دے زوال دا ٹاٸم شروع تھیا گیا۔جڈاں ہر سراٸیکی کٹھ تے کانفرنس اچ سراٸیکی اگوان متحد تے یکجہا ہوندے ہن۔ول سراٸیکستان صوبہ محاذ تے سراٸیکستان گرینڈ الاٸینس دے نال تقسیم تھی گے۔سراٸیکی کاز دے حوالے نال ہر ایشو تے سراٸیکی قوم وی تقسیم تھی گی تے ہک ایہو جی فضا بنا ڈتی گی جو اتحاد تاں ہک پاسے ہر جماعت تے تنظیم اچ بدگانیاں پیدا کرتے أپس وچ نفاق پیدا کرڈتا گیا۔

تحریک اچ اتحاد دی کوشیت کرن الیں کوں ہاٸی جیک تے گروپ بندی دی فضا کوں فروغ ڈتا ویندا ہا۔لانگ مارچ کوں ترے سال تھی گن پر اج وی تحریک اچ انتشار تے یکجہتی کوں برداشت ناں کرن الے کردار بابا تاج لنگاہ دی سالگنڈھ دے موقع تے ہک دفعہ ول سراٸیکی اگوانیں دے بنیے اتحاد کوں توڑن کیتے پروپگینڈہ مہم شروع کیتی ہوٸی ہے۔او کردار کرنل عبدالجبار عباسی,خواجہ غلام فرید کوریجہ تے سراٸیکی پارٹی دے کجھ لوگاں کوں استعمال کرتے نہ صرف سراٸیکی جماعتاں اچ نفاق پیدا کریندے پٸے بلکہ سراٸیکی اگواناں دے اتحاد اچ سب توں وڈی رکاوٹ ہے۔اوں کردار کوں عام سراٸیکیسٹ تاں نی جاندے بلکہ سراٸیکی اگوان ضرور جاندن۔او کردار مہدی الحسن شاہ دا اے۔

۔۔۔۔۔۔۔۔۔۔۔۔۔۔۔۔۔۔۔۔۔۔

جام اظہر مراد چٸیرمین سراٸیکی فاونڈیشن  ہن

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ادارے دا لکھاری دی رائے نال متفق ہوون ضروری کوئنی۔۔ ایں موضوع تے لکھن والے احباب سانگے ڈیلی سویل دے صفحات حاضر ہن

About The Author

ویب ڈیسک

See author's posts