"ابنارمل” قصے دی پراݨی پوتھی اچوں کہانی دی اڄوکی وݨت دی اٹکل(نویں اسلوبیاتی ڄاݨ وندی) نال ٹھہانوݨ دی اصلوں نویکلی سرائیکی فکشن دی اہر ہے۔
ایں پوتھی کوں پڑھدیں پھلیندیں کئی واری اینویں لڳدے جینویں کہیں پراݨے محل یا مومل دی ڳجھی ماڑھی آڳۓ ہووں جتھ دید آپ ویڑی ہے۔اے سبھ جھالاں اݙیلاں قاری کوں اپݨے اندر دو سݙیندین۔
توڑے جو سدھ نی پوندی جو ایں رمز پچھوں کون ہے؟اوندا کھرا پیرا نی ڄاپدا پر لک چھپانویں ایں کھیڈ اچ کئی عجب اسرار کھلدن۔چور بھانویں پکڑائی نہ ݙیوے پر کیرھا تھی پوندے۔
جے وݙا نہ الاؤں تاں "ابنارمل” دیاں کہانیاں جیکر کہیں روسی ہیت پسند پارکھ دے اڳوں آنون ہا تاں وت تہاکوں ساکوں انھیں دا مل پووے ہا۔اشو سئیں دے کہانیں دا نویکلا تے اتم ڳݨ انھیں بظاہر ابنارمل نظر آنوݨ آلے لوکیں(کرداریں) دا وجود ہے جیرھے جو ایں جڳ دے حقیقی ماہݨوں ہن۔
کہانی کار انھیں دی اول اچوں ثقافتی اٹکل نال political Narratology مطلب ہک پاسوں سیاسی اکھاݨی دے مکھ کوں سنگھاریے تے پئی پاسوں سماجی راند اچوں کہانی دی تند کت کے وݙ اکھاݨیMeta Narrative دے منہ توں مکھوٹا لہاۓ۔
کیوں جو ایں مکھوٹے دے پچھوں او کھوٹا مکھ ہے جیرھا لوکیں دی نویکلی اتے قومی سنڄاݨ مکا کے دھاڑلیں دی خاص فکر یانظریے دا پچھلڳ کر ݙیندے۔پروفیسر ہومی بھابھا دی ستھی ہوئی کتابNation and Narration اینجھی پڑھت کوں چوکھا پدھرا کریندی ہے۔”ابنارمل” دیاں کہانیاں حافظ دی غزل وانگوں معانی دی بے عمیقی دے امکان سانگے کئی علامتاں اتے انھیں وچ المیے دا احساس’ ویݨ اتے ݙکھ ݙیݨ دا روڳ روانوݨ دی حد توں اڳوں انسانی درد مندی دی صورت ݙکھالی ݙیندے۔
کہیں ویلھے تاں انھیں دا ہک ہک اکھر اپݨی جاہ نویکلی کہاݨی بݨ ویندے جینویں "ما پرنائی ہئی”۔ٻیا جینویں کامیو تے کافکا دیں کہانیاں وچ بیانیہ گریز دی جھلکڑی ایں ہوند دا ہووݨ ہے انکار نیں کیوں جو ایں طرحاں دی کولاژی اٹکل کہانی دی نیں چتر کاری دی ہے۔
اشو سئیں دیاں کہانیں اچ اے اٹکل جیکوں ݙیکھ سڳو’ اونکوں سݨ سڳو دی ویہتر نال ورتی کھڑی ہے۔ ایں سانگے اتھاں کوئی "ابنارمل” گل گامش وانگ اپݨی امر ٻوٹی نانگ ہتھوں کھسوا کہیں ساگر دی مݨ تیں ٻہہ روندا نی بھل جیوݨ راند اچ ݙکھ دی سانجھ دا دڳ نشابر کریندے۔
اے کہانیاں زوری اوپرپ(جبری بیگانگی) جیرھا اساݙی فطری سنڄاݨ کوں سوی دی کار کھمدے’ریاستی بیانیے دے ایں دروہ اڳوں ݙک ٹھل ہن۔ایں ڳالوں "ابنارمل” دنیا دے ہر تل وطنی دی شکتی ہن۔
About The Author
اے وی پڑھو
اشولال: دل سے نکل کر دلوں میں بسنے کا ملکہ رکھنے والی شاعری کے خالق
ملتان کا بازارِ حسن: ایک بھولا بسرا منظر نامہ||سجاد جہانیہ
اسلم انصاری :ہک ہمہ دان عالم تے شاعر||رانا محبوب اختر