سینے جھوکاں دیدیں دیرے۔۔۔ نذیر لغاری

اگیں دی تاں چرک کیتوئ حال ستارھاں ڈیہیں ڈاڈو سالیں وچ ونج پورا کیتو اجاں چوکھاویلھا گھنسیں تیں پندھ کتھا لکھ سٹی انیکوں کیرھا کیرھا پڑھسی تیڈی پندھ وہانی کیرھی کال کریہہ نال بھڑسی رسیئے بالیں کوں ٹھگلیسی وستی وستی کڈھی کڈھ تے اٹامٹی نال رلاتے اوتری شام دی سنجی چلھ تے پاتری دے وچ پیڑا بنسی تھوبی اتے ڈھوڈھابن تے نیرو ہیندی وسمی اکھ دے سنے سیک تے پکسی کیندے کولھوں ویلھالا تھے کیرھاوت ہن روزی روٹی سنگت یاری بٹ کڑاکاں سیل سپاٹا ٹورا پھیرا ہل پنجالی رات دے قصے ڈینہہ دے پٹنے چھوڑ کراہیں تیڈی پندھ وہانی سنسی تیکوں کت دامان ھے سنگتی کیرھی ڈھہندی کندھ ونج جھلی کیرھی چھت کوں تلی ڈتو کیرھارنج وچ دپھاتھی گئیں کیرھی ہتھ وچ کہی پاتے روہ جبل توں کڑیا گنہور کڈھیو کیرھا پیریں چھالے گھن تے تھل مارودا پنیڈا کیتو کیرھا کیچ دے راہیں رلیوں کیرھے رچھ تے راخس ڈٹھے کیرھے کنڈڑے ککرے دا پھیو کیرھے پندھ کشالے کیتو کیرھے سوہے سجھ کوں ساڑیو کیرھا جھنگ ونج چیریو کیرھا تو لھا پریں سٹ تے کچے دلے ٹھلئیوں سارے سنگتی یار بھراوو بانیں بدھ تے اکھیں سٹ تے سیس نواتے معافی منگداں کیچ دے سفریں سرت سسی دی ساہیں رہ گئ ہیر سیالن کھیڑ یئیں لڈ گئی رادھا کوں ونج گولیم رادھادے وچ رانجھا ڈٹھم ابوالہول نال گالھں کیتیم حال ونڈایم اہرامیں داپاسہ گھن تے صدئیں وچ ساہ گھدم ٹیمز دی وہندی ہر چھولی توں سدھ ہکڑے دے پچھیم کارل مارکس دے استانے تے ساہ سترا ٹیریم میں بس آگیاں دیر سویل تاں تھی ویندی ء میں وی چرکیں آیا ں میڈے ہتھ کاسے وچ لفظیں والی چوگ ہوندی تاں ان ہوندی کوں ہوندی آن بنیندا ہن میڈے ہتھ وچ میڈے وس وچ جوکجھ دی ہے سب تہاڈا ھے سب سنگت دے لیکھے ھے سب یاریں دےنانویں سب ویل ھے میڈے سجنیں دی لکھ تھورے سرائیکی عوامی سنگت دے جیرھی میڈے نال ٹری جیں سیال انھال نہ ڈٹھا اکھیم دھوتاں دھو تھی گئے اکھیم کھڑوتاں کھڑدے کھڑگئے مشتاق فریدی سعید خاور جاوید چانڈیو شاہد جتوئ ریاض بھٹی قاسم لاشاری عبداللہ گبول ملک اکبر شیخ اسلم سانول شیخ باسط لاشاری خورشید انجم حمید علی عبدالشکور غلام مصطفی خان جام اسلم عزیز شاہد حمید اصغر نانویں وچ کیا لاتھے اے تاں سارے ہکے ناں ءن میڈے اپنے ناں اپنے آپ تے کت داتھورا لکھ تھورے بابر مرزادے جیں قدم قدم تے سدھ لدھی جو ہن وت کیا تھئے مہرے والا عاشق خان بزدار تاج گوپانگ نذیر فیض باسط بھٹی جہانگیر مخلص ظہور دھریجہ ظہور ملک ارشاد احمد آمین صاحب تے طارق خان جتوئ تہاکوں کون وسارے کیرھا کافر تھیوے غلام یسین فخری انجم لاشاری پیارے یارو پار دوٹپ گیو ہر ویلھے تساں یاد ء چ ہوندو حضرت علامہ اعظم سعیدی حافظ ظہور غلام مجتبی ساجد لکھ تھورے سائیں تہاڈے لکھ احسان میڈے سردا ہک ہک وال تہاڈے نینھ داڈیونے دار تساں لہنے وند ہر وستی دا ہر شہر بزار داہر ہک واسی کیچ دے راہیں دا ہر پاندھی سب سنگت کوں لکھ کروڑ سلام میڈے سارے عجز نیاز پیر فرید دی مسند تے دستار دے وارث معین الدین محبوب دے نانویں

اے وی پڑھو: سینے جھوکاں دیدیں دیرے(1)۔۔۔ نذیر لغاری

سینے جھوکاں دیدیں دیرے(2)۔۔۔ نذیر لغاری

About The Author

ویب ڈیسک

See author's posts