ہک عجیب رویہ ۔۔۔ زلفی

کُجھ نہ کرݨ کولو کجھ نہ کُجھ کرݨ بہتر حے۔ بے روزگاری دے اپݨے عذاب ہوندن تے بندہ شودہ ایں سمندر آؤ نکلݨ واسطے جڈو کڈو تھٻاکے مریندے ، ہتھ پیر چلیندے تے اپݨی سروائیول واسطے اُپٹھے سدھے آھر وی کریندے۔
میکوں وی کہیں سنگتی صلاح ڈتی حے جو توں نکما ودیں اپݨا یو ٹیوب چینل چا بݨا چل پیا تاں کجھ نہ کجھ روزی روٹی بݨ پوسی۔ آھدن بُڈݨ آلے کوں ککھ دا آسرا چاہیدا ہوندے اساں وی اپݨا یو ٹیوب چینل بݨا گھدا تے پہلے پہلے اپݨے کثیف قسم دے نظریات تیں مبنی وی لاڳ شروع کیتے جیکوں چند دوستیں دے سوا کہیں وی نئیں ڈٹھا۔ ول چند دوستیں کوں منت سماجت کیتی یار ساڈا چینل سبسکرائب وی کرو چا تے ویڈیو وی ڈٹھی کرو ۔۔سوشل میڈیا ہیک وسیع سمندر حے ساکوں کہیں لیفٹ نہ کرائی تے اساں ول سوچیا کوئی حکمت عملی تبدیل کروں تے عام لوکیں کوں وی اپݨے چینل تیں کجھ نہ کجھ چاڑوں۔۔وت کہیں ویلھے موسیقی تے کہیں ویلھے علاقے دی سیر شروع کر ڈتی تے کہیں ویلھے معتبر لوکیں دے انٹرویو۔۔دال ول وی نہ ڳلی تے اساں مزید مخمصے دا شکار تھی ڳئے تے کامیاب یو ٹیوبر کوں ڈیکھݨ شروع کر ڈتا جو او کیا کریندن جو انھاں دے ویوز لکھاں اچ ہوندن۔۔
ول ساکوں کہیں آکھے توں کجھ ٹیکنیکل چیزاں وی سکھ گھن۔ کجھ سافٹ وئیر ہن، کجھ ایڈیٹنگ دا کم حے تے کجھ ٹیگ ، تھمب نیل وغیرہ وغیرہ۔۔
اساں کجھ دوستاں کوں منت کیتی تے کجھ یو ٹیوب تیں ویڈیوز ڈیکھ کے گزارہ مزارہ تھی ڳیا۔
آکھݨ دا مطلب اے حے جو اے یو ٹیوب چینل بہوں وقت منگدے تے ایندے واسطے چنگا بھلا کم کرݨا پوندے ول کتھائیں ونڃ کے ہیک ویڈیو تیار تھییندی حے۔
ایں ساری محنت مزدوری تے پلو پیسے لاوݨ دے بعد ہلکا چنگا کم اپݨے چینل تیں چاڑھ ڈتا۔
ول وی کوئی خاص ریسپانس نہ ملیا۔
ول میں سوچیا کوئی نواں تجربہ کروں تے ہیک چنگی نہیں ویڈیو بݨا تے چڑھا ڈتی تے اوندے اچ سسپینس پیدا کرݨ سانگے کجھ مافوق الفطرت ٹائب آوازاں وی پا ڈتیاں تے اُنھاں کوں آکھ ڈتا جو اے جن ہن۔
ایکوں ٹیکنکل زبان اچ تجرباتی سینما آھدن۔. اے عام تام ٹرم حے تے ایکوں فلم یا ڈاکومنٹری اچ بہوں ورتیا ویندے۔۔جیرھے فلم ، تھیٹر یا ڈرامے دی ٹیکنیک دی الف ب جاݨ دے ہن انھاں واسطے اے بہوں ہی عام ڳالھ حے۔

اے وی ڈیکھو:دوسری مخلوق جن کی آواز پہلی بار ریکارڈ کی گئی

پر ایں ست منٹ دی ویڈیو اچ جیرھی بہوں شاندار ویڈیو ہائی اوندے اچ ادھا منٹ او آوازاں ہن تے اوندے اُتیں سنگت کولو عجیب ریسپانس ملیا۔۔۔کہیں آکھیا زلفی پاگل تھی گئے تے کہیں آکھے ایکوں کہیں نفسیات دے ڈاکٹر کوں ڈیکھالو تے کہیں کجھ آکھیا تے کہیں کجھ آکھیا۔۔اے جاݨے بغیر جو یار اے چینل اوندا ذاتی چینل حے کہیں دا کوئی سٹیک کائینی اوندی مرضی او ایندے اتیں جو چاڑے۔۔بہرحال جتھاں سپورٹ دی لوڑھ ہائی اتھاں کہیں کوئی تسلی دلاسہ یا مدد نہ کیتی جتھاں جنگھ چھکݨ دا موقع ملے اُتھاں خوب لتاڑ شروع کر ڈتی۔۔اے میڈے واسطے بہوں ہی عجیب ہا۔۔خیر اساں سنگتیں کوں سݨدے رہ ڳئے ہیں تے دل ہی دل اچ اپݨے اتیں کھلدے وی رہ ڳئے ہیں۔۔پر کجھ سنگتیاں میڈا ساتھ وی ڈتا تے میں انہیں دا دل کولو مشکور وی ہاں۔۔
میڈے پیارے دوستو میں سائیکو ہوساں پر اتنا وی کائینمہیں جو سماج واسطے یا تہاڈے واسطے کوئی مسئلہ پیدا کراں تساں بے فکر راہوو میڈی طرفوں تہاکوں کوئی تکلیف نہ پُجسی۔۔!!!
وسدے راہوو۔۔

About The Author

ویب ڈیسک

See author's posts