حاکم۔۔۔زلفی

ایویں واہندا وگدا واہندا وگدا میں ہیک اینجھی جاہ تیں ونڃ پڃاں جتھاں سوائے حُکمراناں دے کوئی وی کائینا ہائی۔سارے ہیک ٻئے دو ڈیہدے ٻیٹھے ہن پر کہیں کوں ڳالھ کرݨ دی ہمت کائینا ہائی۔ہر کوئی اپݨی جاہ تیں پھنے خان بݨا ٻیٹھا ہائی۔ ہن وت کلہے کوئی وزیر مشیر، کوئی چمچہ کڑچھا، کوئی صحافی شحافی، کوئی سیکٹری شیکٹری کوئی کائینا ہا۔

انہاں اوتریں کوں سمجھ ہی نہ آوے جو پروٹوکول کوں فالو کیتے بغیر ہیک ڈوجھے نال ڳالھ کیویں کروں۔ اچھا میکوں انہاں دی اے حالت ڈیکھ کے جیرھا پہلا خیال آئے او ایہو ہا جو اچھا اے ” حکمران صرف حکمران ہوندن ، اے نامراد بندے کائینے ہوندے، پروٹوکول کوں بھا لاون اپت اچ ہیک انسان دے تعلق نال الواون چا۔۔پر کائینا انہاں دے سُڃے ہوئے بُتھاڑ دسیندے ہن جو اے ایں انسانی وصف کولو اُکا واقف ہی کائینی۔
اے کوئی دیغر ویلھے دا وقت ہائی ، سجھ لاٹ پلاٹی ہائی، ہوا اچ چیتر دی خشبو تے اسمان تیں کتھائیں کتھائیں جھڑ دے چٹے کپاہ ٹُکڑے تردے ودے ہن۔
اے کوئی ڈو سو دےلڳ بھڳ حاکم ہیک بر برے بان اچ ٻیٹھے ہن جتھاں دور دور تائیں بندے دے ٻو کائینا ہائی۔
میں ایویں ہاولیں ہاولیں انھاں دو ٹُر پیاں ، انہیں میڈا اولوں ڈٹھے تے انہاں دے کن کیٹے تھی ڳئین۔
میکوں اندازہ تھی ڳئے جو اے عام بندے کوں ڈیکھ کے ڈر ڳئین۔ میں انہاں کوں پریں آؤ کھڑ کے ہکل ماری جو تُساں اپݨے اپݨے مُلکاں دی حُکمرانی چھوڑ کے اتھاں جخ ٻیٹھے مریندے ہاو۔۔انہاں کوں میڈی ڳالھ اُکا سمجھ نئیں آئی کیوں جو انھاں اچوں کہیں کوں تل وطنی ٻولی آندی وی ناں ہائی، اپݨی پھوت کوں جھکا نہ تھیوݨ دی وجہ کولو انہاں ہیک ڈوجھے کولو میڈی ڳالھ دا مطلب ہی نہ چا پُچھا۔ میں ولا پریں آؤ ہکل ماری جو کاودن دے پُترو اتھاں کیا ٻیٹھے کریندے ہاؤ۔۔ڈوجھی ہکل دے بعد معرکے دے چہرے دا رنگ پیلا تھی ڳیا تے ایویں کاݨیں اکھیں نال ہیک ڈوجھے دو ڈیکھن ہائے۔
میں ول ہکل ماری جو اوئے مٹی دیاں کندھاں کوئی ولدا تاں ڈیوو گونگے تاں نیوحے۔
ول وی مارکا کوئی ولدا نہ آیا ۔۔۔میکوں شک پیا جو اے نا تاں عام بندے دی گالھ سمجھ سگدن، نہ الوا سگدن تے نہ ہی سݨ سگدن۔۔
میں دل ہی دل اچ سوچے اچھا اے اندھے، گونگے تے ڈورے ہوندن بھاویں۔۔!!!
زلفی

About The Author

ویب ڈیسک

See author's posts