استاد فاروق محرم ۔۔۔مالک اُشتر

حسرت موہانی دے مشہور شعر کوں اپنی ضرورت ولوں سرائیکی وچ ایں وٹیندے پئے سے۔

ہک مشق_گلو جاری، روزی دی مشقت وی

ہک طرفہ تماشا ہے محرم دی طبعیت وی

اج دے دور وچ گولنڑ نال وی بہوں اوکھیں خالص ہیرے ملدن۔ہر چمکدی شئے سونا نئیں ہوندی ۔ نقل تے قلعی لا تیں اصل دی ہکل ڈتی کھڑے راہندن۔ جڈاں دی دنیا مارکیٹنگ دے چکر وچ آئی اے اشیائے ضرورت سمیت بندے وی کمرشلائزیش دا شکار تھی گئین ۔ جیرھی شئے کمرشل تھی ونجے بظاہر مہانگی ڈسدی ہے لیکن اوندا انت پھٹے تیں وکدے ہوئے لنڈے تے فٹ پاتھ تے وکدے ہوئے موبائیل اسسریز دی تھی ویندی اے۔جیندی کوئی قیمت نئیں ہوندی۔ استاد فاروق محرم ساڈی وسوں وسیب دا او خاص نگینہ ہے جیرھا ہر مندری وچ نئیں مڑھیا ونج سگدا۔ کمرشلائزیش توں بے نیاز خالص سرائیکی فنکار ہے۔ دھیمے تے کومل سریں نال کھیڈدے تے اچی تان تے کھلے گلے آلا ہرگز نئیں۔

استاد فاروق محرم چونڑویں سرائیکی شاعریں دا کلام گاندے جیندے وچ اشو لال،عزیز شاہد، رفعت عباس، احمد خان طارق، مصطفے خادم، وغیرہ شامل ہن۔ اتھوں انھیں دی ادبی شعری خاصیت دا اندازہ لگدے جو او عام پبلک دے ہلے گلے آلے تے شور شرابے آلے ناچ گانے کوں پسند نئیں کریندے ۔ ایں چیز انھیں دے روزی تے شہرت کوں نقصان وی پچائے مگر انھیں اپنے شعور، مذاج ، ذوق تے معیار تے سمجھوتہ نئیں کیتا۔

محرم صاحب فن خطاطی ، مصوری تے پینٹنگ دے وی ماہر ہن۔کافی عرصہ تائیں تونسے وچ آرٹ لینڈ دے ناں نال ہک دکان وی بنڑائی رہ گئین۔جتھاں ہر ویلھے شعرا، گلوکار، مہمان، دوست احباب تے شاگردیں دی بھیڑ لگی رہ ویندی ہئی ۔ محرم سئیں ہک مست ملنگ تے فقیر انسان ہے۔ آپ شاعری وی کریندن، تے فطرت دے مناظر کوں بہوں پسند کریندن ۔ اجکل چاچے رمضان چناری دی جھوک اباد کیتی پئین، سنگھڑ ، گلکی ،روہ تے دریا سندھ دے عشق اچ سودائی ہن۔ جتلے وڈے فنکار ہن اتلے چنگے انسان ہن۔ پھوت پھات تے پروفیشنل فیشن توں بہوں دور ہن۔ کئی زمانے انھیں دے ڈو سرائیکی والئم آئے ہن۔ الیکٹرونک میڈیا تے ماڈلنگ والی گائیکی نال انھیں دا مزاج میل نہ کھاندا تہوں گوشہ نشینی اختیار کر گئین۔ ساکوں اعزاز حاصل ہے جو اساں انھیں دے عروج ویلھے انھیں کوں سنڑیا ، اوں ویلھے انھیں دی گائیکی تے شخصیت بارے ہک آرٹیکل "وسیب سنگ،خبریں ملتان ” وچ چھپوایا ۔ سچی گالھ اے ہے محرم سئیں کوں او مقام،آدر تے سکھ کہیں وڈکے یا ادارے توں زندگی بھر نئیں ملیا جیندا او حقدار ہے۔ لیکن اوں فقیر ایں چیز دی کڈاہیں پروا نئیں کیتی۔ اللہ سیئں انھیں کوں ہمیشہ سلامت رکھے

About The Author

ویب ڈیسک

See author's posts