ویکسینیشن، امیون سسٹم میموری اتیں کرونا وائرس ۔۔۔ مشتاق گاڈی

کروناوائرس دی وبا نال ساؤتھ ایشیا تے افریقہ وچ اڄاں تائیں ٻہوں گھٹ شرح اموات ہے؟ ایندا کارݨ ڳولݨ کیتے ہک ننویں ریسرچ سامہݨے آئی ہے جیڑھی ” اسبابی” تاں نئیں پر” نسبتی” ہے۔ مطلب اے سائنسی طور اُتیں ٻہوں کنفرم تاں نئیں جو ایندے کیتے لازم تجربات نئیں تھئے پر اے موجود ڈیٹا تے ٹرینڈ کوں ݙیکھ کنیں گھٹ شرح اموات دی کئی ہک فیکٹرز نال نسبت جوڑ کنیں ݙیکھݨ تے کُجھ نتیجے کڈھݨ دا اہر کریندی ہے۔
ایں ریسرچ سٹڈی موجب جتھاں ٹی۔ بی دی ویکسین اڄ وی لائی ویندی پئی ہے، جیویں جو ساؤتھ ایشیا تے افریقہ، اُتھاں شرح اموات گھٹ ہن۔ جݙاں جو اٹلی، سپین، امریکہ، انگلینڈ وغیرہ وچ ٹی۔بی دی ویکسینیشن ٻہوں مُدت دی بند ہے۔ ٹی۔ بی دی ایں ویکسین دے موثر ہووݨ وی ہک وݙی وجہ اے ݙسی ڳئی ہے جو ساݙا امیون سسٹم اپݨی ہک انج ” میموری۔ یادواشت” رکھدے۔ ٹی۔ بی دی ویکسینیشن دی امیون سسٹم دی ایں میموری پچھوں جݙاں کرونا وائرس نال واسطہ پوندے تاں او اپݨی اوں میموری دی بݨیاد اُتے ودھ سرگرمی (بوسٹ) کریندے تے ایں طرانح وائرس دے خلاف چنڳی رکھوالی کریندے۔
انہیں "نسبتی کارݨ” وچ کُجھ ٻئے فیکٹرز وی تھی سڳدن۔ جیویں جو گرم مرطوب موسم ہووݨ۔ غلاظت وچ ودھ رہوݨ تے اوندے نتیجے وچ امیون سسٹم دا ودھ سرگرم ہووݨ وغیرہ۔ ( ویسے جے اے غلاظت تے امیون سسٹم دا پازیٹو گانڈھا ہے تاں وت ہند سندھ دے ٻاہمݨیں دی چھوت چھات دے خلاف اپݨی مزاحمت وچ غلاظت کوں ترجیح ݙیوݨ آلے ” تنترک” تے ” پشو پتیں” کوں سلام کرݨا پوسی۔۔۔۔ اتھاں اشو لال دی ننویں نظم ” اساں اچھوت چنڳے ہائیں” دا حوالہ وی اچݨ چیتی ‘ چیتے’ وچ آ ویندے۔ ☺️

About The Author

ویب ڈیسک

See author's posts