بلوچستان کے طلبہ پڑھنا چاہتے ہیں ان سے قلم چھین کر زیادتی نہ کریں، بلوچ طلبہ کونسل

بلوچ طلبہ کونسل کے رہنماؤں نے ملتان پریس کلب میں ذرائع ابلاغ کے نمائندوں سے گفتگو میں کہا اس پریس کانفرنس کے توسط سے ہم بلوچستان کے طلباء کے اسکالرشپس سے متعلقہ یونیورسٹی کے فیصلے سے آپ دوستوں کوآگاہ کرنامقصود ہے تاکہ آپ ساتھیوں کے ذریعے ہم اپنے مسائل و مطالبات ارباب اختیار تک پہنچا سکیں
.تعلیم کسی بھی ملک ،قوم ،صوبے،سماج اور جمہوریت ،ترقی کیلئے بے حد ضروری ہے اور تمام سنجیدہ اقوام تعلیمی ترقی کو مرکزیت کا درجہ دیتے ہیں کسی بھی ریاست میں برابر تعلیمی ترقی کیلئے ریاست کا فرض بنتا ہے کہ وہ ہر شہری کو یکساں مواقع بھی دے مگر بدقسمتی سے بلوچستان و سابقہ فاٹا کے علاقوں میں اس سلسلے میں کوئی سنجیدہ کوشش نہیں کی گئی خدا خدا کر کے پنجاب حکومت نے بلوچستان کے معروضی حالات اور تعلیمی زبوں حالی کے پیش نظر فراخدلی کا مظاہرہ کرتے ہوئے بلوچستان کے طلباءَ کیلئے پنجاب کے تعلیمی اداروں میں مفت تعلیم و ہوسٹل کی مفت سہولت کا اعلان کیا جس کے بعد کئی طلباء و طالبات نے تحصیل علم کے لیے پنجاب ۔ ۔ کے تعلیمی اداروں کا رخ کیا
آپ بہتر سمجھتے ہوں گے کہ جب اتنے تعداد میں نوجوان ایک صوبے سے دوسرے صوبے آئے  تو لامحالہ اس کے اثرات نہ صرف تعلیمی میدان میں واضح نظر آنے لگے  بلکہ وفاقی اکائیوں کے مابین  بڑھتی خلا کم کرنے,ثقافتی نفوذ اور ایک دوسرے کے روایات جاننے کا ایک سنہری موقعہ ملا

ایڈمشن کا عمل شروع ہوتے ہی تضادات سے بھرپور اخباری بیانات کی بھرمار نے طلباء کے اندر کنفیوژن پیداکیے رکھا ظاہر ہے پسماندہ علاقوں کے غریب بچے جو شاداں تھے کہ شاید انہیں بھی پڑھنے کا موقعہ ملے گا یونیورسٹی کی جانب سے اسکالرشپس کے خاتمے کا سن کر تلملائے ہوں گے,آشفتہ حالی نے ان کے روشن مستقبل کا خواب بے چراغ لالٹین کی مانند تاریک دکھایا ہوگا
وہ ضرور دکھی ہوں گے وہ یہ سوال کرنے میں حق بجانب ہیں کہ چشم شوق کے ابھرتے دن اتنے ہی جلد بے مہر شاموں میں تبدیل ہونے کیلئے ہی تھے تو وہ حسین خواب دکھائے ہی کیوں گئے
جہاں تک اس فیصلے کا تعلق ہے اس میں یونیورسٹی نے شروع دن سے اضطراب کی کیفیت برقرار رکھی کبھی وائس چانسلر کی جانب سے کہا گیا میرے اختیار میں نہیں کہ میں سیٹیں ختم کروں تو کبھی بلوچستان و فاٹا کے طلباء کو یونیورسٹی پر بوجھ قرار دیا گیا مگر فیصلے کے بعد نوٹیفیکیشن جاری کرنے میں بھی یونیورسٹی انتظامیہ نے ٹال مٹول سے کام لیا محترم وائس چانسلر نے سینیٹ کی قائمہ کمیٹی کے سامنے اس کا اعتراف کیا کہ اس بار یونیورسٹی نے بلوچستان کے طلباء سے فیسیں وصول کرنے کا فیصلہ کیا ہے اس میں اکبر کنڈی صاحب نے یہ موقف اختیار کیا کہ ادارے کو مالی مسائل کا سامنا ہے مگر سوال یہ ہے بلوچستان و فاٹا کے طلباء کو کیوں گھسیٹا جارہا ہے اسکالرشپس دینے کا فیصلہ گورنمنٹ نے کیا ہے تو اسکالرشپس پر پڑھنے والے طلباء پر بندشیں سراسر زیادتی و ناانصافی کے زمرے میں آتا ہے
یہ فیصلہ گورنمنٹ آف پنجاب نے کیا تھا گزشتہ سال پنجاب گورنمنٹ نے ایک نوٹیفیکیشن کے ذریعے اوپن میرٹ پر آنے والے طلباء کی اسکالرشپس کی بحالی کےلئے یونیورسٹی کو ایک لیٹر بھی بھیجا مگر یونیورسٹی نے تاحال نہ صرف اس لیٹر کو کوئی اہمیت نہیں دی بلکہ افسوسناک امر یہ کہ ریزرو سیٹوں پر آنے والے طلباء کا بھی راستہ روکنے کا فیصلہ کیا بلوچستان کے طلباء یہ سوال کرتے ہیں کہ یہ بلوچستان جیسے پسماندہ صوبے کے ساتھ دوہرا جبر کیوں؟ اگر گورنمنٹ نے ایک فیصلہ کیا ہے تو یونیورسٹی کیوں اس کے برعکس طلباء کی تعلیم پر قدغنییں لگانا چاہتی ہے
بلوچستان کے طلباء پڑھنا چاہتے ہیں ان سے قلم چھین کر زیادتی نہ کریں حکومت یونیورسٹی کو پابند کرے کہ وہ ریاستی پالیسی کے برعکس فیصلوں سے اجتناب کرے
اس پریس کانفرنس کے توسط سے ہم گورنمنٹ آف پنجاب سے اپیل کرتے ہیں کہ اس مسئلے کو سنجیدگی سے دیکھے کہ یونیورسٹی انتظامیہ کیوں گورنمنٹ کی پالیسی کے برعکس طلباء کے مستقبل داو پر لگانے کے خواہاں ہے
ہم جناب وزیراعظم صاحب ،,وزیراعلی پنجاب اور گورنرپنجاب سے مطالبہ کرتے ہیں خدارا! ایسے تعلیم دشمن فیصلوں کا نوٹس لیں
ہم تمام سیاسی جماعتوں,اسٹوڈنٹس تنظیموں اور ہر باشعور, پڑھے لکھے علم دوست شخص سے یہ مطالبہ کرتے ہیں کہ خدارا اس فیصلے کیخلاف ہماری آواز بنیں

About The Author

ویب ڈیسک

See author's posts