پنجاب میں تحریر و تقریر پر بدترین سنسر شپ عائد کرنے والا متنازعہ بِل۔۔۔ عامر حسینی

حکومتی اتحاد اور اپوزیشن کی سب سے بڑی پارٹی مسلم لیگ نواز کے سربراہ شہبازشریف جن کے بارے میں سب کو پتا ہے کہ اُن کو صحافت اور مصنفین کو پابند سلاسل کرنے کی اسٹبلشمنٹ کی دیرینہ جواہش کو عملی جامہ پہنانے کی کسی کوشش پر کوئی اعتراض نہیں ہے لیکن پنجاب میں پی پی پی کو کیا ہوا؟

آج تک پی پی پی کے سندھ میں وزیر قانون بھی یہ نہیں بتاسکے کہ وہ سندھ پریس اینڈ پبلیکیشنز لاءز کا انتہائی غیرجمہوری اور آمریت پسند مسودہ سندھ اسمبلی سے پاس کیوں کرانا چاہتے تھے؟ کیا سندھ میں پی پی پی کے سنیئر تجربہ کار اراکین اسمبلی یہ نہیں جانتے تھے کہ وہ جو قانون اسمبلی سے پاس کرانے جارہے ہیں وہ ایوب و ضیاء کی سنسرشپ پالیسی سے بھی زیادہ سخت ہے؟وہ بل بنا معذرت کے واپس کمیٹی کو بھیج دیا گیا تھا جب سندھ بھر سے احتجاج سامنے آیا تھا…

پنجاب اسمبلی میں جس دن یہ بل پاس ہوا پوری اپوزیشن اُن کی جتنی بھی نمائندگی اجلاس میں تھی سوائے اس بِل کے باقی سارے ایجنڈے کی کاپیاں رد کرکے بائیکاٹ کرنے کی ہمت تو رکھتی تھی لیکن اس بِل کی مخالفت کرنے اور احتجاج کرنے کی بجائے اس کو متفقہ طور پر پاس ہوجانے دیا اور پرویزاللہی کو موقعہ دیا کہ وہ اپوزیشن کی تمام جماعتوں کے تعاون کا شُکریہ ادا کرے…….